Ahmedabad News: વૈશ્વિક સ્તરે ચાલી રહેલા યુદ્ધો અને કટોકટીની અસરો હવે સ્થાનિક સેવાકીય સંસ્થાઓ પર પણ જોવા મળી રહી છે. અમદાવાદના નારણપુરા વિસ્તારમાં આવેલા અંકુર પાસેની જાણીતી સેવાભાવી સંસ્થા 'જીવન સંધ્યા' હાલ ગેસ સિલિન્ડરની તીવ્ર અછતનો સામનો કરી રહી છે, જેના કારણે ત્યાં રહેતા સેંકડો વડીલોના ભોજન અને અન્ય સેવાઓ પર માઠી અસર પડી રહી છે.
150 થી વધુ વડીલોના ભોજન પર સંકટ
સંસ્થાના મેનેજિંગ ટ્રસ્ટી ડિમ્પલબેન શાહે મીડિયા સાથેની વાતચીતમાં જણાવ્યું હતું કે, 'જીવન સંધ્યા' એક વિશાળ પરિવાર જેવું છે, જ્યાં હાલ 150 થી વધુ વડીલો વસવાટ કરી રહ્યા છે. આ વડીલો માટે સવારનો નાસ્તો, બપોરનું લંચ, સાંજની ચા અને રાત્રિના ભોજનની વ્યવસ્થા સંસ્થા દ્વારા કરવામાં આવે છે. આ તમામ પ્રવૃત્તિઓ માટે ગેસ સિલિન્ડર અનિવાર્ય છે.
ફિઝિયોથેરાપી સેન્ટરમાં પણ ગેસની જરૂરિયાત
માત્ર રસોડામાં જ નહીં, પરંતુ સંસ્થામાં કાર્યરત ફિઝિયોથેરાપી સેન્ટરમાં પણ ગરમ પાણી અને અન્ય ટ્રીટમેન્ટ માટે ગેસનો સતત ઉપયોગ થતો હોય છે. હાલમાં ચાલી રહેલા રશિયા-યુક્રેન યુદ્ધ જેવી પરિસ્થિતિઓના કારણે ગેસના પુરવઠામાં જે અવરોધ ઊભો થયો છે, તેની સીધી અસર સંસ્થાના દૈનિક સંચાલન પર પડી રહી છે.
સંચાલકોની ચિંતા
ડિમ્પલબેને વધુમાં ઉમેર્યું કે, "ગેસ વગર કંઈ જ શક્ય નથી. જો સિલિન્ડરની અછત આમ જ ચાલુ રહેશે, તો આટલા મોટા પરિવાર માટે સમયસર રસોઈ બનાવવી અને વડીલોની કાળજી રાખવી ખૂબ જ પડકારજનક બની જશે. ગેસની તંગી અમારા માટે મોટું નુકસાન અને મુશ્કેલી ઊભી કરી રહી છે."
આમ, એક તરફ મોંઘવારી અને બીજી તરફ સંસાધનોની અછત વચ્ચે અમદાવાદની આવી સેવાકીય સંસ્થાઓ અત્યારે સંઘર્ષ કરી રહી છે. વહીવટી તંત્ર કે દાતાઓ આ બાબતે કંઈક રાહત આપે તેવી આશા સેવાઈ રહી છે.
