વિસાવદરમાં લાગ્યાં 'જય ગોપાલ'ના નારા : વાયા વિસાવદર વિધાનસભામાં પહોંચશે ગોપાલ ઈટાલિયા, ભાજપના અરમાનો પર ફર્યું ઝાડું

Gopal Italia: ગુજરાત વિધાનસભાની કડી અને વિસાવદર બેઠકની પેટાચૂંટણીનું આજે પરિણામ જાહેર થઈ રહ્યું છે. બન્ને બેઠકો પર મતગણતરી અંતિમ ચરણમાં પહોંચી ચુકી છે. ત્યારે ફરી એકવાર ભાજપ માટે માઠા સમાચાર સામે આવ્યાં છે. આ વખતની ચૂંટણીમાં પણ ભાજપ વિસાવદર પર વિજય મેળવવામાં છેટું રહી ગયું હોય તેવી પ્રતિત થઈ રહ્યું છે.

જ્યારે ત્રીજા પક્ષ તરીકે વિધાનસભા ચૂંટણીમાં મેદાને ઉતરનારી આમ આદમી પાર્ટીએ આ વખતે ફરી એકવાર વિધાનસભામાં કાઠું કાઢ્યું છે. અનેક વિવાદોમાં સપડાયેલાં આમ આદમી પાર્ટીના ગુજરાતના પૂર્વ પ્રદેશ પ્રમુખ ગોપાલ ઈટાલિયાએ વાયા વિસાવદર વિધાનસભામાં પહોંચવાનો રસ્તો કાઢી લીધો છે.

AAPએ ભાજપના અરમાનો પર ફેરવ્યું ઝાડુ:
વિસાવદર પેટાચૂંટણીમાં AAPએ સર્જ્યો અપસેટ
ગોપાલ ઇટાલિયાની 17581 મતથી જીત
કડીમાં ભાજપના રાજેન્દ્ર ચાવડા 38904 મતથી જીત્યા
બન્ને પેટાચૂંટણીમાં કોંગ્રેસની કારમી હાર

મતગણતરી દરમિયાન વિસાવદર બેઠક પર ગોપાલ ઈટાલિયા સતત આગળ રહ્યાં હતાં.  ગોપાલ ઈટાલિયાને વિધાનસભામાં મોકલવાનો વિસાવદરની જનતાએ નિર્ધાર કરી લીધો હોય તેવું મતગણતરીથી પ્રતિત થઈ રહ્યું છે. જેને પગલે હાલ વિસાવદરમાં લાગી રહ્યાં છે જય ગોપાલના નારા. ગોપાલ ઈટાલિયાએ પણ જીત સાથે જણાવ્યું છેકે, હું આવતીકાલથી જ ફિલ્ડમાં ઉતરવાનો છું. હું એક પણ દિવસ જંપીને બેસવાનો નથી. મારા મતવિસ્તાર ઉપરાંત પણ ગુજરાતમાં કોઈપણ ખૂણે કોઈને પણ કોઈ અન્યાય થતો હશે તો હું તેની સાથે ઉભો રહીશ.