Mithun Chakraborty: પશ્ચિમ બંગાળમાં ભાજપના નેતા અને બોલીવુડ અભિનેતા મિથુન ચક્રવર્તીએ તૃણમૂલ કોંગ્રેસ સરકાર પર તીવ્ર પ્રહારો કર્યા છે. તેમણે આરોપ લગાવ્યો કે રાજ્યને 'વેસ્ટ બાંગ્લાદેશ' બનાવવાના પ્રયાસો થઈ રહ્યા છે, પરંતુ તેઓ આવું થવા નહીં દે. મિથુને કહ્યું, "જ્યાં સુધી મારા જેવા લોકોના શરીરમાં લોહીનું એક ટીપું પણ રહેશે, ત્યાં સુધી આ રાજ્ય બાંગ્લાદેશ નહીં બને."તેમણે બાંગ્લાદેશમાં હિન્દુઓ પર થતા અત્યાચારોનો ઉલ્લેખ કરતાં કહ્યું કે જો બંગાળમાં બાંગ્લાદેશનો વિરોધ કરવામાં આવે તો પોલીસ લાઠીચાર્જ કરે છે.
ભાજપ મુસ્લિમ વિરોધી નથી
મિથુને પ્રશ્ન ઉઠાવ્યો કે, "બાંગ્લાદેશમાં કંઈક થાય તો પશ્ચિમ બંગાળના બંગાળીઓ વિરોધ કેમ નથી કરતા? શું અહીં દુર્ગા પૂજાના ગીતો પણ ગાઈ શકીશું નહીં?"ભાજપ મુસ્લિમ વિરોધી નથી તેવું સ્પષ્ટ કરતાં તેમણે કહ્યું, "ભાજપ મુસ્લિમો કે ભારતીય મુસ્લિમોની વિરુદ્ધ નથી. અમે તેમની વિરુદ્ધ છીએ જેઓ દેશમાં રહીને દેશને નુકસાન પહોંચાડવાનું વિચારે છે."
કેન્દ્રની આયુષ્માન ભારત યોજના અમલમાં નથી મૂકાતી
તેમણે તૃણમૂલ સરકાર પર કટાક્ષ કર્યો કે તે એક સમુદાયને ખુશ કરવા માટે આટલી લડત લડી રહી છે. મિથુને રાજ્યમાં ભ્રષ્ટાચાર, ઉદ્યોગોના અભાવ અને આરોગ્ય સુવિધાઓની કમી પર પણ પ્રહાર કર્યા. તેમણે કહ્યું કે કેન્દ્રની આયુષ્માન ભારત યોજના અમલમાં નથી મૂકાતી કારણ કે તેનાથી વડાપ્રધાન નરેન્દ્ર મોદીની લોકપ્રિયતા વધશે.
મિથુને તમામ હિન્દુઓને એક થવાનું આહ્વાન કર્યું
સનાતન ધર્મમાં ગર્વ અનુભવતા મિથુને તમામ હિન્દુઓને એક થવાનું આહ્વાન કર્યું અને કોંગ્રેસ, ડાબેરી પક્ષો તથા તૃણમૂલના હિન્દુ કાર્યકર્તાઓને પણ ભાજપ સાથે જોડાવા અપીલ કરી. તેમણે દાવો કર્યો કે ટૂંક સમયમાં બંગાળમાં ભાજપની સરકાર બનશે અને કોઈપણ સમુદાય પર અત્યાચાર નહીં થાય.આ નિવેદનો કૂચબિહારમાં એક જાહેરસભામાં કરવામાં આવ્યા હતા, જે રાજ્યમાં આગામી વિધાનસભા ચૂંટણીઓને ધ્યાનમાં રાખીને મહત્વના માનવામાં આવે છે.
