Morbi Rafaleshwar GIDC Fire: મોરબીના રફાળેશ્વર જીઆઈડીસી વિસ્તારમાં આવેલા ગુજરાત વેરહાઉસ કોર્પોરેશનના ગોડાઉનમાં લાગેલી ભીષણ આગે ભારે ચિંતા ઊભી કરી છે. ટેકાના ભાવે ખરીદવામાં આવેલી મગફળીનો વિશાળ જથ્થો ગોડાઉનમાં સંગ્રહિત કરવામાં આવ્યો હતો, જે આગની ઝપેટમાં આવતા કરોડો રૂપિયાનું નુકસાન થવાની આશંકા વ્યક્ત કરવામાં આવી રહી છે. ઘટનાને ફાયર વિભાગે ગંભીરતા પૂર્વક લઈને તેને ‘મેજર કોલ’ જાહેર કરી દીધી છે.
માહિતી મુજબ, રફાળેશ્વર GIDCમાં આવેલ મેજિક સિરામિક નામના બંધ કારખાનાનો ઉપયોગ હાલ ગોડાઉન તરીકે કરવામાં આવી રહ્યો હતો. અહીં નાફેડ (NAFED) દ્વારા અંદાજે ચાર મહિના પહેલા ટેકાના ભાવે ખરીદવામાં આવેલી મગફળીનો મોટો જથ્થો સંગ્રહિત કરવામાં આવ્યો હતો. ગોડાઉનમાં અચાનક આગ લાગતા સમગ્ર વિસ્તારમાં અફરાતફરીનો માહોલ સર્જાયો હતો.
નાફેડ દ્વારા ખરીદાયેલી મગફળીનો જથ્થો આગની ઝપેટમાં
ગુજરાત વેરહાઉસ કોર્પોરેશન, મોરબીના મેનેજર એચ. જી. રાઠોડના જણાવ્યા અનુસાર, નાફેડ દ્વારા ખેડૂતો પાસેથી ટેકાના ભાવે ખરીદવામાં આવેલી મગફળી ચાર મહિના અગાઉ આ ગોડાઉનમાં રાખવામાં આવી હતી. આગ લાગતાં ગોડાઉનમાં રહેલો મોટો જથ્થો બળીને ખાખ થવાની સ્થિતિમાં છે. હાલમાં આગનું ચોક્કસ કારણ જાણી શકાયું નથી. પ્રાથમિક તબક્કે ટેકનિકલ ખામી, આંતરિક ગરમી અથવા અન્ય કોઈ કારણ જવાબદાર હોઈ શકે છે તેવી સંભાવનાઓ વ્યક્ત થઈ રહી છે. જોકે સત્તાવાર કારણ તપાસ પૂર્ણ થયા બાદ જ સ્પષ્ટ થશે.
ફાયર વિભાગે ઘટનાને જાહેર કરી 'મેજર કોલ'
આગની વિકરાળતા અને ગોડાઉનમાં રહેલા જથ્થાની વિશાળ માત્રાને ધ્યાનમાં રાખીને ફાયર વિભાગે ઘટનાને ‘મેજર કોલ’ જાહેર કરી છે. આગને કાબૂમાં લેવા માટે મોરબી ફાયર વિભાગની ચાર ટીમો તાત્કાલિક ઘટનાસ્થળે પહોંચી ગઈ હતી અને પાણીનો સતત મારો ચલાવી આગને કાબૂમાં લેવાના પ્રયાસો હાથ ધર્યા હતા. આગની ગંભીરતા વધતા મદદરૂપ થવા માટે રાજકોટથી બે ફાયર બ્રિગેડની ટીમો તેમજ વાંકાનેરથી એક ટીમને પણ સ્થળ પર મોકલવામાં આવી હતી. કુલ સાત ફાયર ટીમો સતત બચાવ અને આગ બુઝાવવાની કામગીરીમાં જોડાયેલી છે.
કરોડોના નુકસાનની આશંકા
મગફળીના વિશાળ જથ્થાને થયેલા નુકસાનને પગલે કરોડો રૂપિયાનું આર્થિક નુકસાન થવાની શક્યતા છે. આગ કાબૂમાં આવ્યા બાદ જ વાસ્તવિક નુકસાનનો અંદાજ સામે આવી શકશે. હાલમાં ફાયર વિભાગ અને સંબંધિત એજન્સીઓ દ્વારા આગ સંપૂર્ણપણે કાબૂમાં લેવા માટે યુદ્ધના ધોરણે કામગીરી ચાલુ રાખવામાં આવી છે.
શું કહ્યું મેનેજર એચ. જી. રાઠોડે?
ગુજરાત વેરહાઉસ કોર્પોરેશન, મોરબીના મેનેજર એચ. જી. રાઠોડે જણાવ્યું કે, નાફેડ દ્વારા ટેકાના ભાવે ખરીદાયેલી મગફળી છેલ્લા ચાર મહિનાથી ગોડાઉનમાં સંગ્રહિત હતી. આગની જાણ થતાં જ ફાયર વિભાગને માહિતી આપવામાં આવી હતી અને હાલ વિવિધ ટીમો દ્વારા આગ પર નિયંત્રણ મેળવવા માટે સતત પ્રયાસો કરવામાં આવી રહ્યા છે.
