Maruti Brezza Facelift : ભારતીય SUV માર્કેટમાં મારુતિ સુઝુકી બ્રેઝા હંમેશાથી મજબૂત પકડ ધરાવે છે. વર્ષ 2022 માં લોન્ચ થયેલા વર્તમાન મોડલ બાદ હવે કંપની તેના ફેસલિફ્ટ વર્ઝન પર કામ કરી રહી છે. હાલમાં જ ભારતીય રસ્તાઓ પર આ નવા મોડલને ટેસ્ટિંગ દરમિયાન જોવામાં આવ્યું છે. જોકે આ કાર પર Camouflage લગાવેલું હતું, તેમ છતાં તેની ઘણી મહત્વની વિગતો બહાર આવી છે. આ અપડેટ મુખ્યત્વે વધતી જતી સ્પર્ધા અને ગ્રાહકોની હાઇ-ટેક જરૂરિયાતોને ધ્યાનમાં રાખીને કરવામાં આવી રહ્યા છે.
ડિઝાઇન અપડેટ : મોડર્ન અને આકર્ષક લુક
નવી બ્રેઝા ફેસલિફ્ટના બાહ્ય દેખાવમાં ઝીણવટભર્યા ફેરફારો કરવામાં આવ્યા છે. તેની હેડલેમ્પ અને ટેલલેમ્પની મૂળ ડિઝાઇન વર્તમાન મોડલ જેવી જ જાળવી રાખવામાં આવી છે, પરંતુ તેને વધુ પ્રીમિયમ લુક આપવા માટે બમ્પર અને ફ્રન્ટ ગ્રિલમાં મોટા ફેરફારો જોવા મળી શકે છે. સૌથી મોટો વિઝ્યુઅલ ફેરફાર તેના એલોય વ્હીલ્સમાં છે, જેને સંપૂર્ણપણે રિ-ડિઝાઇન કરવામાં આવ્યા છે. આ ફેરફારોને કારણે કાર રસ્તા પર વધુ આધુનિક અને સ્પોર્ટી દેખાશે.
કેબિન અને ફીચર્સ : વધુ હાઇટેક એક્સપિરિયન્સ
કારની અંદરના ભાગમાં એટલે કે, કેબિનમાં સૌથી મોટું અપડેટ જોવા મળ્યું છે. હાલની બ્રેઝામાં 9 ઇંચની ટચસ્ક્રીન આવે છે, જેની જગ્યાએ હવે નવી 10.25 ઇંચની મોટી ઇન્ફોટેનમેન્ટ ડિસ્પ્લે આપવામાં આવશે. આ નવી સિસ્ટમમાં અપડેટેડ યુઝર ઇન્ટરફેસ (UI) હશે, જે વધુ સ્મૂધ અને વાપરવામાં સરળ હશે. આ ઉપરાંત, કારમાં 360-ડિગ્રી કેમેરા સિસ્ટમ ચાલુ રાખવામાં આવશે, જે ડ્રાઇવરને સાંકડી જગ્યાઓમાં પાર્કિંગ કરવામાં અને ચારે તરફ નજર રાખવામાં મોટી મદદ કરશે.
પાવરટ્રેન અને ટ્રાન્સમિશન : ડ્રાઇવિંગમાં નવો દમ
મિકેનિકલ રીતે વાત કરીએ તો, મારુતિ બ્રેઝામાં વિશ્વાસપાત્ર 1.5-લિટર K15C પેટ્રોલ એન્જિન જ ચાલુ રહેશે, પરંતુ તેના ટ્રાન્સમિશનમાં મહત્વનો ફેરફાર કરવામાં આવ્યો છે. સ્પાઈડ ઇમેજ મુજબ, હવે આ કારમાં 6-સ્પીડ મેન્યુઅલ ટ્રાન્સમિશન (6MT) જોવા મળી શકે છે, જે હાઈવે ડ્રાઇવિંગમાં વધુ સારો ગિયર રેશિયો અને ફ્યુઅલ કાર્યક્ષમતા (Mileage) પ્રદાન કરશે. આ એન્જિન પેટ્રોલ, માઈલ્ડ-હાઈબ્રિડ અને CNG એમ ત્રણેય ઓપ્શનમાં ઉપલબ્ધ હશે.
CNG મોડલમાં મોટો બદલાવ
પર્યાવરણ પ્રેમીઓ અને માઇલેજ ઈચ્છતા લોકો માટે CNG વેરિઅન્ટમાં ખાસ ફેરફાર થવા જઈ રહ્યો છે. અત્યાર સુધી બૂટ સ્પેસમાં નડતરરૂપ બનતા CNG સિલિન્ડરને બદલે હવે 'અંડરબોડી સિલિન્ડર' ટેકનોલોજીનો ઉપયોગ થઈ શકે છે. આ ટેકનોલોજીને કારણે કારની પાછળની જગ્યા (Boot Space) ખાલી રહેશે, જેથી ગ્રાહકો વધુ સામાન આસાનીથી લઈ જઈ શકશે. આ બદલાવ બ્રેઝાને તેના સેગમેન્ટમાં વધુ પ્રેક્ટિકલ કાર બનાવશે.
