18 વર્ષ પછી, ભારત અને યુરોપિયન યુનિયન વચ્ચે ફ્રી ટ્રેડ ડીલ પર મહોર લાગી છે. આ ડીલની જાહેરાત કરવામાં આવી છે. બંને દેશોએ નોંધપાત્ર ટેરિફ ઘટાડા અને ચોક્કસ ઉત્પાદનો પર ટેરિફ નાબૂદ કરવા સંમતિ આપી છે. EUનું કહેવું છે કે આ પગલાથી ભારતીય બજારમાં નિકાસમાં નોંધપાત્ર વધારો થશે અને બંને દેશો વચ્ચે આર્થિક સંબંધો વધુ મજબૂત બનશે.
બીજી બાજુ, ભારતીય એક્સપોર્ટમાં સારો ઉછાળો થવાની અપેક્ષા છે. પ્રધાનમંત્રી મોદીએ કહ્યું કે આ 'મધર ઓફ ઓલ ડીલ' છે. બંને દેશોની આ ડીલથી ચીન અને અમેરિકા પરથી નિર્ભરતા ઘટશે. EU અનુસાર, આ ડીલ હેઠળ ભારતને એક્સપોર્ટ કરવામાં આવતા 90% થી વધુ EU ના સામાન પર ટેક્સ સમાપ્ત અથવા સાવ ઓછો કરવામાં આવશે.
એવી અપેક્ષા છે કે આ કરાર 2032 સુધીમાં EU ની ભારતમાં એક્સપોર્ટને બમણો કરશે. આ ડીલ ભારત માટે રોજગારની નવી તકો પણ ઉભી કરશે. આ કરાર લાખો લોકોને પ્રત્યક્ષ અને પરોક્ષ રોજગાર પ્રદાન કરશે. આ કરારથી ઘણી વસ્તુઓ સસ્તી પણ થશે.
કઈ-કઈ વસ્તુઓ થશે સસ્તી?
ભારત અને યુરોપિયન યુનિયન વચ્ચેના આ ડીલ બાદ, ઘણી વસ્તુઓ ઓછા ભાવે ઉપલબ્ધ થશે. કારથી લઈને રસાયણો સુધીની દરેક વસ્તુના ભાવ ઘટી શકે છે. વાઇન, બીયર અને પીણાં પણ સસ્તા થઈ શકે છે. આ કરારથી દારૂ, ખાદ્ય ઉત્પાદનો, રસાયણો, મશીનરી, ફાર્માસ્યુટિકલ્સ અને એરોસ્પેસ જેવી મુખ્ય વસ્તુઓના ભાવ ઘટી શકે છે.
ડીલ અંગે યુરોપિયન યુનિયન તરફથી મોટી જાહેરાત
EU નિકાસકારો દર વર્ષે ટેરિફમાં 4 અબજ યુરો સુધીની બચત કરશે.
બીયર પરનો ટેરિફ ઘટાડીને 50% કરવામાં આવ્યો છે.
દારૂ પરના ટેરિફમાં 40 ટકાનો ઘટાડો કરવામાં આવશે.
કાર અને કોમર્શિયલ વાહનો પર ટેક્સ 110% થી ઘટાડીને 10% કરવામાં આવશે, પરંતુ દર વર્ષે 250,000 નો ક્વોટા રાખવામાં આવ્યો છે.
ઓલિવ તેલ, માર્જરિન અને વનસ્પતિ તેલ પરની ડ્યુટી નાબૂદ કરવામાં આવશે.
ફળોના રસ અને પ્રોસેસ્ડ ફૂડ પ્રોડક્ટ્સ પરના ટેક્સ નાબૂદ કરવામાં આવશે.
લગભગ તમામ EU રાસાયણિક ઉત્પાદનો પરના ટેરિફ નાબૂદ કરવામાં આવશે.
મશીનરી પર 44% સુધીની ડ્યુટી મોટાભાગે નાબૂદ કરવામાં આવશે.
રસાયણો પર 22% સુધીની ડ્યુટી મોટાભાગે નાબૂદ કરવામાં આવશે.
દવાઓ અને તબીબી ઉત્પાદનો પર 11% સુધીની ડ્યુટી મોટાભાગે નાબૂદ કરવામાં આવી છે.
વિમાન અને અવકાશયાન પરનો ટેરિફ ઘટાડીને '0' કરવામાં આવ્યો છે.
ભારતમાં નિકાસ થતા 90% થી વધુ EU માલ પરના ટેરિફ નાબૂદ કરવામાં આવશે અથવા ઘટાડવામાં આવશે.
યુરોપિયન યુનિયન આગામી બે વર્ષમાં ભારતને ગ્રીનહાઉસ ગેસ ઉત્સર્જન ઘટાડવામાં મદદ કરવા માટે 500 મિલિયન યુરોની સહાય આપશે.
EU ટ્રેડમાર્ક્સ, ડિઝાઇન્સ, કોપીરાઇટ્સ અને વેપાર રહસ્યો માટે મજબૂત રક્ષણ
નવા વ્યવસાય અને રોજગારની તકો ખુલવાની અપેક્ષા છે.
નાની કંપનીઓ (SME) ના વ્યવસાયને વધુ મજબૂત બનાવવામાં આવશે.
