Pakistan: પાકિસ્તાનમાં પૂરગ્રસ્ત વિસ્તારમાં બચાવ કામગીરી દરમિયાન MI-17 હેલિકોપ્ટર ક્રેશ થયું. આ અકસ્માતમાં 5 લોકોના મોત થયા છે. આ અકસ્માત ખૈબર પખ્તુનખ્વા પ્રાંતમાં થયો હતો જેના મુખ્યમંત્રી અલી અમીન ગંડાપુરે વિમાન દુર્ઘટનાની પુષ્ટિ કરતા કહ્યું કે ખરાબ હવામાનને કારણે મોહમ્મદ જિલ્લાના પંડિયાલી વિસ્તારમાં હેલિકોપ્ટર ક્રેશ થયું. ચોમાસા અને પૂરગ્રસ્ત ઉત્તર પાકિસ્તાનમાં હેલિકોપ્ટર દ્વારા બચાવ કામગીરી ચાલી રહી હતી પરંતુ બચાવ ટીમ અકસ્માતનો ભોગ બની.
મૃતકોમાં 2 પાઇલટ સામેલ
ખૈબર પખ્તુનખ્વાના મુખ્યમંત્રી અલી અમીને કહ્યું કે અકસ્માતમાં 2 પાઇલટ અને 3 બચાવ કામગીરી ટીમના સભ્યોના મોત થયા છે. હેલિકોપ્ટર પૂરગ્રસ્ત બાજૌર વિસ્તારમાં રાહત સામગ્રી પહોંચાડવા ગયો હતો. પ્રાથમિક તપાસ મુજબ ખરાબ હવામાન અને ભારે વરસાદને કારણે આ અકસ્માત થયો હતો. હેલિકોપ્ટરનો કંટ્રોલ રૂમ સાથે સંપર્ક તૂટી ગયો હતો અને ત્યારબાદ શોધખોળ દરમિયાન હેલિકોપ્ટર ક્રેશ થયેલી હાલતમાં મળી આવ્યું હતું. અકસ્માતને કારણે શનિવારે પ્રાંતમાં એક દિવસનો શોક જાહેર કરવામાં આવ્યો હતો. મૃતકોને સંપૂર્ણ રાજકીય સન્માન સાથે દફનાવવામાં આવશે.
પૂરને કારણે 164 લોકોના મોત થયા
બાજૌર અને બુનેર જિલ્લામાં ચોમાસાના વરસાદે તબાહી મચાવી છે. રાષ્ટ્રીય આપત્તિ વ્યવસ્થાપન સત્તામંડળ (NDMA) અનુસાર ૧૫ ઓગસ્ટના રોજ દેશભરમાં પૂરના પાણીમાં ડૂબવાથી ૧૬૪ લોકોના મોત થયા છે જેમાંથી ૧૫૦ લોકો ખૈબર પખ્તુનખ્વાના હતા. ભારે ચોમાસાના વરસાદને કારણે ઉત્તર પાકિસ્તાનમાં ભૂસ્ખલન થયું છે અને અચાનક પૂર આવ્યું છે. પાકિસ્તાન હવામાન વિભાગે ઉત્તર-પશ્ચિમ પાકિસ્તાનમાં ભારે વરસાદની ચેતવણી જારી કરી છે અને લોકોને નદીઓ અને નાળાઓથી દૂર સુરક્ષિત વિસ્તારોમાં જવા વિનંતી કરી છે.
