ઉનાળાની શરૂઆત સાથે જ ગુજરાતમાં ગરમીનો પારો સતત ઊંચો જઈ રહ્યો છે. ત્યારે કચ્છ જિલ્લામાં પણ આકરી ગરમીનો અહેસાસ થવા લાગ્યો છે. ખાસ કરીને ભુજ શહેરમાં તાપમાન 38 ડિગ્રી સેલ્સિયસ સુધી પહોંચી જતા તેની સીધી અસર લોકોના દૈનિક જનજીવન પર જોવા મળી રહી છે.
ગરમીના વધતા પ્રભાવને કારણે ભુજ શહેરમાં બપોરના સમયે રસ્તાઓ પર સન્નાટો છવાઈ જાય છે. સામાન્ય રીતે વ્યસ્ત રહેતા શહેરના મુખ્ય માર્ગો બપોર દરમિયાન લગભગ ખાલી જોવા મળે છે. ભારે તાપમાન અને તીવ્ર ગરમીને કારણે લોકો જરૂરી કામ સિવાય બપોરના સમયે બહાર નીકળવાનું ટાળી રહ્યા છે.
શહેરના બજારો અને જાહેર સ્થળોએ પણ બપોરના સમયમાં લોકોની અવરજવર ઘટી ગઈ છે. ગરમીથી બચવા માટે લોકો ઠંડા પીણા, જ્યૂસ, લસ્સી અને છાશનો સહારો લઈ રહ્યા છે. ખાસ કરીને ઠંડા પીણાંની દુકાનો અને જ્યૂસ સેન્ટરો પર લોકોની ભીડ જોવા મળે છે.
હવામાન નિષ્ણાતોના જણાવ્યા અનુસાર આગામી દિવસોમાં તાપમાનમાં વધુ વધારો થવાની શક્યતા છે. જેના કારણે કચ્છ જિલ્લામાં ઉનાળાની ગરમી વધુ તીવ્ર બની શકે છે.
