ઈરાનનો મોટો દાવો : ઈઝરાયેલના બે F-35 ફાઈટર જેટને તોડી પાડ્યા

શુક્રવારે વહેલી સવારે ઈરાને ઈઝરાયલ પર થયેલા હુમલાના જવાબમાં બે અપગ્રેડેડ F-35 સ્ટીલ્થ ફાઈટર જેટ અને અનેક ડ્રોનને તોડી પાડ્યા હતા. આ હુમલો ઈરાનના ટોચના લશ્કરી કમાન્ડરો, પરમાણુ વૈજ્ઞાનિકો અને નાગરિકો (મહિલાઓ અને બાળકો સહિત) ની હત્યા બાદ કરવામાં આવ્યો હતો. ઈરાનના મતે, આ હુમલો ઝાયોનિસ્ટ શાસન એટલે કે ઈઝરાયલ દ્વારા કરવામાં આવ્યો હતો.

સેનાની સત્તાવાર પુષ્ટિ
ઈરાની સેનાના જનસંપર્ક કાર્યાલયે એક સત્તાવાર નિવેદનમાં જણાવ્યું હતું કે દેશના હવાઈ સંરક્ષણ એકમોએ આ બે F-35 ફાઈટર જેટ અને અનેક ડ્રોનને સફળતાપૂર્વક નિશાન બનાવ્યા અને તેનો નાશ કર્યો. હાલમાં, આ વિમાનોના પાઈલટોનું શું થયું તેની તપાસ ચાલી રહી છે અને વધુ માહિતી વિગતવાર આપવામાં આવશે.

F-35 ને વિશ્વનું સૌથી અદ્યતન ફાઈટર જેટ માનવામાં આવે છે
F-35 ફાઈટર એરક્રાફ્ટને સૌથી અદ્યતન પાંચમી પેઢીનું અને સ્ટીલ્થ ટેકનોલોજીથી સજ્જ માનવામાં આવે છે. તેને તોડી પાડવું એ કોઈપણ દેશની લશ્કરી શક્તિનું મોટું પ્રદર્શન માનવામાં આવે છે. ઈરાન આવા વિમાનને તોડી પાડનાર પહેલો દેશ બન્યો છે.

ઇઝરાયલે આ દાવાને ફગાવી દીધો
ઇઝરાયલી સેનાએ આ દાવાઓને સંપૂર્ણપણે નકારી કાઢ્યા છે. ઇઝરાયલ ડિફેન્સ ફોર્સ (IDF) ના અરબી પ્રવક્તા અવિચાઈ આદ્રાઈએ એક નિવેદનમાં કહ્યું, "ઈરાની મીડિયા જુઠ્ઠાણા ફેલાવી રહ્યું છે. આ સમગ્ર સમાચાર પાયાવિહોણા છે."

ઈરાની મીડિયા રિપોર્ટ્સ અનુસાર, તેહરાને દાવો કર્યો છે કે તેણે શુક્રવારે બે ઇઝરાયલી F-35 સ્ટીલ્થ ફાઇટર જેટને તોડી પાડ્યા છે. એવું પણ કહેવામાં આવ્યું હતું કે આ હુમલાઓ દરમિયાન એક પાયલોટને પકડવામાં આવ્યો છે, જે એક મહિલા હોવાનું કહેવાય છે. ઈરાનની રાજ્ય સમાચાર એજન્સી તસ્નીમ અનુસાર, આ કાર્યવાહી ઈરાનની હવાઈ સંરક્ષણ પ્રણાલી દ્વારા કરવામાં આવી હતી.

ઈરાનના આ દાવાને ભારતમાં ઈરાની દૂતાવાસ દ્વારા તેના સત્તાવાર X હેન્ડલ પર પણ શેર કરવામાં આવ્યો છે. પોસ્ટમાં કહેવામાં આવ્યું છે કે, "ઈરાનના હવાઈ સંરક્ષણે બે ઇઝરાયલી F-35 ફાઇટર જેટને તોડી પાડ્યા અને ઘણા દુશ્મન ડ્રોનને અટકાવ્યા."