Kim Jong Un: ઉત્તર કોરિયાના તાનાશાહ કિમ જોંગ ઉન હંમેશા પોતાના રહસ્યમય અને આક્રમક નિર્ણયો માટે જાણીતા છે. તાજેતરમાં વર્કર્સ પાર્ટીના વાર્ષિક સમારોહ દરમિયાન કિમે પોતાના વફાદાર અધિકારીઓ અને સૈન્ય કમાન્ડરોને નવી સ્નાઈપર રાઈફલ્સ ભેટમાં આપીને સૌનું ધ્યાન ખેંચ્યું છે. આ કાર્યક્રમની સૌથી વધુ ચર્ચિત તસવીર કિમની 13 વર્ષની પુત્રી કિમ જુ એની છે, જે રાઈફલ વડે સચોટ નિશાનો સાધતી જોવા મળી હતી. નિષ્ણાતો માને છે કે કિમ જોંગ ઉન પોતાની પુત્રીને અત્યારથી જ લશ્કરી તાલીમ અને જાહેર જીવનમાં આગળ કરીને તેને પોતાના ઉત્તરાધિકારી તરીકે તૈયાર કરી રહ્યા છે.
વફાદારીનું ઈનામ: અધિકારીઓને રાઈફલની ભેટ
વર્કર્સ પાર્ટીના ચીફ તરીકે ફરીથી સત્તા સંભાળ્યા બાદ કિમ જોંગ ઉને એક ભવ્ય સમારોહનું આયોજન કર્યું હતું. આ પ્રસંગે તેમણે કહ્યું કે, "અધિકારીઓને રાઈફલ ભેટમાં આપવી એ દર્શાવે છે કે મને મારા સૈન્ય અને પક્ષના પદાધિકારીઓ પર સંપૂર્ણ વિશ્વાસ છે." આ કાર્યક્રમમાં કિમની શક્તિશાળી બહેન કિમ યો જોંગ પણ હાથમાં રાઈફલ સાથે જોવા મળી હતી, જે અવારનવાર અમેરિકા અને દક્ષિણ કોરિયા વિરુદ્ધ આકરા નિવેદનો આપતી રહે છે.
પુત્રી કિમ જુ એ: શું તે આગામી સુપ્રીમ લીડર બનશે?
માત્ર 13 વર્ષની ઉંમરે કિમ જુ એ જે રીતે સૈન્ય પરેડ, મિસાઈલ ટેસ્ટ અને હવે રાઈફલ શૂટિંગમાં જોવા મળી રહી છે, તેનાથી દક્ષિણ કોરિયા અને અમેરિકાની ગુપ્તચર એજન્સીઓ સતર્ક થઈ ગઈ છે. અગાઉ કિમ પોતાની ચીન યાત્રા દરમિયાન પણ પુત્રીને સાથે લઈ ગયા હતા. ઉત્તર કોરિયાના મીડિયામાં તેને 'સૌથી પ્રિય સંતાન' તરીકે રજૂ કરવામાં આવે છે, જે સંકેત આપે છે કે કિમ જોંગ ઉન બાદ સત્તાની લગામ તેના હાથમાં આવી શકે છે.
અમેરિકાને ખુલ્લી ચેતવણી: પરમાણુ શક્તિનો સ્વીકાર કરો
આ કાર્યક્રમ દરમિયાન કિમે અમેરિકાને સ્પષ્ટ શબ્દોમાં ધમકી આપી છે. તેમણે જણાવ્યું કે જો અમેરિકા પોતાની દુશ્મનાવટભરી નીતિ છોડી દે અને ઉત્તર કોરિયાને 'પરમાણુ સંપન્ન રાષ્ટ્ર' તરીકે બંધારણીય દરજ્જો આપે, તો જ સંબંધો સુધરી શકે છે. કિમે ભારપૂર્વક કહ્યું કે, "અમેરિકાએ સ્વીકારવું પડશે કે ઉત્તર કોરિયાના પરમાણુ હથિયારો હવે કાયમી છે."
દક્ષિણ કોરિયાને ગણાવ્યું 'સૌથી મોટો શત્રુ'
જ્યારે અમેરિકા સાથે વાતચીતના દરવાજા ખુલ્લા રાખવાની વાત કરી, ત્યારે પડોશી દેશ દક્ષિણ કોરિયા પ્રત્યે કિમે અત્યંત કડક વલણ અપનાવ્યું છે. તેમણે કોઈપણ રાજદ્વારી સુધારાની શક્યતાઓને ફગાવી દેતા દક્ષિણ કોરિયાને પોતાનો 'સૌથી મોટો શત્રુ' જાહેર કર્યો છે. આ નિવેદન બાદ કોરિયન દ્વીપકલ્પમાં ફરી એકવાર યુદ્ધનો તણાવ વધવાની ભીતિ સેવાઈ રહી છે.
