દક્ષિણ ગુજરાતમાં મેઘતાંડવ: વાંસદામાં સૌથી વધુ 5 ઇંચ વરસાદ, વલસાડમાં ડૂબી જવાથી વૃદ્ધનું મોત

રાજ્યમાં ચોમાસાની સિસ્ટમ સક્રિય થતાં જ દક્ષિણ ગુજરાત સહિત સમગ્ર રાજ્યભરમાં વરસાદી માહોલ જામ્યો છે. સાંજના 6 વાગ્યા સુધીમાં રાજ્યના કુલ 145 તાલુકાઓમાં વરસાદ નોંધાયો છે, જેમાં નવસારીના વાંસદામાં સૌથી વધુ 5 ઇંચ વરસાદ ખાબક્યો છે. ભારે વરસાદને કારણે નવસારીની કાવેરી નદી બે કાંઠે વહેતી થતાં ચીખલીનું પ્રખ્યાત તડકેશ્વર મહાદેવ મંદિર પાણીમાં જળમગ્ન થયું છે. બીજી તરફ, વલસાડના માલવણ ગામે તળાવમાં ડૂબી જવાથી એક વૃદ્ધ માછીમારનું દુઃખદ મોત નીપજ્યું છે. દરિયામાં કરંટ અને ભારે પવનની શક્યતાને પગલે સુરક્ષા ખાતર માંગરોળ અને જાફરાબાદ બંદર પર 3 નંબરનું સિગ્નલ લગાડી દેવામાં આવ્યું છે.