મહારાષ્ટ્રના મુંબઈ, થાણે અને પાલઘરમાં મંગળવાર (19 ઓગસ્ટ)ના રોજ શાળાઓ અને કોલેજો બંધ રહેશે. ભારે વરસાદને ધ્યાનમાં રાખીને વહીવટીતંત્રે આ નિર્ણય લીધો છે. હવામાન વિભાગે આગામી 48 કલાક માટે મુંબઈ, થાણે, રાયગઢ, રત્નાગિરી, પુણે, કોલ્હાપુર અને સતારામાં રેડ એલર્ટ જાહેર કર્યું છે.
BMCનું જાહેરનામું
બીએમસીએ જણાવ્યું છે કે, મંગળવાર, 19 ઓગસ્ટે તમામ સરકારી, ખાનગી અને મ્યુનિસિપલ શાળા-કોલેજો બંધ રહેશે. મુંબઈ અને ઉપનગરોમાં સતત વરસાદને કારણે અનેક વિસ્તારોમાં પાણી ભરાઈ ગયા છે અને ટ્રાફિક જામ સર્જાયો છે.
મુખ્યમંત્રીનો સંદેશ
મુખ્યમંત્રી દેવેન્દ્ર ફડણવીસે જણાવ્યું કે, 15-16 જિલ્લાઓમાં રેડ અને ઓરેન્જ એલર્ટ જાહેર છે અને જરૂરી પગલાં લેવાઈ રહ્યા છે. કોંકણ વિસ્તારમાં નદીઓનું પાણી ચેતવણી સ્તર પાર કરી ગયું છે. જલગાંવ સહિત કેટલાક વિસ્તારોમાં ઘરો અને પ્રાણીઓને ભારે નુકસાન થયું છે.
નાનદેડ જિલ્લામાં પૂરનો ખતરો
નાંદેડ જિલ્લાના મુખેડ તાલુકામાં લેંડી ડેમ સહિત લાતુર, ઉદગીર અને કર્ણાટકથી આવેલ મોટા પાણીના પ્રવાહને કારણે નીચાણવાળા વિસ્તારોમાં પરિસ્થિતિ ગંભીર છે.
તળાવો ઓવરફ્લો થયા
બૃહદ મુંબઈ મ્યુનિસિપલ કોર્પોરેશન વિસ્તારને પાણી પૂરું પાડતા ૭માંથી ૬ તળાવો ભરાઈ ચૂક્યા છે. 18 ઓગસ્ટે વિહાર તળાવ ઓવરફ્લો થવા લાગ્યું, જે પાણી પુરવઠા માટે સારા સમાચાર છે.
મુંબઈમાં સતત વરસાદને કારણે જનજીવન અસરગ્રસ્ત છે અને લોકોને ઘરમાં જ રહેવાની અપીલ કરવામાં આવી છે.
