અમેરિકાના રાષ્ટ્રપતિ ડોનાલ્ડ ટ્રમ્પ દ્વારા નવા ટેરિફની જાહેરાત પછી એપલ ચાહકોમાં ચર્ચા છે કે શું iPhone મોંઘા થશે? જોકે, હાલ માટે એપલને ભારતમાંથી અમેરિકા જતાં iPhone પર કોઈ અસર થઈ નથી.
એપ્રિલમાં ટ્રમ્પ વહીવટીતંત્રે સ્માર્ટફોન, કમ્પ્યુટર અને અન્ય ઇલેક્ટ્રોનિક ઉપકરણોને પરસ્પર ટેરિફમાંથી મુક્તિ આપી હતી. આ કારણે ભારતમાં બનેલા iPhone અને અન્ય સેમિકન્ડક્ટર આધારિત ડિવાઇસ વધારાની ડ્યુટી વગર અમેરિકા પહોંચી રહ્યા છે. આ રાહતથી એપલ ઉપરાંત Nvidia જેવી ટેક કંપનીઓને પણ ફાયદો થયો છે.
ભાવમાં વધારો થશે?
મીડિયા રિપોર્ટ્સ અનુસાર વિશ્લેષકોએ ચેતવણી આપી છે કે 50% ટેરિફનો ખતરો અવગણી શકાય નહીં. જો આ iPhone પર લાગુ કરવામાં આવશે, તો તેની સીધી અસર મુખ્ય બજારોમાં iPhone ના ભાવ પર થશે. હાલ એપલ વધારાના ખર્ચને સહન કરી રહ્યું છે, પણ પરિસ્થિતિ પ્રવાહી છે.
ભારત, એપલનું નવું કેન્દ્ર
મીડિયા રિપોર્ટ્સ મુજબ, એપ્રિલ-જૂન 2025 દરમ્યાન અમેરિકા વેચાયેલા 71% iPhone ભારતમાં બનેલા હતા, જ્યારે એક વર્ષ પહેલા આ આંકડો ફક્ત 31% હતો. ફોક્સકોએ માર્ચ-મે વચ્ચે ભારતમાંથી $3.2 બિલિયનના iPhone નિકાસ કર્યા હતા, જેમાંથી 97% અમેરિકામાં ગયા હતા.
CEO ટિમ કૂકનું નિવેદન
Appleના CEO ટિમ કૂકે બીજા ક્વાર્ટરના પરિણામો દરમ્યાન જણાવ્યું હતું કે, "અમેરિકામાં વેચાતા મોટાભાગના iPhone નું ઉત્પાદન હવે ભારતમાં થઈ રહ્યું છે અને તેમાં કોઈ ફેરફાર નથી."
