ગુજરાતમાં ખાનગી વાહનોના રજિસ્ટ્રેશન અને ફિટનેસ પ્રક્રિયા સંબંધિત મહત્વપૂર્ણ ફેરફારોને લઈને વાહન વ્યવહાર કમિશનર કચેરી, ગાંધીનગર દ્વારા રાજ્યની તમામ પ્રાદેશિક વાહન વ્યવહાર કચેરીઓ (RTO) અને સહાયક પ્રાદેશિક વાહન વ્યવહાર કચેરીઓ (ARTO)ને મહત્વનો પરિપત્ર જારી કરવામાં આવ્યો છે. આ પરિપત્ર માર્ગ પરિવહન અને રાજમાર્ગ મંત્રાલય દ્વારા જાહેર કરાયેલા GSR 349(E) નોટિફિકેશનના અમલીકરણને વધુ સ્પષ્ટ બનાવે છે અને રાજ્યભરમાં એકસરખી પ્રક્રિયા સુનિશ્ચિત કરવાનો પ્રયાસ કરે છે.
પરિપત્રમાં જણાવાયું છે કે, કેન્દ્ર સરકારના માર્ગ પરિવહન અને રાજમાર્ગ મંત્રાલય દ્વારા 8 મે, 2026ના રોજ GSR 349(E) નોટિફિકેશન જાહેર કરવામાં આવ્યું હતું. જોકે, આ નવી જોગવાઈઓને સંપૂર્ણપણે ઓનલાઈન અમલમાં મૂકવા માટે નેશનલ ઇન્ફોર્મેટિક્સ સેન્ટર (NIC) દ્વારા જરૂરી ટેકનિકલ સુધારાઓ હજુ પ્રક્રિયામાં હોવાથી, ત્યાં સુધી તમામ RTO કચેરીઓએ નોટિફિકેશનમાં દર્શાવેલી જોગવાઈઓ અનુસાર મેન્યુઅલ અથવા ઉપલબ્ધ વ્યવસ્થા મુજબ કામગીરી કરવાની રહેશે.
મહેસાણા RTOની રજૂઆત બાદ વધુ સ્પષ્ટતા
આ સમગ્ર મામલે મહેસાણા RTO દ્વારા કેટલીક પ્રક્રિયાત્મક બાબતો અંગે વાહન વ્યવહાર કમિશનર કચેરી પાસે માર્ગદર્શન માંગવામાં આવ્યું હતું. તેના અનુસંધાને હવે રાજ્યભરની તમામ RTO અને ARTO કચેરીઓ માટે એકસમાન સ્પષ્ટતા સાથેનો પરિપત્ર જાહેર કરવામાં આવ્યો છે. પરિપત્ર મુજબ, નોન-ટ્રાન્સપોર્ટ એટલે કે ખાનગી ઉપયોગના વાહનોના રિન્યૂઅલ ઓફ રજિસ્ટ્રેશન માટે અરજદાર પાસેથી કેન્દ્રીય મોટર વાહન નિયમો (Central Motor Vehicles Rules) હેઠળ નિર્ધારિત ફી જ વસૂલવામાં આવશે. આ બાબતે તમામ કચેરીઓને એકસરખી પદ્ધતિ અપનાવવાનો નિર્દેશ આપવામાં આવ્યો છે.
આ પણ વાંચો: પૂરના પાણીમાં તણાઈ બહાર આવ્યા કોબ્રા સહિત 900 સાપ! : લોકોને ઘરમાં રહેવાની અપીલ, રેસ્ક્યુ ટીમો થઈ દોડતી
પ્રથમ વખત ખાનગી વાહનો માટે ફિટનેસની જોગવાઈ
GSR 349(E) નોટિફિકેશન હેઠળ પ્રથમ વખત ખાનગી (નોન-ટ્રાન્સપોર્ટ) વાહનો માટે ફિટનેસ પ્રમાણપત્રની જોગવાઈ અમલમાં આવી છે. અત્યાર સુધી નિયમિત ફિટનેસની ફરજ મુખ્યત્વે વ્યાવસાયિક અથવા ટ્રાન્સપોર્ટ વાહનો માટે લાગુ પડતી હતી, પરંતુ હવે ખાનગી વાહનો માટે પણ નિર્ધારિત સમયગાળા બાદ ફિટનેસ પ્રમાણપત્ર મેળવવું જરૂરી બનશે. વાહન વ્યવહાર કમિશનર કચેરીએ સ્પષ્ટ કર્યું છે કે જ્યારે કોઈ ખાનગી વાહનનું પ્રથમ વખત ફિટનેસ પરીક્ષણ કરાવવામાં આવશે ત્યારે તેમાં વિલંબ થયો હોય તો પણ રૂ. 50 પ્રતિ દિવસના દરે લેટ ફી વસૂલવામાં આવશે નહીં. એટલે કે, પ્રથમ ફિટનેસ માટે વાહનમાલિકોને વિલંબ દંડમાંથી રાહત આપવામાં આવી છે.
ભવિષ્યમાં રિન્યૂઅલ માટે લાગુ પડશે લેટ ફી
પરિપત્રમાં એટલું પણ સ્પષ્ટ કરવામાં આવ્યું છે કે આ રાહત માત્ર પ્રથમ ફિટનેસ પરીક્ષણ પૂરતી મર્યાદિત રહેશે. એક વખત પ્રથમ ફિટનેસ પ્રમાણપત્ર મેળવી લીધા બાદ ભવિષ્યમાં જ્યારે ફિટનેસનું રિન્યૂઅલ કરાવવાનું રહેશે, ત્યારે નિર્ધારિત સમયમર્યાદા બાદ અરજી કરવામાં આવશે તો રૂ. 50 પ્રતિ દિવસના દરે વધારાની લેટ ફી ચૂકવવી પડશે. આથી વાહનમાલિકોએ ભવિષ્યમાં ફિટનેસ પ્રમાણપત્રના રિન્યૂઅલની તારીખ પર ખાસ ધ્યાન રાખવાની જરૂર રહેશે. સમયસર કાર્યવાહી કરવાથી વધારાના આર્થિક બોજથી બચી શકાશે.
રાજ્યની તમામ RTO કચેરીઓને સૂચના
વાહન વ્યવહાર કમિશનર કચેરીએ રાજ્યની તમામ RTO અને ARTO કચેરીઓને આ માર્ગદર્શિકા મુજબ કામગીરી સુનિશ્ચિત કરવા નિર્દેશ આપ્યો છે. NIC દ્વારા જરૂરી ટેકનિકલ સુધારાઓ પૂર્ણ થયા બાદ ઓનલાઈન સિસ્ટમમાં પણ નવી જોગવાઈઓનો સંપૂર્ણ અમલ કરવામાં આવશે. ત્યાં સુધી કચેરીઓએ પરિપત્રમાં દર્શાવેલા નિયમોનું પાલન કરીને અરજદારોને સેવા આપવાની રહેશે. આ પરિપત્રનો મુખ્ય હેતુ રાજ્યભરમાં નિયમોના અમલીકરણમાં એકરૂપતા જાળવવાનો છે, જેથી અલગ-અલગ જિલ્લાઓમાં અલગ અર્થઘટન કે પ્રક્રિયાના કારણે વાહનમાલિકોને મુશ્કેલી ન પડે. ખાસ કરીને ખાનગી વાહનો માટે પ્રથમ વખત ફિટનેસ પ્રમાણપત્ર અને તેની સાથે જોડાયેલી લેટ ફીની સ્પષ્ટતા વાહનમાલિકો માટે મહત્વપૂર્ણ માનવામાં આવે છે.
