વિપક્ષ SIR સહિત તમામ મુદ્દાઓ પર સતત વિરોધ કરી રહ્યું છે અને સંસદમાં પણ ભારે હોબાળો થઈ રહ્યો છે. ગૃહની કાર્યવાહી સતત સ્થગિત કરવામાં આવી રહી છે. સોમવારે જ્યારે વિપક્ષના સાંસદોએ લોકસભામાં હોબાળો શરૂ કર્યો, ત્યારે લોકસભાના અધ્યક્ષ ઓમ બિરલા ગુસ્સે થયા અને આંદોલનકારી સાંસદોને કડક શબ્દોમાં ચેતવણી આપી. વિપક્ષના સાંસદોના હોબાળા બાદ ગૃહને સંબોધતા ઓમ બિરલાએ કહ્યું, "જો તમે એ જ તાકાતથી પ્રશ્નો પૂછો છો જે તાકાતથી તમે સૂત્રોચ્ચાર કરી રહ્યા છો, તો તે દેશના લોકો માટે ફાયદાકારક રહેશે. જનતાએ તમને સરકારી સંપત્તિનો નુકાસાન કરવા માટે મોકલ્યા નથી અને હું તમને વિનંતી કરું છું અને ચેતવણી આપું છું કે કોઈ પણ સભ્યને સરકારી સંપત્તિનો નુકસાન કરવાનો વિશેષાધિકાર નથી."
''સરકારી સંપત્તિને નુકસાન પહોંચાડવાનો પ્રયાસ કરશો નહીં''
સાંસદોને ચેતવણી આપતા તેમણે કહ્યું કે, જો તેઓ આમ કરવાનું ચાલુ રાખશે, તો તેમણે કેટલાક "નિર્ણાયક નિર્ણયો" લેવા પડશે. બિરલાએ સાંસદોને ચેતવણી આપી કે જો તમે સરકારી સંપત્તિનો નાશ કરવાનો પ્રયાસ કરશો, તો મારે કેટલાક નિર્ણાયક નિર્ણયો લેવા પડશે અને દેશના લોકો તમને જોશે. ઘણી વિધાનસભાઓમાં આવી ઘટનાઓ બદલ સભ્યો સામે કાર્યવાહી કરવામાં આવી છે. હું તમને ફરીથી ચેતવણી આપું છું, સરકારી સંપત્તિને નુકસાન પહોંચાડવાનો પ્રયાસ કરશો નહીં. આ મારી તમને વિનંતી છે. વિપક્ષી સાંસદોના ભારે હોબાળા બાદ લોકસભાની કાર્યવાહી બપોર સુધી સ્થગિત કરવામાં આવી હતી. તે જ સમયે, હોબાળા બાદ રાજ્યસભાની કાર્યવાહી પણ બપોર સુધી સ્થગિત કરવામાં આવી હતી. બંને ગૃહોના સાંસદો સંસદ પરિસરમાં વિરોધ કરતા જોવા મળ્યા હતા, જેના ઘણા વીડિયો સામે આવ્યા છે.
'મતદાર અધિકાર યાત્રા' પર રાહુલ ગાંધી
કોંગ્રેસ નેતા રાહુલ ગાંધી બિહારમાં 'મતદાર અધિકાર યાત્રા' કાઢી રહ્યા છે. આ યાત્રા સાસારામથી શરૂ થઈ છે. મંગળવારે રાહુલ ગાંધી અને તેજસ્વી યાદવે ઔરંગાબાદથી આ યાત્રા શરૂ કરી હતી. એક તરફ, જ્યારે કોંગ્રેસના તમામ નેતાઓ બિહારમાં રાહુલ ગાંધી સાથે આ યાત્રામાં જોડાઈ રહ્યા છે, ત્યારે અન્ય સાથી પક્ષો સંસદમાં જોરદાર હંગામો મચાવી રહ્યા છે.
