Israel Iron Dome UAE deployment: ઈરાન અને ઈઝરાયેલ વચ્ચે ચાલી રહેલા યુદ્ધમાં એક ચોંકાવનારો ખુલાસો થયો છે. એક મીડિયા રિપોર્ટ અનુસાર, ઈતિહાસમાં પ્રથમ વખત ઈઝરાયેલે પોતાની સૌથી શક્તિશાળી એર ડિફેન્સ સિસ્ટમ 'આયર્ન ડોમ' (Iron Dome) ને દેશની બહાર અન્ય દેશની સુરક્ષા માટે તૈનાત કરી છે. જ્યારે ખાડી દેશ UAE પર ઈરાન દ્વારા સતત મિસાઈલ અને ડ્રોન હુમલા કરવામાં આવ્યા, ત્યારે ઈઝરાયેલે મિત્રતા નિભાવતા પોતાની આ ફ્લેગશિપ સિસ્ટમ અને સૈન્ય ટુકડીને સંયુક્ત આરબ અમીરાતની સુરક્ષામાં લગાવી દીધી હતી.
અમેરિકન મીડિયા આઉટલેટ 'એક્સિઓસ' (Axios) ના અહેવાલ મુજબ, આ ગુપ્ત ઓપરેશન ત્યારે પાર પાડવામાં આવ્યું જ્યારે યુદ્ધના શરૂઆતના તબક્કામાં UAE માં આવેલા અમેરિકી સૈન્ય ઠેકાણાઓ અને નાગરિક ઈન્ફ્રાસ્ટ્રક્ચર પર ઈરાને હુમલા તેજ કર્યા હતા. અબુ ધાબીની વિનંતી બાદ ઈઝરાયેલના વડાપ્રધાન બેન્જામિન નેતન્યાહુએ તાત્કાલિક ધોરણે આયર્ન ડોમ બેટરી, ઈન્ટરસેપ્ટર્સ અને ડઝનબંધ સૈનિકોને UAE મોકલવાનો આદેશ આપ્યો હતો.
પહેલીવાર વિદેશી ધરતી પર ‘આયર્ન ડોમ’નો ઉપયોગ
ઈઝરાયેલની આયર્ન ડોમ સિસ્ટમ તેની 90% થી વધુ સફળતાના દર માટે વિશ્વભરમાં પ્રખ્યાત છે. અત્યાર સુધી આ સિસ્ટમનો ઉપયોગ માત્ર ઈઝરાયેલ અને અમેરિકા પૂરતો મર્યાદિત હતો, પરંતુ આ યુદ્ધે સમીકરણો બદલી નાખ્યા છે. વરિષ્ઠ ઈઝરાયેલી અધિકારીઓના જણાવ્યા અનુસાર, UAE એ પહેલો એવો દેશ બન્યો છે જ્યાં ઈઝરાયેલે આ ટેકનોલોજીનો ઉપયોગ સુરક્ષા કવચ તરીકે કર્યો છે. આ સિસ્ટમ ખાસ કરીને ટૂંકા અંતરના રોકેટ અને આર્ટિલરી શેલને હવામાં જ તોડી પાડવા માટે બનાવવામાં આવી છે.
આ પણ વાંચો: ભારત-UAE સંબંધો વધુ મજબૂત બનશે : NSA અજીત ડોભાલે રાષ્ટ્રપતિ અલ નાહયાન સાથે પ્રાદેશિક સુરક્ષા પર કરી ચર્ચા
અબુ ધાબી પર તોળાઈ રહ્યું હતું જોખમ
યુદ્ધ દરમિયાન જ્યારે ઈરાને ખાડી વિસ્તારમાં તેના મિસાઈલ હુમલા વધાર્યા, ત્યારે UAE ના રાષ્ટ્રપતિ મોહમ્મદ બિન જાયદ અલ નાહયાન અને નેતન્યાહુ વચ્ચે સીધી વાતચીત થઈ હતી. UAE એ પોતાની મહત્વની મિલિટરી અને સિવિલિયન સંપત્તિઓને બચાવવા માટે સાથી દેશોની મદદ માંગી હતી. ઈઝરાયેલે માત્ર આયર્ન ડોમ જ નહીં, પરંતુ ઈરાનના દક્ષિણ ભાગમાં એરસ્ટ્રાઈક કરીને તે મિસાઈલ લોન્ચર્સને પણ નિશાન બનાવ્યા હતા જે UAE તરફ ગોઠવવામાં આવ્યા હતા.
અબ્રાહમ એકોર્ડ્સ: બદલાતી જતી રણનીતિ
વર્ષ 2020 માં થયેલા 'અબ્રાહમ એકોર્ડ્સ' બાદ ઈઝરાયેલ અને UAE વચ્ચેના સંબંધોમાં ક્રાંતિકારી ફેરફાર આવ્યો છે. જે દેશો વચ્ચે ક્યારેય રાજદ્વારી સંબંધો નહોતા, તેઓ આજે સુરક્ષા, ગુપ્તચર માહિતી અને ટેકનોલોજીમાં ગાઢ ભાગીદાર છે. આયર્ન ડોમની તૈનાતી સાબિત કરે છે કે બંને દેશોના રાષ્ટ્રીય હિતો હવે એકબીજા સાથે વણાયેલા છે અને ઈરાન જેવા સામાન્ય દુશ્મન સામે તેઓ ખભેખભા મિલાવીને ઉભા છે.
