Mahindra : ભારતીય ઓટોમોબાઈલ માર્કેટની દિગ્ગજ કંપની મહિન્દ્રા એન્ડ મહિન્દ્રા (M&M) એ ભવિષ્ય માટે એક અત્યંત મહત્વકાંક્ષી પ્લાન રજૂ કર્યો છે. કંપનીએ જાહેરાત કરી છે કે, તેઓ આગામી વર્ષોમાં કુલ 16 નવી SUV કાર લોન્ચ કરવા જઈ રહી છે. આ યોજના માત્ર નવી કારો લાવવા પૂરતી સીમિત નથી, પરંતુ ભારતીય રસ્તાઓ પર ઇલેક્ટ્રિક અને એન્જિન વાહનોનું નવું સમીકરણ રચવાની તૈયારી છે.
પેટ્રોલ-ડીઝલ અને ઇલેક્ટ્રિક કારોનું સંતુલન
મહિન્દ્રાના આ નવા રોડમેપમાં વિવિધ ગ્રાહકોની જરૂરિયાતોને ધ્યાનમાં રાખવામાં આવી છે. કંપનીએ સ્પષ્ટ કર્યું છે કે, આ 16 નવી SUV માંથી:
10 મોડલ : ઇન્ટરનલ કમ્બશન એન્જિન (ICE) એટલે કે પેટ્રોલ અને ડીઝલ પર ચાલશે.
6 મોડલ : સંપૂર્ણપણે ઇલેક્ટ્રિક (EV) હશે.
આનાથી સ્પષ્ટ થાય છે કે, મહિન્દ્રા પરંપરાગત એન્જિનની સાથે સાથે ભવિષ્યની ઇલેક્ટ્રિક ટેકનોલોજી પર પણ સમાન ભાર મૂકી રહી છે.
અત્યાર સુધીની સફર અને ભવિષ્યની તૈયારી
કંપનીએ 2024 માં જે વચન આપ્યું હતું, તેને આગળ ધપાવતા અત્યાર સુધીમાં XUV 3XO, થાર રોક્સ (Thar Roxx), અને બોલેરો ફેસલિફ્ટ જેવા 5 મજબૂત એન્જિન મોડલ લોન્ચ કરી દીધા છે. જ્યારે ઇલેક્ટ્રિક સેગમેન્ટમાં BE 6 અને XEV 9e જેવા આધુનિક મોડલ મેદાનમાં ઉતાર્યા છે. હવે બાકી રહેલા 9 મોડલ્સ પર કંપની ઝડપથી કામ કરી રહી છે જે આગામી વર્ષોમાં એક પછી એક લોન્ચ થશે.
ક્રાંતિકારી NU_IQ પ્લેટફોર્મ અને વિઝન સિરીઝ
મહિન્દ્રાના આગામી મોડલ્સ 'NU_IQ' નામના એક ખાસ પ્લેટફોર્મ પર તૈયાર કરવામાં આવશે. આ પ્લેટફોર્મની સૌથી મોટી ખાસિયત એ છે કે, તેના પર પેટ્રોલ, ડીઝલ અને ઇલેક્ટ્રિક - ત્રણેય પ્રકારની પાવરટ્રેન સેટ કરી શકાય છે. કંપનીએ ગયા વર્ષે ચાર કોન્સેપ્ટ કાર રજૂ કરી હતી:
Vision S
Vision T
Vision X
Vision SXT
આ ચારેય મોડલ્સના પ્રોડક્શન વર્ઝન 2027 થી રસ્તાઓ પર જોવા મળે તેવી શક્યતા છે.
આ પણ ખાસ વાંચો : સસ્તી કિંમતે મળશે Defender જેવી SUV! : આવી રહી છે 4 નવી પાવરફુલ કાર્સ
સ્કોર્પિયો-N અને થારમાં મોટા ફેરફાર
વર્તમાન સમયની સૌથી લોકપ્રિય SUV એટલે કે સ્કોર્પિયો-N અને થારના ચાહકો માટે સારા સમાચાર છે. કંપની આ બંને કારના ફેસલિફ્ટ (નવા અને અપડેટેડ) વર્ઝન પર કામ કરી રહી છે. સ્કોર્પિયો-N ફેસલિફ્ટ આ વર્ષના અંત સુધીમાં લોન્ચ થઈ શકે છે. આ સિવાય, લોકોની ફેવરિટ થારનું ઇલેક્ટ્રિક વર્ઝન 'Thar.e' પણ પ્રોડક્શન લાઇનમાં આવી શકે છે.
આ પણ ખાસ વાંચો : MG, Mahindra અને Tata માંથી કઈ EV ઝડપથી ચાર્જ થાય છે? : ઇલેક્ટ્રિક કાર ખરીદતા પહેલા જાણી લો
ઉત્પાદન ક્ષમતા અને નવા પ્લાન્ટ્સ
આટલી મોટી સંખ્યામાં કાર બનાવવા માટે મહિન્દ્રા તેના મેન્યુફેક્ચરિંગ નેટવર્કને મજબૂત કરી રહી છે. ચાકણ પ્લાન્ટને NU_IQ પ્લેટફોર્મ માટે તૈયાર કરવામાં આવી રહ્યો છે, જ્યારે નાગપુરમાં એક નવો પ્લાન્ટ સ્થાપવામાં આવશે જે ખાસ કરીને 'વિઝન' મોડલ્સ માટે બનાવવામાં આવશે. આ પ્લાન્ટ 2028 થી કાર્યરત થશે. કંપનીનું લક્ષ્ય દર મહિને હજારો વધારાના યુનિટ્સ બનાવીને ગ્રાહકોના વેઇટિંગ પિરિયડને ઘટાડવાનું પણ છે.
