Gujarat Heatwave Weather Forecast: ગુજરાતમાં ઉનાળાનો પ્રકોપ હવે આકરો બની રહ્યો છે, અને હવામાન વિભાગ દ્વારા રાજ્યના અનેક જિલ્લાઓમાં હિટવેવની ગંભીર આગાહી કરવામાં આવી છે. રાજ્યમાં તાપમાનનો પારો સતત ઊંચે જઈ રહ્યો છે, જેના કારણે જનજીવન પ્રભાવિત થયું છે. ખાસ કરીને ઉત્તર ગુજરાત, સૌરાષ્ટ્ર અને કચ્છના વિસ્તારોમાં સૂર્યનારાયણ આકરા પાણીએ જોવા મળી રહ્યા છે. હવામાન વિભાગના ડાયરેક્ટર એ.કે. દાસના જણાવ્યા અનુસાર, આગામી દિવસોમાં ગરમીનું જોર હજુ વધવાની શક્યતા છે, જેને ધ્યાનમાં રાખીને વહીવટી તંત્ર અને આરોગ્ય વિભાગ દ્વારા પણ સાવચેતીના પગલાં લેવાની અપીલ કરવામાં આવી છે. ખાસ કરીને 10થી 16 માર્ચના રોજ ઉત્તર ગુજરાત, સૌરાષ્ટ્ર અને કચ્છના અનેક જિલ્લાઓમાં 'ઓરેન્જ એલર્ટ' જાહેર કરવામાં આવ્યું છે.
અમદાવાદ સહિત રાજ્યના મુખ્ય શહેરોમાં ગરમીની લહેર (હિટવેવ) શરૂ થઈ ગઈ છે. હવામાન વિભાગના પૂર્વાનુમાન મુજબ, રાજ્યના સરેરાશ તાપમાનમાં હજુ પણ વધારો થઈ શકે છે, જે 41 ડિગ્રી કે તેથી વધુ રહેવાનું અનુમાન છે. ગરમીના આ વધતા પારાને કારણે બપોરના સમયે રસ્તાઓ પર કર્ફ્યુ જેવો માહોલ જોવા મળી રહ્યો છે. વધતી ગરમીને જોતા તંત્ર દ્વારા વિવિધ જિલ્લાઓ માટે કલર કોડ જાહેર કરવામાં આવ્યા છે, જેથી નાગરિકો ગરમીથી બચવા માટે જરૂરી તકેદારી રાખી શકે.
અમદાવાદમાં ગરમીનો પ્રકોપ: આજે ઓરેન્જ અને આવતીકાલે યલો એલર્ટ
રાજ્યના આર્થિક પાટનગર અમદાવાદમાં ગરમીએ માઝા મૂકી છે. હવામાન વિભાગે આજે અમદાવાદ માટે 'ઓરેન્જ એલર્ટ' જાહેર કર્યું છે, જેનો અર્થ છે કે, ગરમીનું પ્રમાણ અત્યંત આકરું રહેશે અને હિટવેવની સીધી અસર જોવા મળશે. શહેરમાં તાપમાન 41 ડિગ્રીની આસપાસ નોંધાવાની શક્યતા છે. જોકે, આવતીકાલે ગરમીમાં આંશિક રાહતની આશા સાથે 'યલો એલર્ટ' આપવામાં આવ્યું છે. નાગરિકોને બપોરે 12 થી 4 વાગ્યા દરમિયાન બિનજરૂરી બહાર ન નીકળવા સલાહ અપાઈ છે.
કચ્છ-સૌરાષ્ટ્ર અને ઉત્તર ગુજરાતના 9 જિલ્લામાં 'ઓરેન્જ એલર્ટ'
હવામાન વિભાગે રાજ્યના 9 જિલ્લાઓમાં ગંભીર હિટવેવની આગાહી સાથે ઓરેન્જ એલર્ટ જારી કર્યું છે. જેમાં કચ્છ, બનાસકાંઠા, પાટણ, મોરબી, સુરેન્દ્રનગર, રાજકોટ, જૂનાગઢ, અમદાવાદ અને ગાંધીનગરનો સમાવેશ થાય છે. આ વિસ્તારોમાં ગરમ પવનો ફૂંકાવાની સાથે લૂ લાગવાની શક્યતા વધુ છે. ખાસ કરીને ખેતીકામ કરતા લોકો અને શ્રમિકોને ગરમીથી બચવા માટે વિશેષ સાવચેતી રાખવા જણાવાયું છે.
મધ્ય અને દક્ષિણ ગુજરાતમાં 'યલો એલર્ટ'ની સ્થિતિ
રાજ્યના અન્ય ભાગોમાં પણ ગરમીની વ્યાપક અસર જોવા મળશે. મહેસાણા, સાબરકાંઠા, ખેડા, આણંદ, વડોદરા, ભરૂચ, સુરત, ભાવનગર, બોટાદ, અમરેલી, ગીર સોમનાથ અને કેન્દ્રશાસિત પ્રદેશ દીવમાં 'યલો એલર્ટ' જાહેર કરવામાં આવ્યું છે. આ જિલ્લાઓમાં ગરમીનું પ્રમાણ સામાન્ય કરતા વધુ રહેશે, પરંતુ ઓરેન્જ એલર્ટ ધરાવતા જિલ્લાઓ કરતા તીવ્રતા થોડી ઓછી રહેશે.
ગરમીના રેકોર્ડબ્રેક આંકડા
રાજ્યમાં હાલમાં જે તાપમાન નોંધાઈ રહ્યું છે તે ખરેખર ચિંતાજનક છે, કારણ કે તે સામાન્ય કરતા ઘણું વધારે છે. રાજકોટ અને સુરેન્દ્રનગરમાં તાપમાનનો પારો 40.6°C એ પહોંચ્યો છે, જે સરેરાશ તાપમાન કરતા અંદાજે 7 ડિગ્રીથી પણ વધુ છે. અમદાવાદમાં પણ 41.2°C અને ગાંધીનગરમાં 40.6°C તાપમાન નોંધાયું છે. આ આંકડાઓ દર્શાવે છે કે, માર્ચ મહિનાની શરૂઆતમાં જ રાજ્યમાં મે મહિના જેવી કાળઝાળ ગરમીનો અનુભવ થઈ રહ્યો છે.
હવામાન વિભાગનું અનુમાન: 41 ડિગ્રીને પાર જશે પારો
હવામાનની તકનીકી સ્થિતિ વિશે વાત કરતા એ.કે. દાસે જણાવ્યું કે, હાલમાં પવનની દિશા ઉત્તર-પશ્ચિમથી ઉત્તર તરફની છે અને પવનની ગતિ 15 થી 20 નોટ્સની આસપાસ છે. આ ગરમ પવનોને કારણે વાતાવરણમાં ભેજનું પ્રમાણ ઘટશે, પરંતુ દરિયાકાંઠાના વિસ્તારોમાં 'હોટ એન્ડ હ્યુમિડ' એટલે કે ગરમ અને ભેજવાળા વાતાવરણને કારણે અસહ્ય બફારો અનુભવાશે. રાહતની વાત એ છે કે, આ આકરી સ્થિતિ આગામી ત્રણ દિવસ સુધી યથાવત રહ્યા બાદ તાપમાનમાં 2 થી 4 ડિગ્રીનો ઘટાડો થવાની સંભાવના છે, જે નાગરિકોને થોડી રાહત આપી શકે છે.
