ઉનાળામાં ચોમાસા જેવો ઘાટ! : સરહદી પંથકમાં વાવાઝોડા સાથે વરસાદ, રણમાં સોલાર પેનલો ઉડી જતાં અગરિયાઓ પાયમાલ

Gujarat Weather Update: ગુજરાતના વાતાવરણમાં વહેલી સવારે એકાએક પલટો આવતા સૌરાષ્ટ્ર અને કચ્છના અનેક વિસ્તારોમાં મીની વાવાઝોડા જેવી સ્થિતિ સર્જાઈ છે. સુરેન્દ્રનગર જિલ્લા સહિત કચ્છના નાના રણમાં ફૂંકાયેલા અતિભારે પવનને કારણે મીઠું પકવતા અગરિયાઓને ભારે નુકસાન વેઠવાનો વારો આવ્યો છે. રણમાં સાત મહિના સુધી કાળી મજૂરી કરીને મીઠું પકવતા આ શ્રમિકોના માથે કુદરતે આફત ઉતારી હોય તેમ વહેલી સવારે આવેલા વાવાઝોડાએ તેમના આશિયાના સમાન ઝૂંપડાઓ ઉડાવી દીધા છે.

રણના અંતરિયાળ વિસ્તારોમાં મીઠું પકવવા માટે અગરિયાઓ સોલાર પેનલ પર નિર્ભર હોય છે, પરંતુ ભારે પવનને કારણે આ સોલાર પેનલો પણ કાગળની જેમ હવામાં ઉડી ગઈ હતી. જેના કારણે રણ વિસ્તારમાં અંધારપટ છવાઈ જવાનો ભય સેવાઈ રહ્યો છે. માત્ર સુરેન્દ્રનગર જ નહીં, પરંતુ સરહદી બનાસકાંઠા અને કચ્છના અન્ય વિસ્તારોમાં પણ કમોસમી વરસાદ અને ધૂળની ડમરીઓ સાથે ફૂંકાયેલા પવને જનજીવન અસ્તવ્યસ્ત કરી નાખ્યું છે. ઉનાળાની શરૂઆતમાં જ ચોમાસા જેવો માહોલ સર્જાતા ખેડૂતો અને શ્રમિકોની ચિંતામાં વધારો થયો છે.

કચ્છના નાના રણમાં અગરિયાઓની સ્થિતિ દયનીય

સુરેન્દ્રનગર જિલ્લાના ધાંગધ્રા અને પાટડી તાલુકાના રણ વિસ્તારમાં વહેલી સવારે કુદરતે પ્રકોપ વરસાવ્યો હતો. ભારે પવન અને વાવાઝોડાને કારણે મીઠું પકવતા હજારો અગરિયાઓના ઝૂંપડાઓ જમીનદોસ્ત થઈ ગયા છે. અગરિયાઓ દ્વારા તૈયાર કરવામાં આવેલા મીઠાના અગરોમાં પણ નુકસાન થયું છે. સૌથી મોટી સમસ્યા સોલાર પેનલો ઉડી જવાથી સર્જાઈ છે, જે તેમના કામકાજ અને જીવનનિર્વાહ માટે વીજળીનો મુખ્ય સ્ત્રોત છે.

કચ્છ અને બનાસકાંઠામાં વાતાવરણનો પલટો: વીજપુરવઠો ખોરવાયો

કચ્છના નખત્રાણા, લખપત, અબડાસા, ભચાઉ અને સામખિયાળી જેવા વિસ્તારોમાં ઝરમર વરસાદની સાથે તેજ ગતિએ પવન ફૂંકાયો હતો. ધૂળની ડમરીઓને કારણે વિઝિબિલિટી ઘટી ગઈ હતી અને અનેક વિસ્તારોમાં વીજળીના થાંભલાઓ તેમજ વૃક્ષો ધરાશાયી થવાને કારણે વીજપુરવઠો ખોરવાઈ ગયો હતો. બીજી તરફ, બનાસકાંઠાના વાવ, થરાદ, દિયોદર અને ભાભર પંથકમાં પણ મોડી રાત્રે મીની વાવાઝોડા જેવો માહોલ જામ્યો હતો.

ખેતીના પાકને મોટું નુકસાન: ઠેર-ઠેર પાણી ભરાયા

દિયોદર અને આસપાસના વિસ્તારોમાં ભારે પવન સાથે વરસાદ તૂટી પડતા ઉનાળામાં ચોમાસા જેવી સ્થિતિ જોવા મળી હતી. નીચાણવાળા વિસ્તારોમાં પાણી ભરાઈ ગયા હતા અને અનેક જગ્યાએ દુકાનોના હોર્ડિંગ્સ ઉડીને નીચે પડ્યા હતા. ખેતરોમાં ઉભેલા ઉનાળુ પાકને ભારે પવન અને વરસાદથી વ્યાપક નુકસાન થવાની ભીતિ સેવાઈ રહી છે. ખેડૂતોની મહેનત પર પાણી ફરી વળતા પંથકમાં શોકની લાગણી છે.

હવામાન વિભાગની હજુ પણ વરસાદની આગાહી

હવામાન વિભાગની આગાહી મુજબ, હજુ પણ રાજ્યના કેટલાક ભાગોમાં વરસાદી માહોલ જળવાઈ શકે છે. પશ્ચિમી વિક્ષેપ (Western Disturbance) ને કારણે સર્જાયેલી આ સ્થિતિને પગલે તંત્ર દ્વારા સાવચેત રહેવા સૂચના અપાઈ છે. ખાસ કરીને રણ અને સરહદી વિસ્તારોમાં રહેતા લોકોને સુરક્ષિત સ્થળે રહેવા અપીલ કરવામાં આવી છે.