મૂળ ગુજરાતી અને મુંબઈ ઈન્ડિન્સના આ ખેલાડીની ધરપકડ : જોધપુરની યુવતીએ લગાવ્યા ગંભીર આરોપ

મુંબઈ ઈન્ડિયન્સના ખેલાડી શિવાલિક શર્માની રાજસ્થાનના જોધપુર પોલીસે ધરપકડ કરી છે. જોધપુરના કુડી ભગતસુની હાઉસિંગ બોર્ડ પોલીસ સ્ટેશને ક્રિકેટરને પકડી લીધો અને પોલીસ સ્ટેશન લઈ ગયા. એક છોકરીએ શિવાલિક પર લગ્નના બહાને તેના પર બળાત્કાર કરવાનો અને બાદમાં લગ્ન કરવાનો ઇનકાર કરવાનો આરોપ લગાવ્યો છે.

યુવતીએ કુડી પોલીસ સ્ટેશનમાં લેખિત ફરિયાદ આપીને ક્રિકેટર વિરુદ્ધ FIR નોંધાવી છે. ફરિયાદમાં જણાવાયું છે કે સગાઈ પછી શિવાલિક શર્માએ બળજબરીથી શારીરિક સંબંધો બાંધ્યા હતા અને બાદમાં તેની સાથે લગ્ન કરવાનો સ્પષ્ટ ઇનકાર કર્યો હતો. પોલીસે પીડિતાની મેડિકલ તપાસ કરાવી છે અને તેનું નિવેદન પણ નોંધ્યું છે.

પીડિતાએ ફરિયાદમાં શું કહ્યું?
જોધપુર કમિશનરેટના એસીપી આનંદ સિંહે કેસની પુષ્ટિ કરી અને કહ્યું કે પીડિતા કુડી ભગતસુનીના સેક્ટર-2માં રહે છે. પોલીસને આપેલી ફરિયાદમાં તેણીએ કહ્યું છે કે ફેબ્રુઆરી 2023 માં, જ્યારે તે ગુજરાત ફરવા ગઈ હતી, ત્યારે તેની વડોદરામાં શિવાલિક સાથે મિત્રતા થઈ હતી. બંનેએ પોતાના મોબાઇલ નંબરની આપ-લે કરી. બંને મોબાઈલ પર વાત કરવા લાગ્યા. મિત્રતા ધીમે ધીમે પ્રેમમાં ફેરવાઈ ગઈ અને બંનેએ પોતાના પરિવારનો પરિચય કરાવ્યો. ઓગસ્ટ 2023 માં, શિવાલિકનો પરિવાર તેના સંબંધીઓને મળવા આવ્યો.

બંને પરિવારો લગ્ન માટે સંમત થયા અને સગાઈ પણ થઈ. સગાઈ પછી, જ્યારે શિવાલિક તેને મળવા જોધપુર આવ્યો, ત્યારે તેણે તેની સાથે શારીરિક સંબંધો બાંધ્યા. ઓગસ્ટ 2024 માં, શિવાલિકના માતા-પિતાએ એમ કહીને સગાઈ તોડી નાખી કે શિવાલિક હવે રાષ્ટ્રીય ક્રિકેટર બની ગયો છે અને સારા પરિવારો તરફથી તેના માટે પ્રસ્તાવો આવી રહ્યા છે, તેથી તે હવે શિવાલિક સાથે લગ્ન કરી શકે નહીં. જ્યારે શિવાલિકે પણ લગ્ન કરવાનો ઇનકાર કર્યો, ત્યારે તેણે શિવાલિક વિરુદ્ધ ફરિયાદ નોંધાવી.

શિવાલિક શર્મા કોણ છે?
શિવાલિક શર્મા 2024 થી મુંબઈ ઈન્ડિયન્સ ટીમ સાથે સંકળાયેલા છે અને IPLમાં રમી રહ્યા છે. શિવાલિક ગુજરાતના વડોદરાનો રહેવાસી છે. શિવાલિકે 2016 માં બિન્નુ અંડર-19 ટ્રોફી ટુર્નામેન્ટથી પોતાની કારકિર્દીની શરૂઆત કરી હતી. ૨૦૧૮-૧૯માં રણજી રમ્યો. વર્ષ 2024માં, મુંબઈ ઇન્ડિયન્સે શિવાલિકને 20 લાખ રૂપિયામાં ખરીદ્યો.