ગુજરાત વિધાનસભા સંકુલને બોમ્બથી ઉડાવી દેવાની ધમકી મળતા સમગ્ર રાજ્યના વહીવટી તંત્રમાં ફફડાટ વ્યાપી ગયો છે. આ ગંભીર બાબતને ધ્યાને રાખીને રાજ્યના DyCM હર્ષ સંઘવીએ તાત્કાલિક અસરથી ઉચ્ચ પોલીસ અધિકારીઓ સાથે એક હાઈલેવલ બેઠકની અધ્યક્ષતા કરી હતી. બેઠકમાં વિધાનસભાની સુરક્ષા વ્યવસ્થાની ઝીણવટભરી સમીક્ષા કરવામાં આવી હતી અને પરિસ્થિતિ પર કાબૂ મેળવવા માટે જરૂરી દિશાનિર્દેશો આપવામાં આવ્યા હતા.
ધમકીભર્યા ઈ-મેઈલ સામે હર્ષ સંઘવીનું કડક વલણ
આ ધમકી બાદ DyCM હર્ષ સંઘવીએ મક્કમતાપૂર્વક જણાવ્યું હતું કે, "આવા ઈ મેઈલ-ફિમેલથી ગુજરાત પોલીસ કે જનતા કોઈ પ્રકારનો ડર નથી રાખતી." તેમણે સ્પષ્ટતા કરી હતી કે વિધાનસભાની તમામ કામગીરી રાબેતા મુજબ જ ચાલુ છે અને કોઈ પણ પ્રકારની અડચણ ઊભી થવા દેવામાં આવશે નહીં. હાલમાં સુરક્ષા એજન્સીઓ આ મામલે અત્યંત ગંભીરતાથી તપાસ કરી રહી છે અને ઈ-મેઈલના મૂળ સુધી પહોંચવા માટે ટેકનિકલ ટીમો કાર્યરત છે.
ભૂતકાળમાં બાંગ્લાદેશી તત્વોની સંડોવણીનો ઉલ્લેખ
સંઘવીએ અગાઉની ઘટનાઓને યાદ કરતા જણાવ્યું હતું કે, ભૂતકાળમાં પણ આ પ્રકારે રાજ્યમાં ભય ફેલાવવાના પ્રયાસો થયા છે. અગાઉના કિસ્સાઓમાં બાંગ્લાદેશના અસામાજિક તત્વો આ પ્રકારની પ્રવૃત્તિઓમાં સંડોવાયેલા હોવાનું સામે આવ્યું હતું અને પોલીસે તેમને ઝડપી પણ પાડ્યા હતા. તેમણે રાજ્યની જનતાને ખાતરી આપી હતી કે આ વખતે પણ ધમકી આપનારા તત્વોને બક્ષવામાં આવશે નહીં.
ગુનેગારો સામે કડક કાયદેસરની કાર્યવાહીની ખાતરી
બેઠકના અંતે હર્ષ સંઘવીએ આશ્વાસન આપ્યું હતું કે આ કેસમાં જવાબદાર તમામ ગુનેગારોને વહેલી તકે શોધી કાઢવામાં આવશે. રાજ્યની સુરક્ષા સાથે ચેડાં કરનારા તત્વો સામે દાખલારૂપ અને કડક કાયદેસરની કાર્યવાહી કરવામાં આવશે. હાલમાં વિધાનસભા સંકુલની સુરક્ષામાં વધારો કરી દેવામાં આવ્યો છે અને દરેક હિલચાલ પર બાજ નજર રાખવામાં આવી રહી છે.
