Surat Crime News : સુરતમાં દિવાળીના તહેવારની રોશની વચ્ચે એક પરિવાર માટે ઘોર અંધારું છવાઈ ગયું છે. કાપોદ્રા વિસ્તારમાં રહેતા અને હીરાના કારખાનામાં કામ કરતા રત્નકલાકાર સુરેશભાઈ પ્રેમજીભાઈ ચિત્રોડા (ઉમ્ર 40)ની ચપ્પુના ઘા મારી હત્યા કરવામાં આવી હોવાની વિગતો સામે આવી છે.
સુરતમાં રત્નકલાકારની ચપ્પુ મારીને હત્યા
મૂળ રાજકોટ જિલ્લાના ઉપલેટા તાલુકાના વતની સુરેશભાઈ પોતાના પરિવાર સાથે સુરતમાં રહેતા હતા. તેઓ દૈનિક હીરાના કારખાનામાં કામ કરીને પોતાનું અને પરિવારનું ગુજરાન ચલાવતા હતા.
ઘટનાની વિગત મુજબ, સુરેશભાઈ કારખાનામાંથી કામ પૂરું કરીને જ્યારે ઘેર જઇ રહ્યા હતા, ત્યારે બાઈક પર આવેલા અજાણ્યા બે શખ્સોએ તેમની ઉપર ચપ્પુ વડે હુમલો કર્યો અને ઘટના સ્થળેથી ફરાર થઇ ગયા. જે હુમલાથી સુરેશભાઈએ ઘટનાસ્થળે જ દમ તોડી દીધો.
પરિવાર તૂટી પડ્યો
આ ઘટનાથી પરિવાર પર દુખના વાદળ ઘેરાયા છે. દિવાળીને ગણતરીના દિવસો બાકી છે ત્યારે એક સંઘર્ષ કરતી મધ્યમવર્ગીય વ્યક્તિને ગુમાવવાથી પરિવાર તૂટી પડ્યો છે. સુરેશભાઈના પરિવારમાં તેમની પત્ની અને બે પુત્રો છે, જેમનો હવે એકમાત્ર આધાર છીનવાઈ ગયો છે. હવે પોલીસ ઘટના અંગે ગુનો નોંધીને તપાસ શરૂ કરી રહી છે. અપરાધીઓની ઓળખ અને હત્યાના કારણ અંગે હજુ સુધી સ્પષ્ટતા થઈ નથી, પરંતુ મોટા માપદંડે ગુસ્સો અને દુઃખની લાગણી પ્રવર્તી રહી છે.
