હારીજ (પાટણ): પાટણ જિલ્લાના હારીજ તાલુકામાં આવેલા વર્ષો જૂના ઝાપટપુરા વિસ્તારને લઈને મોટો વિવાદ સામે આવ્યો છે. સ્થાનિકોના જણાવ્યા મુજબ છેલ્લા કેટલાક સમયથી અનેક રહેવાસીઓના રાશન કાર્ડ, આધાર કાર્ડ અને અન્ય સરકારી દસ્તાવેજોમાં ઝાપટપુરાના બદલે ‘ઇસ્લામપુરા’ નામ દર્શાવવામાં આવી રહ્યું છે. આ બાબત પ્રકાશમાં આવતાં સમગ્ર વિસ્તારમાં ભારે રોષ ફેલાયો છે. સ્થાનિકોનો આક્ષેપ છે કે સરકારી રેકોર્ડમાં વિસ્તારનું મૂળ નામ ઝાપટપુરા જ હોવા છતાં સરકારી દસ્તાવેજોમાં અલગ નામ કેવી રીતે દાખલ થયું તે ગંભીર તપાસનો વિષય છે.
સરકારી દસ્તાવેજોમાં બદલાયેલું સરનામું બન્યું ચર્ચાનો વિષય
સ્થાનિકોના જણાવ્યા અનુસાર ઝાપટપુરા વિસ્તારમાં વર્ષોથી હિન્દુ અને મુસ્લિમ સમાજના લોકો ભાઈચારા સાથે રહે છે. પરંતુ તાજેતરમાં જ્યારે લોકોએ રાશન કાર્ડ અને આધાર કાર્ડ સહિતના દસ્તાવેજોની ચકાસણી કરી ત્યારે તેમાં ઝાપટપુરાના બદલે ‘ઇસ્લામપુરા’ નામ લખાયેલું જોવા મળ્યું. આ પછી સમગ્ર વિસ્તારમાં ચર્ચાનો માહોલ સર્જાયો છે. રહેવાસીઓનું કહેવું છે કે તેમણે ક્યારેય સરનામું બદલાવવા માટે કોઈ અરજી કરી નથી, છતાં સરકારી દસ્તાવેજોમાં આ ફેરફાર કેવી રીતે થયો તે સમજાતું નથી.
ટેકનિકલ ભૂલ કે સુનિયોજિત કાવતરું? સ્થાનિકોએ ઉઠાવ્યા સવાલો
સ્થાનિકોનો પ્રશ્ન છે કે જો કોઈ સામાન્ય નાગરિક પોતાના દસ્તાવેજમાં નામ કે સરનામું બદલાવવા માંગે તો અનેક સરકારી પ્રક્રિયાઓમાંથી પસાર થવું પડે છે, ત્યારે આખા વિસ્તારનું નામ સરકારી દસ્તાવેજોમાં કેવી રીતે બદલાઈ ગયું? શું આ માત્ર ડેટા એન્ટ્રીની ભૂલ છે કે પછી કોઈએ જાણી-જોઈને સરકારી માહિતીમાં ફેરફાર કર્યો છે? આ અંગે લોકો દ્વારા નિષ્પક્ષ તપાસની માંગ ઉઠાવવામાં આવી રહી છે.
રાશન કાર્ડની KYC દરમિયાન સામે આવી ગડબડ
સ્થાનિકોના જણાવ્યા મુજબ સરકાર દ્વારા રાશન કાર્ડની KYC પ્રક્રિયા હાથ ધરવામાં આવી ત્યારે મોટાભાગના લોકોને પહેલીવાર ખબર પડી કે તેમના સરનામામાં ઝાપટપુરાના બદલે ઇસ્લામપુરા લખાઈ ગયું છે. કેટલાક લોકોના આધાર કાર્ડમાં પણ એ જ સરનામું નોંધાયેલું હોવાનું સામે આવ્યું છે. રહેવાસીઓનું કહેવું છે કે 'ઇસ્લામપુરા' નામથી આ વિસ્તારમાં કોઈ સત્તાવાર વસાહત કે નોંધ અસ્તિત્વમાં નથી.
સરકારી ગેઝેટમાં કોઈ ફેરફાર નહીં છતાં દસ્તાવેજોમાં બદલાવ
સ્થાનિકોનો દાવો છે કે સરકાર દ્વારા કોઈ જાહેરનામું, ગેઝેટ નોટિફિકેશન અથવા ગ્રામપંચાયત-નગરપાલિકાનો કોઈ ઠરાવ થયા વિના વિસ્તારનું નામ બદલવું શક્ય નથી. છતાં સરકારી દસ્તાવેજોમાં અલગ નામ દર્શાવવામાં આવતાં વહીવટી તંત્રની કામગીરી સામે પણ પ્રશ્નો ઊભા થયા છે. લોકોનું કહેવું છે કે જો આ ટેકનિકલ ભૂલ છે તો તેને તાત્કાલિક સુધારવી જોઈએ અને જો કોઈએ જાણીને ડેટા સાથે ચેડાં કર્યા હોય તો જવાબદારો સામે કાર્યવાહી થવી જોઈએ.
સ્થાનિકોએ તંત્ર સમક્ષ કરી તાત્કાલિક સુધારાની માંગ
રહેવાસીઓએ માંગ કરી છે કે તમામ સરકારી દસ્તાવેજોમાં વિસ્તારનું મૂળ અને વર્ષો જૂનું નામ ઝાપટપુરા જ નોંધવામાં આવે. સાથે જ આ સમગ્ર મામલે ઉચ્ચ સ્તરીય તપાસ કરીને સાચી હકીકત જાહેર કરવામાં આવે. લોકોનું કહેવું છે કે વિસ્તારની ઐતિહાસિક ઓળખ જળવાઈ રહેવી જોઈએ અને કોઈપણ પ્રકારની ગેરસમજ ઊભી થાય તે પહેલાં તંત્રે યોગ્ય સ્પષ્ટતા કરવી જોઈએ.
આ પણ વાંચો: પંચમહાલમાં વધુ એક બાળકનું શંકાસ્પદ ચાંદીપુરા વાયરસથી મોત : જિલ્લામાં આરોગ્ય તંત્ર હાઈ એલર્ટ પર
સ્થાનિકોના નિવેદનો બાદ મુદ્દો બન્યો ચર્ચાનો કેન્દ્ર
આ સમગ્ર મામલે તખીબેન, નરસિંહભાઈ, મંગુબેન અને ઈમ્તિયાઝ શેખ સહિતના સ્થાનિક રહેવાસીઓએ પણ પોતાના દસ્તાવેજોમાં થયેલા ફેરફાર અંગે નારાજગી વ્યક્ત કરી છે. તેમણે જણાવ્યું કે તેઓ વર્ષોથી ઝાપટપુરા વિસ્તારમાં રહે છે, પરંતુ સરકારી દસ્તાવેજોમાં અચાનક અલગ નામ આવતાં તેઓ આશ્ચર્યમાં મુકાયા છે. રહેવાસીઓએ તંત્રને ઝડપથી કાર્યવાહી કરીને મૂળ સરનામું પુનઃસ્થાપિત કરવાની અપીલ કરી છે.
