RTE Admission 2025: ગુજરાતમાં રાઇટ ટુ એજ્યુકેશન (RTE) હેઠળ ખાનગી શાળાઓમાં ધોરણ-1માં વિનામૂલ્યે પ્રવેશ માટેની પ્રક્રિયા હવે નિર્ણાયક તબક્કામાં પહોંચી છે. પ્રથમ અને બીજા રાઉન્ડ બાદ પણ હજારો બેઠકો ખાલી રહેતાં રાજ્ય સરકાર દ્વારા આજથી ત્રીજો ઓનલાઇન રાઉન્ડ શરૂ કરવામાં આવ્યો છે. આ રાઉન્ડ એવા વાલીઓ માટે મહત્વપૂર્ણ સાબિત થશે જેમના બાળકોને હજુ સુધી પ્રવેશ ફાળવાયો નથી અથવા જેઓ વધુ યોગ્ય શાળાની પસંદગી કરવા ઇચ્છે છે. RTE હેઠળ આર્થિક રીતે નબળા અને વંચિત વર્ગના બાળકોને ખાનગી શાળાઓમાં મફત શિક્ષણનો લાભ આપવામાં આવે છે. દર વર્ષે મોટી સંખ્યામાં વાલીઓ પોતાના બાળકોના ભવિષ્યને ધ્યાનમાં રાખીને આ યોજના હેઠળ અરજી કરે છે. આ વર્ષે પણ રાજ્યભરમાં લાખો વાલીઓએ અરજી નોંધાવી હતી અને હવે ત્રીજા રાઉન્ડ દ્વારા ખાલી રહેલી બેઠકો ભરવાની પ્રક્રિયા હાથ ધરવામાં આવી રહી છે.
પ્રથમ રાઉન્ડમાં 77 હજારથી વધુ બાળકોને મળ્યો પ્રવેશ
RTE કાયદા હેઠળ ખાનગી શાળાઓમાં ધોરણ-1ની કુલ બેઠકોમાંથી 25 ટકા બેઠકો આર્થિક રીતે નબળા વર્ગના બાળકો માટે અનામત રાખવામાં આવે છે. આ બેઠકો પર પ્રવેશ માટે આવક મર્યાદા, કેટેગરી અને અન્ય નક્કી કરાયેલા નિયમોના આધારે મેરિટ મુજબ ફાળવણી કરવામાં આવે છે. વર્ષ 2025-26 માટે રાજ્યની 9,770 ખાનગી શાળાઓમાં 83 હજારથી વધુ બેઠકો ઉપલબ્ધ હતી. આ બેઠકો સામે 1.82 લાખથી વધુ વાલીઓની અરજીઓ માન્ય ઠરી હતી. પ્રથમ રાઉન્ડમાં કુલ 77,925 બાળકોને પ્રવેશ ફાળવવામાં આવ્યો હતો, જે RTE પ્રક્રિયાનો સૌથી મોટો તબક્કો માનવામાં આવે છે.
બીજા રાઉન્ડમાં વધુ 4,244 બાળકોના પ્રવેશ કન્ફર્મ
પ્રથમ રાઉન્ડ બાદ કેટલીક બેઠકો ખાલી રહી હતી. ઉપરાંત, કેટલાક વાલીઓએ સમયમર્યાદામાં પ્રવેશ કન્ફર્મ કરાવ્યો નહોતો અથવા પ્રવેશ ફાળવાયા બાદ તેને રદ પણ કરાવ્યો હતો. જેના કારણે 11 હજારથી વધુ બેઠકો ફરીથી ખાલી થઈ હતી. આ ખાલી બેઠકો માટે બીજા રાઉન્ડનું આયોજન કરવામાં આવ્યું હતું. બીજા રાઉન્ડમાં કુલ 5,814 બેઠકોની ફાળવણી કરવામાં આવી હતી. જેમાંથી 4,244 બાળકોના પ્રવેશ સફળતાપૂર્વક કન્ફર્મ થઈ ગયા છે. તેમ છતાં હજુ હજારો બેઠકો ખાલી રહેતાં ત્રીજો રાઉન્ડ શરૂ કરવાની જરૂરિયાત ઉભી થઈ હતી.
આ પણ વાંચો: વડોદરાવાસીઓ માટે મોટી ખુશખબર!: હવે વોટ્સએપ પર જ મળશે પાલિકાની તમામ સેવાઓ, કચેરીઓના ધક્કાથી મળશે મુક્તિ
હજુ 7,022 બેઠકો ખાલી, અંગ્રેજી માધ્યમમાં સૌથી વધુ તક
બીજા રાઉન્ડ પૂર્ણ થયા બાદ રાજ્યભરમાં કુલ 7,022 બેઠકો હજુ ખાલી હોવાનું જાણવા મળ્યું છે. તેમાં સૌથી વધુ બેઠકો અંગ્રેજી માધ્યમની શાળાઓમાં ઉપલબ્ધ છે. ખાલી બેઠકોની વિગતો મુજબ અંગ્રેજી માધ્યમમાં 3,911 બેઠકો, ગુજરાતી માધ્યમમાં 1,358 બેઠકો, હિન્દી માધ્યમમાં 1,578 બેઠકો અને અન્ય માધ્યમોની 175 બેઠકો ઉપલબ્ધ છે. જેના કારણે હજુ પણ હજારો બાળકોને મફત શિક્ષણનો લાભ મળવાની તક છે.
6થી 8 જૂન સુધી ઓનલાઈન સ્કૂલ પસંદગી કરી શકશે વાલીઓ
પ્રાથમિક શિક્ષણ નિયામક કચેરીની RTE પ્રવેશ શાખા દ્વારા ત્રીજા રાઉન્ડ માટે પાત્ર 1.02 લાખથી વધુ વાલીઓને SMS મારફતે જાણ કરવામાં આવી છે. વાલીઓ 6 જૂનથી 8 જૂન દરમિયાન ઓનલાઈન પોર્ટલ પર જઈને પોતાની પસંદગીની શાળાઓ પસંદ કરી શકશે. આ રાઉન્ડની ખાસિયત એ છે કે વાલીઓ નવી શાળાઓ પસંદ કરી શકશે તેમજ અગાઉ પસંદ કરેલી શાળાઓમાં ફેરફાર કરવાની તક પણ મળશે. તેથી વાલીઓએ પોતાની નજીકની અને અનુકૂળ શાળાઓની યાદી ધ્યાનપૂર્વક તપાસીને પસંદગી કરવી જરૂરી છે.
અમદાવાદમાં પણ નોંધપાત્ર પ્રવેશ
અમદાવાદ જિલ્લામાં પણ RTE પ્રવેશ પ્રક્રિયાને સારો પ્રતિસાદ મળ્યો છે. અમદાવાદ ગ્રામ્ય વિસ્તારમાં અત્યાર સુધીમાં 2,091 ફાળવાયેલા પ્રવેશમાંથી 1,899 પ્રવેશ કન્ફર્મ થયા છે. જ્યારે અમદાવાદ શહેર (કોર્પોરેશન વિસ્તાર)માં 14,579 ફાળવાયેલા પ્રવેશમાંથી 13,660 વિદ્યાર્થીઓના પ્રવેશ કન્ફર્મ થઈ ચૂક્યા છે. રાજ્યભરમાં કુલ 83,687 ઉપલબ્ધ બેઠકો સામે અત્યાર સુધીમાં 77,425 બેઠકો ભરાઈ ગઈ છે.
આ પણ વાંચો: મોરબી-હળવદ હાઈવે પર ચિચિયારીઓ ગુંજી: ડમ્પર સાથે કારની ભયાનક ટક્કરમાં 5 યુવાનોના મોત, 2ની હાલત ગંભીર
વાલીઓ માટે મહત્વની સૂચના
શિક્ષણ વિભાગે વાલીઓને સમયમર્યાદા દરમિયાન પોતાની પસંદગી પૂર્ણ કરવાની અપીલ કરી છે. જે વાલીઓ ત્રીજા રાઉન્ડમાં ભાગ લેવા પાત્ર છે તેમણે RTE પોર્ટલ પર જઈને શાળાઓની પસંદગી કરવી જરૂરી છે. નિયત સમય બાદ કોઈ નવી પસંદગી અથવા ફેરફાર શક્ય રહેશે નહીં. RTE હેઠળ મફત અને ગુણવત્તાયુક્ત શિક્ષણ મેળવવાની આ મહત્વપૂર્ણ તક હોવાથી વાલીઓએ સમયસર કાર્યવાહી કરીને પોતાના બાળકોના ભવિષ્ય માટે યોગ્ય શાળાની પસંદગી કરવી જોઈએ.
