હવામાન વિભાગે ગુજરાતમાં વરસાદને લઈને આગાહી (નાઉકાસ્ટ બુલેટિન) જાહેર કરી છે. આજે સાંજે 7 વાગ્યાથી આગામી ત્રણ કલાક માટે આ આગાહી લાગુ પડશે. આ મુજબ, રાજ્યમાં સક્રિય થયેલી ત્રણ સિસ્ટમને કારણે અમદાવાદ સહિત ઉત્તર અને મધ્ય ગુજરાતના કેટલાક વિસ્તારોમાં ભારે વરસાદની શક્યતા છે.
કયા વિસ્તારોમાં પડશે ભારે વરસાદ?
હવામાન વિભાગની આગાહી મુજબ નીચેના જિલ્લાઓમાં ભારે વરસાદની સંભાવના છે, જેમાં અમદાવાદ, બનાસકાંઠા, અરવલ્લી, ગાંધીનગર, મહેસાણા, ખેડા અને સાબરકાંઠાનો સમાવેશ થાય છે.
આ ઉપરાંત, આસપાસના અન્ય વિસ્તારોમાં પણ હળવાથી મધ્યમ વરસાદની શક્યતા વ્યક્ત કરવામાં આવી છે. નાગરિકોને વાતાવરણમાં આવેલા પલટાને ધ્યાનમાં રાખીને સાવચેત રહેવા અને જરૂરી પગલાં લેવાની સલાહ આપવામાં આવી છે.
ત્રણ સિસ્ટમ બની વરસાદનું કારણ
હવામાન વિભાગના જણાવ્યા અનુસાર, હાલમાં અરબી સમુદ્ર અને બંગાળની ખાડીમાં ત્રણ અલગ-અલગ સિસ્ટમ સક્રિય થઈ છે, જેના કારણે ગુજરાતમાં સારો વરસાદ થઈ શકે છે. આ સિસ્ટમ્સની અસરને લીધે આગામી કલાકોમાં વાતાવરણમાં મોટા ફેરફારો જોવા મળશે અને ગાજવીજ સાથે વરસાદ પડી શકે છે. ખેડૂતો અને સામાન્ય જનતાને આ આગાહી મુજબ તૈયાર રહેવા અપીલ કરવામાં આવી છે.
