CM Scholarship: ગુજરાતના મુખ્યમંત્રી ભુપેન્દ્ર પટેલે આજે ગાંધીનગર સ્થિત વિદ્યા સમીક્ષા કેન્દ્ર ખાતેથી રાજ્યના લાખો વિદ્યાર્થીઓના ઉજ્જવળ ભવિષ્ય માટે એક મહત્વનું કદમ ઉઠાવ્યું છે. મુખ્યમંત્રીએ રાજ્યની વિવિધ શિષ્યવૃત્તિ યોજનાઓ હેઠળ કુલ 13.96 લાખ વિદ્યાર્થીઓને ₹354 કરોડની સહાયનું ડાયરેક્ટ બેનિફિટ ટ્રાન્સફર (DBT) ના માધ્યમથી વિતરણ કર્યું હતું. આ પ્રસંગે શિક્ષણ મંત્રી સહિતના ઉચ્ચ અધિકારીઓ અને મહાનુભાવોની ઉપસ્થિતિમાં વિદ્યાર્થીઓને આર્થિક ટેકો પૂરો પાડી શિક્ષણ પ્રત્યે પ્રોત્સાહિત કરવાનો પ્રયાસ કરવામાં આવ્યો હતો. શિક્ષણ ક્ષેત્રે ટેકનોલોજી અને પારદર્શિતાના સમન્વય સાથે થયેલું આ વિતરણ રાજ્યના શૈક્ષણિક વિકાસમાં એક નવો અધ્યાય જોડશે.
નમો લક્ષ્મી અને નમો સરસ્વતી સહિતની યોજનાઓનો લાભ
આ કાર્યક્રમ દરમિયાન રાજ્ય સરકારની મહત્વકાંક્ષી યોજનાઓ જેવી કે 'નમો લક્ષ્મી' અને 'નમો સરસ્વતી' વિજ્ઞાન સાધન યોજના હેઠળ વિદ્યાર્થીઓને સહાય આપવામાં આવી હતી. આ ઉપરાંત, મુખ્યમંત્રી જ્ઞાન સાધના સ્કોલરશીપ અને મુખ્યમંત્રી જ્ઞાન સેતુ સ્કોલરશીપ યોજનાના લાભાર્થીઓને પણ આર્થિક સહાય સીધી તેમના બેંક ખાતામાં જમા કરવામાં આવી હતી. આ યોજનાઓનો મુખ્ય ઉદ્દેશ્ય તેજસ્વી વિદ્યાર્થીઓને આર્થિક મુશ્કેલી વગર ઉચ્ચ શિક્ષણ અને વિજ્ઞાન પ્રવાહમાં આગળ વધવા માટે પ્રેરિત કરવાનો છે.
ત્રણ વર્ષમાં રૂ.1871 કરોડની માતબર સહાય
રાજ્ય સરકાર દ્વારા શિક્ષણ પાછળ કરવામાં આવતા ખર્ચના આંકડાઓ પણ આ પ્રસંગે રજૂ કરવામાં આવ્યા હતા. વર્ષ 2023 થી 2026 ના સમયગાળા દરમિયાન અંદાજે 27.61 લાખ વિદ્યાર્થીઓને કુલ ₹1871 કરોડની જંગી રકમની સ્કોલરશીપ આપવામાં આવી છે. આ આંકડાઓ સાબિત કરે છે કે ગુજરાત સરકાર પ્રાથમિકથી લઈને ઉચ્ચ શિક્ષણ સુધીના દરેક સ્તરે વિદ્યાર્થીઓના પડખે ઊભી છે.
સ્ટાર્ટઅપ અને ઇનોવેશનને પ્રોત્સાહન: SSIP 2.0 હેઠળ ગ્રાન્ટ
માત્ર શિષ્યવૃત્તિ જ નહીં, પણ રાજ્યના યુવા ઉદ્યોગસાહસિકોને પ્રોત્સાહન આપવા માટે પણ સરકારે મહત્વનો નિર્ણય લીધો છે. સ્ટુડન્ટ સ્ટાર્ટઅપ એન્ડ ઇનોવેશન પોલીસી 2.0 (SSIP 2.0) અંતર્ગત પસંદગી પામેલા સ્ટાર્ટઅપ ઇનોવેશન આઈડિયાને પણ આ કાર્યક્રમમાં ગ્રાન્ટનું વિતરણ કરવામાં આવ્યું હતું. આનાથી રાજ્યના વિદ્યાર્થીઓમાં સંશોધન અને નવા વિચારોને અમલમાં મૂકવાની ક્ષમતા વધશે અને ગુજરાત 'સ્ટાર્ટઅપ હબ' તરીકે વધુ મજબૂત બનશે.
