Niger Airport Terror Attack: પશ્ચિમ આફ્રિકન દેશ નાઇજરની રાજધાની નિયામીમાં ગુરુવારે વહેલી સવારે થયેલા આતંકવાદી હુમલાએ સમગ્ર દેશને હચમચાવી દીધો છે. હથિયારોથી સજ્જ આતંકવાદીઓએ નિયામી સ્થિત ડાયોરી હમાની આંતરરાષ્ટ્રીય એરપોર્ટ પર હુમલો કરીને અંધાધૂંધ ગોળીબાર શરૂ કર્યો હતો. આ હુમલામાં 11 સૈનિકો અને બે નાગરિકોના મોત થયા હોવાનું નાઇજરના સંરક્ષણ મંત્રાલયે જણાવ્યું છે. હુમલાની ગંભીરતાને ધ્યાનમાં રાખીને સુરક્ષા દળોએ તાત્કાલિક જવાબી કાર્યવાહી હાથ ધરી હતી. કલાકો સુધી ચાલેલા ગોળીબાર બાદ સુરક્ષા દળોએ પરિસ્થિતિ પર કાબૂ મેળવી લીધો હતો. અધિકૃત માહિતી અનુસાર, સેનાની કાર્યવાહીમાં 22 આતંકવાદીઓ પણ માર્યા ગયા હતા. આ હુમલો નાઇજરના સુરક્ષા તંત્ર માટે એક મોટો પડકાર માનવામાં આવી રહ્યો છે.
ટેક્સીમાં આવી એરપોર્ટ પર કર્યો હુમલો
અહેવાલો અનુસાર હુમલો સ્થાનિક સમય મુજબ સવારે લગભગ 6 વાગ્યે થયો હતો. આતંકવાદીઓ એક ટેક્સીમાં સવાર થઈને એરપોર્ટના મુખ્ય પ્રવેશદ્વાર નજીક આવેલી સુરક્ષા ચોકી સુધી પહોંચ્યા હતા. ટેક્સીમાંથી ઉતરતાની સાથે જ હુમલાખોરોએ સુરક્ષા કર્મચારીઓ પર અચાનક ગોળીબાર શરૂ કરી દીધો હતો. શરૂઆતના હુમલામાં સુરક્ષા દળોને નુકસાન પહોંચાડવાનો પ્રયાસ કરવામાં આવ્યો હતો, જેના કારણે એરપોર્ટ વિસ્તારમાં અફરાતફરીનો માહોલ સર્જાયો હતો.
કલાકો સુધી ચાલ્યો સામસામે ગોળીબાર
હુમલા બાદ સુરક્ષા દળોએ તરત જ મોરચો સંભાળી લીધો હતો. આતંકવાદીઓ અને સુરક્ષા કર્મચારીઓ વચ્ચે ભારે ગોળીબાર શરૂ થયો હતો, જે લાંબા સમય સુધી ચાલ્યો હતો. એરપોર્ટ સંકુલ અને આસપાસનો વિસ્તાર ગોળીઓના અવાજોથી ગુંજી ઉઠ્યો હતો. સુરક્ષા એજન્સીઓએ સમગ્ર વિસ્તારને ઘેરી લઈને આતંકવાદીઓને નિશાન બનાવ્યા હતા. અંતે સેનાની સંયુક્ત કાર્યવાહીમાં હુમલાખોરોને ઠાર કરવામાં સફળતા મળી હતી.
આ પણ વાંચો: ટ્રમ્પ 'ખૂબ ઉતાવળમાં' હતા! : અમેરિકા-ઈરાન કરાર પર ખામેનીનો મોટો ખુલાસો, $300 બિલિયન દાવાએ મચાવ્યો વિવાદ
સૈન્યે શરૂ કર્યું વિશાળ ઓપરેશન
હુમલાની જાણ થતાં જ નાઇજરની સેનાએ એરપોર્ટ વિસ્તારમાં વિશાળ આતંકવાદ વિરોધી ઓપરેશન શરૂ કર્યું હતું. સૈનિકો, વિશેષ દળો અને સુરક્ષા એજન્સીઓએ સમગ્ર સંકુલમાં સર્ચ ઓપરેશન ચલાવ્યું હતું.
પોર સુધીમાં પરિસ્થિતિ સંપૂર્ણપણે નિયંત્રણમાં આવી ગઈ હતી અને એરપોર્ટને સુરક્ષિત જાહેર કરવામાં આવ્યો હતો. ત્યારબાદ હવાઈ ટ્રાફિક અને ફ્લાઈટ્સની અવરજવર પણ ફરીથી સામાન્ય કરવામાં આવી હતી.
20 શંકાસ્પદોની ધરપકડ
હુમલા બાદ સુરક્ષા એજન્સીઓએ એરપોર્ટ અને આસપાસના વિસ્તારોમાં સઘન તપાસ હાથ ધરી હતી. આ દરમિયાન લગભગ 20 શંકાસ્પદ વ્યક્તિઓની અટકાયત કરવામાં આવી હોવાનું જાણવા મળ્યું છે. આ તમામ લોકોની પૂછપરછ ચાલી રહી છે. તપાસ એજન્સીઓ હુમલા પાછળ કોઈ મોટું આતંકવાદી નેટવર્ક કાર્યરત હતું કે નહીં તે દિશામાં પણ તપાસ કરી રહી છે.
પાંચ મહિનામાં બીજી મોટી ઘટના
નાઇજરમાં આ વર્ષે સુરક્ષા સંબંધિત પડકારો સતત વધી રહ્યા છે. જાન્યુઆરી 2026માં પણ આ જ એરપોર્ટ સંકુલને નિશાન બનાવીને આતંકવાદી હુમલો કરવામાં આવ્યો હતો. માત્ર પાંચ મહિનાના ગાળામાં એરપોર્ટ પર થયેલો આ બીજો મોટો હુમલો છે, જેના કારણે દેશની સુરક્ષા વ્યવસ્થા અને આતંકવાદ વિરોધી નીતિઓ અંગે ફરીથી ચર્ચા શરૂ થઈ છે.
વ્યૂહાત્મક રીતે અત્યંત મહત્વપૂર્ણ છે નિયામી એરપોર્ટ
ડાયોરી હમાની આંતરરાષ્ટ્રીય એરપોર્ટ માત્ર નાગરિક ઉડ્ડયન માટે જ મહત્વપૂર્ણ નથી, પરંતુ તે નાઇજરના સુરક્ષા અને લશ્કરી માળખાનો પણ એક મહત્વનો ભાગ છે. આ એરપોર્ટ સંકુલમાં G5 સાહેલ આતંકવાદ વિરોધી દળનું મુખ્ય મથક આવેલું છે. ઉપરાંત અહીં રશિયન સૈનિકો, આધુનિક ડ્રોન યુનિટ્સ અને વિવિધ સુરક્ષા સાધનો તહેનાત કરવામાં આવ્યા છે. એરપોર્ટમાં દેશના કિંમતી યુરેનિયમ ભંડારનો પણ સંગ્રહ કરવામાં આવ્યો હોવાનું કહેવાય છે. વિશ્લેષકોના મતે, આ કારણોસર આતંકવાદી સંગઠનો વારંવાર આ સ્થળને નિશાન બનાવવાનો પ્રયાસ કરે છે. એરપોર્ટ પરનો હુમલો માત્ર સુરક્ષા દળો પર જ નહીં પરંતુ નાઇજરની વ્યૂહાત્મક ક્ષમતાઓને પડકારવાનો પ્રયાસ પણ માનવામાં આવી રહ્યો છે.
આતંકવાદ સામેની લડાઈ વધુ કઠિન બનશે
તાજેતરના હુમલાએ ફરી એકવાર સ્પષ્ટ કર્યું છે કે, સાહેલ ક્ષેત્રમાં આતંકવાદ હજુ પણ ગંભીર પડકાર બની રહ્યો છે. નાઇજર સહિતના અનેક આફ્રિકી દેશો વર્ષોથી આતંકવાદી સંગઠનો સામે લડી રહ્યા છે.
નિયામી એરપોર્ટ પરનો હુમલો સુરક્ષા દળો માટે ચેતવણી સમાન માનવામાં આવી રહ્યો છે. આગામી દિવસોમાં દેશની સુરક્ષા વ્યવસ્થાને વધુ મજબૂત બનાવવાના પ્રયાસો તેજ થવાની સંભાવના વ્યક્ત કરવામાં આવી રહી છે.
