Gandhinagar News: છેલ્લા કેટલાક સમયથી સોશિયલ મીડિયા અને અન્ય માધ્યમો પર ઈંધણની અછતને લઈને ચાલી રહેલી વાતો પર પૂર્ણવિરામ મૂકતા ગૃહ રાજ્યમંત્રી હર્ષ સંઘવીએ નાગરિકોને આશ્વસ્ત કર્યા છે. તેમણે સ્પષ્ટપણે જણાવ્યું છે કે રાજ્યમાં પેટ્રોલ, ડીઝલ અને રાંધણ ગેસનો પૂરતો સ્ટોક ઉપલબ્ધ છે, તેથી જનતાએ ગભરાવાની કે અફવાઓમાં આવવાની જરૂર નથી.
મુખ્યમંત્રીના અધ્યક્ષસ્થાને ઉચ્ચ સ્તરીય બેઠક
તાજેતરમાં પ્રધાનમંત્રીના માર્ગદર્શન હેઠળ દેશભરમાં જરૂરી ચીજવસ્તુઓની ઉપલબ્ધતા અંગે મુખ્યમંત્રીઓ સાથે એક મહત્વપૂર્ણ બેઠક યોજાઈ હતી. આ બેઠકના અનુસંધાને ગુજરાતના મુખ્યમંત્રી ભુપેન્દ્ર પટેલે રાજ્યના મંત્રીઓ અને ઉચ્ચ અધિકારીઓ સાથે સમીક્ષા બેઠક યોજી હતી. આ બેઠકમાં રાજ્યમાં ઈંધણ અને ખાતર જેવા આવશ્યક પુરવઠાની વર્તમાન સ્થિતિની વિગતવાર ચર્ચા કરવામાં આવી હતી.
ગુજરાતના સરહદી નવા જિલ્લામાં PM મોદીની ઐતિહાસિક મુલાકાત : રૂ.19,000 કરોડના વિકાસ કાર્યોની આપશે ભેટ
સપ્લાય ચેઈન મજબૂત, કાળાબજારિયાઓ સામે લાલ આંખ
બેઠક બાદ ગૃહ રાજ્યમંત્રી હર્ષ સંઘવીએ મીડિયા સાથે વાત કરતા જણાવ્યું હતું કે રાજ્યમાં સપ્લાય વ્યવસ્થા અત્યંત મજબૂત છે. નાગરિકોને કોઈ પણ મુશ્કેલી ન પડે તે માટે સરકાર કટિબદ્ધ છે. જે લોકો ખોટી અફવાઓ ફેલાવીને બજારમાં કૃત્રિમ અછત ઊભી કરવાનો પ્રયાસ કરશે અથવા કાળા બજાર કરશે, તેમની સામે સરકાર કડક હાથે કામ લેશે. અત્યાર સુધીમાં આવા અનેક કિસ્સાઓમાં ગુના નોંધવામાં આવ્યા છે અને આગામી સમયમાં પણ કડક કાર્યવાહી ચાલુ રહેશે તેવી ચીમકી તેમણે આપી છે.
પુરવઠા અંગેના મુખ્ય આંકડા અને આયોજન
સરકાર દ્વારા લેવામાં આવેલા મહત્વના નિર્ણયો અને વ્યવસ્થાની વિગતો નીચે મુજબ છે, રાજ્યમાં 1.28 કરોડથી વધુ LPG ગ્રાહકોને સમયસર સિલિન્ડર મળી રહે તેવું સચોટ આયોજન કરવામાં આવ્યું છે. આ ઉપરાંત, PNG (પાઈપ્ડ નેચરલ ગેસ) કનેક્શન વધારવાની કામગીરી પણ ઝડપી બનાવાઈ છે. રાજ્યના તમામ રિફ્યુઅલિંગ સ્ટેશનો પર પૂરતો જથ્થો જળવાઈ રહે તે માટે ઓઈલ કંપનીઓ સાથે સતત સંકલન કરવામાં આવી રહ્યું છે. ખેડૂતોને ખેતીકામમાં મુશ્કેલી ન પડે તે માટે ખાતરના જથ્થાની પણ પૂરતી વ્યવસ્થા કરવામાં આવી છે.
નાગરિકોને નમ્ર અપીલ
હર્ષ સંઘવીએ નાગરિકોને વિનંતી કરી છે કે સોશિયલ મીડિયા પર આવતા પાયાવિહોણા સંદેશાઓ પર વિશ્વાસ ન કરવો. જો કોઈ શંકા હોય તો સીધા સરકારી વિભાગો કે સત્તાવાર હેલ્પલાઈનનો સંપર્ક કરીને સાચી માહિતી મેળવવી. રાજ્ય સરકાર 24 કલાક પરિસ્થિતિ પર નજર રાખી રહી છે અને દરેક નાગરિક સુધી પાયાની સુવિધાઓ પહોંચાડવા માટે મક્કમ છે.
