ક્રિકેટ ચાહકો માટે રેલવેની 'માસ્ટરસ્ટ્રોક' ભેટ : ભારત-ન્યૂઝીલેન્ડ ફાઇનલ માટે મુંબઈ-અમદાવાદ વચ્ચે દોડશે સ્પેશિયલ સુપરફાસ્ટ ટ્રેન, મિનિટોમાં પહોંચાશે સ્ટેડિયમ; જાણો આખો શિડ્યુલ

અમદાવાદ: ભારતભરમાં અત્યારે ક્રિકેટનો જબરજસ્ત ક્રેઝ જોવા મળી રહ્યો છે અને તેમાં પણ ટી20 વર્લ્ડ કપની ફાઇનલમાં ભારતની એન્ટ્રીએ ચાહકોનો ઉત્સાહ બમણો કરી દીધો છે. ગઈકાલે મુંબઈના વાનખેડે સ્ટેડિયમમાં રમાયેલી રોમાંચક સેમિફાઇનલમાં ઇંગ્લેન્ડને 7 રનથી હરાવીને ભારતીય ટીમે ફાઇનલમાં મક્કમ ડગલાં માંડ્યા છે. હવે રવિવાર, 8 માર્ચના રોજ અમદાવાદના વિશ્વપ્રસિદ્ધ નરેન્દ્ર મોદી સ્ટેડિયમ ખાતે ભારત અને ન્યૂઝીલેન્ડ વચ્ચે ખિતાબી જંગ ખેલાશે. આ ઐતિહાસિક ક્ષણના સાક્ષી બનવા માટે દેશ-વિદેશમાંથી લાખો ચાહકો અમદાવાદ ઉમટી પડવાના છે, ત્યારે તેમની મુસાફરીને સુખદ બનાવવા માટે ભારતીય રેલવેએ ખાસ 'ક્રિકેટ સ્પેશિયલ' ટ્રેનો દોડાવવાનો મોટો નિર્ણય લીધો છે.

અમદાવાદનું નરેન્દ્ર મોદી સ્ટેડિયમ વિશ્વનું સૌથી મોટું સ્ટેડિયમ છે, જ્યાં એક લાખથી વધુ પ્રેક્ષકો એકસાથે બેસીને મેચ નિહાળી શકે છે. ફાઇનલ મેચ માટે મુંબઈ અને અન્ય શહેરોથી આવતા મુસાફરોનો ધસારો રોકેટ ગતિએ વધી રહ્યો છે. આ ભીડને નિયંત્રિત કરવા અને ચાહકોને કોઈ મુશ્કેલી ન પડે તે માટે પશ્ચિમ રેલવેએ મુંબઈ સેન્ટ્રલ અને અમદાવાદ વચ્ચે પ્રીમિયમ સુપરફાસ્ટ સ્પેશિયલ ટ્રેનોની જાહેરાત કરી છે. આ ટ્રેનોમાં વિસ્ટાડોમ અને તેજસ જેવા આધુનિક કોચનો પણ સમાવેશ કરવામાં આવ્યો છે, જે મુસાફરોને વૈભવી અનુભવ કરાવશે.

મુંબઈ-અમદાવાદ તેજસ સ્પેશિયલ (ટ્રેન નં. 09027/09028)

રેલવે દ્વારા ક્રિકેટ ચાહકોની સુવિધા માટે જાહેર કરાયેલી પ્રથમ સ્પેશિયલ ટ્રેન 'તેજસ એસી સુપરફાસ્ટ' અંગેની વિગતો જોઈએ તો, આ ટ્રેન 7 માર્ચ, શનિવારના રોજ મુંબઈ સેન્ટ્રલથી રાત્રે 11:45 વાગ્યે પ્રસ્થાન કરશે અને બીજા દિવસે સવારે 8:30 વાગ્યે અમદાવાદ પહોંચશે. મેચ બાદ પરત ફરતા મુસાફરો માટે આ ટ્રેન સોમવાર, 9 માર્ચના રોજ વહેલી સવારે 3:00 વાગ્યે અમદાવાદથી ઉપડશે અને સવારે 11:15 વાગ્યે મુંબઈ સેન્ટ્રલ પહોંચશે. મુસાફરી દરમિયાન આ ટ્રેન બોરીવલી, વાપી, સુરત, ભરૂચ અને વડોદરા જેવા મુખ્ય સ્ટેશનો પર રોકાણ કરશે. આ ટ્રેનમાં મુસાફરોની આરામદાયક સફર માટે ફર્સ્ટ એસી, એસી 2-ટાયર અને એસી 3-ટાયર જેવા પ્રીમિયમ કોચની સુવિધા ઉપલબ્ધ કરાવવામાં આવી છે.

મુંબઈ-અમદાવાદ એસી સુપરફાસ્ટ સ્પેશિયલ (ટ્રેન નં. 09021/09022)

રેલવે દ્વારા બીજી વિશેષ સુવિધા તરીકે 'મુંબઈ-અમદાવાદ એસી સુપરફાસ્ટ સ્પેશિયલ' (ટ્રેન નં. 09021/09022) દોડાવવામાં આવશે, જે ખાસ કરીને 8 માર્ચ, રવિવારે મેચના દિવસે જ ક્રિકેટ ચાહકોને સમયસર સ્ટેડિયમ પહોંચાડવા માટે તૈયાર કરવામાં આવી છે. આ ટ્રેન રવિવારે સવારે 6:20 વાગ્યે મુંબઈથી ઉપડશે અને બપોરે 12:40 વાગ્યે અમદાવાદ પહોંચશે, જેથી ચાહકો આરામથી મેચ શરૂ થાય તે પહેલાં સ્ટેડિયમ પહોંચી શકે. મેચ પૂર્ણ થયા બાદ, આ ટ્રેન સોમવારે બપોરે 3:10 વાગ્યે અમદાવાદથી પ્રસ્થાન કરી રાત્રે 9:45 વાગ્યે મુંબઈ સેન્ટ્રલ પરત ફરશે. આ ટ્રેનની મુખ્ય વિશેષતા એ છે કે તેમાં મુસાફરોને આધુનિક મુસાફરીનો અનુભવ કરાવવા માટે વિસ્ટાડોમ, એક્ઝિક્યુટિવ અનુભૂતિ અને એસી ચેર કાર જેવા હાઈ-ટેક કોચ જોડવામાં આવ્યા છે.

બુકિંગ ક્યારે અને ક્યાંથી કરાવવું?

ક્રિકેટ ચાહકો પોતાની ટિકિટો IRCTC ની સત્તાવાર વેબસાઇટ અથવા રેલવે સ્ટેશન પર આવેલા PRS કાઉન્ટર પરથી બુક કરાવી શકે છે.

• બુકિંગ સ્ટેટસ: ટ્રેન નંબર 09027/28 માટે બુકિંગ શરૂ થઈ ગયું છે, જ્યારે ટ્રેન નંબર 09021/22 માટે બુકિંગ 7 માર્ચથી શરૂ થશે.

• મુસાફરો વધુ વિગત માટે રેલવેની પૂછપરછ વેબસાઇટની મુલાકાત લઈ શકે છે.