નર્મદા જિલ્લાની ડેડીયાપાડા પ્રાંત કચેરી ખાતે યોજાયેલી આદિજાતિ વિકાસ કચેરીની સંકલન બેઠક દરમિયાન ધારાસભ્ય ચૈતર વસાવા અને તાલુકા પ્રમુખ સંજય વસાવા વચ્ચે બબાલ થતા ચૈતર વસાવાની ધરપકડ કરવામાં આવી હતી, હવે ચૈતર વસાવાને આજે કોર્ટમાં રજૂ કરવામાં આવ્યા. જો કે બીજી તરફ ચૈતર વસાવા વિરુદ્ધ સજંય વસાવાને જાનથી મારી નાંખવાની ધમકીનો આક્ષેપ કરવામાં આવ્યો છે. હવે આ મામલે ચૈતર વસાવાને કોર્ટમાં રજૂ કરતા ગોપાલ ઈટાલિયા અને પોલીસ વચ્ચે કોર્ટના ગેટ આગળ તુ-તુ મેં મેં થઈ છે.
''જનતાની અદાલતને પોલીસે બાનમાં લીધી'
આ દરમિયાન આમ આદમીના કાર્યકર્તાઓએ આક્ષેપ કર્યા હતા કે, ''ભાજપના ઈશારે પોલીસ તંત્રએ કોર્ટને છાવણીમાં ફેરવ્યું છે, એડવોકેટ ગોપાલ ઈટાલીયાને પણ સુનાવણીમાં જતાં રોકવામાં આવે છે. ચૈતરભાઈ વસાવા સાથે આતંકવાદી વ્યવહાર પોલીસ દ્વારા કરવામાં આવી રહ્યો છે, તાનાશાહી આજે સમગ્ર ગુજરાતમાં છતી પડી, જનતાની અદાલતને પોલીસે બાનમાં લીધી છે, મીડિયા મિત્રોને અંદર જતા રોકવામાં આવે છે, તાનાશાહીની હદ આજે ભાજપે વટાવી છે''
આ કોઈ ભાજપનો કાર્યક્રમ નહોંતો: મનસુખ વસાવા
આમ આદમી પાર્ટીના ધારાસભ્ય ચૈતર વસાવાએ જાણી જોઈને સંકલન બેઠકમાં બબાલ કરી હોવાનો ભાજપના સાંસદ મનસુખ વસાવાએ આરોપ લગાવ્યો છે. મનસુખ વસાવાએ જણાવ્યુંકે, ''ચૈતર વસાવા બેઠક ચાલવા દેવા માંગતા નહોંતા, આ કોઈ ભાજપનો કાર્યક્રમ નહોંતો. છતાં આ રીતે ગેરવર્તણૂક કરી તેના કારણે પોલીસે કાર્યવાહી કરવી પડી હતી'' વધુમાં કહ્યું કે, ''એમના સમર્થકો એ જે કાર્ય કર્યું છે તો પોલીસે તેમને પણ પકડી ને મૂકી દેવા જોઈએ, ચૈતર વસાવા કાયમ આવા કાર્યો કરતા હોય છે કોઈને મારી દેવાનું હોઈ ધમકાવાનું હોઈ એવા કાર્ય કરતા જ આવ્યા છે''
જાણો સમગ્ર કેસ?
શનિવારે સાંજે ડેડિપાડા પ્રાંત કચેરી ખાતે એટીવીટી સંકલન બેઠક હતી. જે દરમિયાન તાલુકા પંચાયતના પ્રમુખ સંજય વસાવા અને ચૈતર વસાવા વચ્ચે ઉગ્ર બોલાચાલી થઈ હતી, જે મામલો બિચક્યો અને સીધો જ પોલીસ સ્ટેશન સુધી પહોંચી ગયો. જે મામલે ચૈતર વસાવાની અટકાયત બાદ ધરપકડ કરવામાં આવી છે. જેમાં ચૈતર વસાવા સામે અભદ્ર ભાષા બોલવાનો અને પોલીસ સાથે ગેરવર્તણૂંક કરવાનો પણ આક્ષેપ થયો છે. ચૈતર વસાવાની અટકાયત કરવામાં આવતા તેમના સમર્થકો એકઠા થઈ ગયા હતા અને સૂત્રોચાર સાથે ઉગ્ર વિરોધ કર્યો હતો. આ સમગ્ર કેસ મામલે પોલીસે એક નિવેદનમાં જણાવ્યું હતું કે, તેમને 3 વાગ્યે ડેડિપાડા પોલીસ સ્ટેશન લઈ જવામાં આવ્યા હતા ત્યાંથી નર્મદાના રાજપીપળાની એલસીબીની ઓફિસ ખાતે લઈ જવામાં આવ્યા હતા. આ દરમિયાન તેમના સમર્થકોએ ગાડી સામે હંગામો મચાવ્યો હતો જેના કારણે વાતાવરણ તંગ બન્યું હતું. જો કે, આ બધાની વચ્ચે પોલીસ તેમને રાજપીપળા લઈ ગઈ હતી. હવે ચૈતર વસાવાને કોર્ટમાં રજૂ કરવામાં આવ્યા છે
