Gandhinagar News: ગાંધીનગર ખાતે મુખ્યમંત્રી ભૂપેન્દ્રભાઈ પટેલની અધ્યક્ષતામાં રાજ્ય મંત્રીમંડળની મહત્વપૂર્ણ બેઠક મળી હતી. બેઠકમાં સમગ્ર ગુજરાતમાં પ્રવર્તી રહેલી વરસાદી પરિસ્થિતિની સર્વગ્રાહી સમીક્ષા કરવામાં આવી હતી. રાજ્યના વિવિધ જિલ્લાઓમાં પડેલા ભારે વરસાદ, નદી-નાળાઓની સ્થિતિ, રાહત અને બચાવ કામગીરી તેમજ વહીવટી તંત્રની તૈયારીઓ અંગે વિસ્તૃત ચર્ચા કરવામાં આવી હોવાનું રાજ્ય સરકારના પ્રવક્તા મંત્રી જીતુભાઈ વાઘાણીએ જણાવ્યું હતું. પ્રવક્તા મંત્રીએ જણાવ્યું કે, વરસાદથી અસરગ્રસ્ત વિસ્તારોની વાસ્તવિક સ્થિતિનો તાગ મેળવવા અને રાહત-બચાવ કામગીરીનું સ્થળ પર જઈને નિરીક્ષણ કરવા માટે મુખ્યમંત્રી ભૂપેન્દ્રભાઈ પટેલ આવતીકાલે સુરત અને વલસાડ જિલ્લાની મુલાકાત લેશે. આ દરમિયાન તેઓ સ્થાનિક વહીવટી તંત્ર સાથે બેઠક કરી હાલની પરિસ્થિતિની સમીક્ષા કરશે તેમજ અસરગ્રસ્ત નાગરિકોની સ્થિતિ અંગે પણ માહિતી મેળવશે.
અસરગ્રસ્ત જિલ્લાઓમાં મંત્રીઓને મેદાનમાં ઉતરવાનો આદેશ
રાજ્યના તમામ વરસાદગ્રસ્ત જિલ્લાઓમાં સ્થાનિક મંત્રી તેમજ પ્રભારી મંત્રીઓને તાત્કાલિક સ્થળ મુલાકાત લેવા માટે મુખ્યમંત્રી દ્વારા સૂચના આપવામાં આવી છે. મંત્રીઓને પોતાના જિલ્લામાં ચાલી રહેલી રાહત અને બચાવ કામગીરી, આશ્રય વ્યવસ્થા, માર્ગ વ્યવહાર, વીજ પુરવઠો અને અન્ય આવશ્યક સેવાઓની વ્યક્તિગત રીતે સમીક્ષા કરવાનો આદેશ આપવામાં આવ્યો છે. સાથે જ જિલ્લા વહીવટી તંત્ર આપત્તિ વ્યવસ્થાપન માટે સંપૂર્ણ સજ્જ રહે અને કોઈ પણ પ્રકારની આપત્તિમાં ઝડપી પ્રતિસાદ આપી શકે તે માટે પણ મુખ્યમંત્રીએ ખાસ ભાર મૂક્યો હતો. રાજ્ય સરકાર દ્વારા સતત પરિસ્થિતિ પર નજર રાખવામાં આવી રહી છે અને જરૂરિયાત મુજબ તાત્કાલિક પગલાં ભરવામાં આવશે.
ગુજરાતમાં આવશે નવી EV ચાર્જિંગ સ્ટેશન પોલિસી
મંત્રીમંડળની બેઠકમાં પર્યાવરણ અને ગ્રીન ટ્રાન્સપોર્ટને પ્રોત્સાહન આપતા મહત્વના મુદ્દા પર પણ ચર્ચા કરવામાં આવી હતી. મુખ્યમંત્રીશ્રીએ રાજ્યમાં ઇલેક્ટ્રિક વાહનોના ઉપયોગને વધુ વેગ આપવા માટે સુદ્રઢ અને સર્વગ્રાહી EV ચાર્જિંગ સ્ટેશન પોલિસી તૈયાર કરવાની સૂચના સંબંધિત વિભાગોને આપી છે. નવી પોલિસીનો મુખ્ય હેતુ સમગ્ર ગુજરાતમાં EV ચાર્જિંગનું મજબૂત નેટવર્ક ઊભું કરવાનો છે, જેથી ઇલેક્ટ્રિક વાહનચાલકોને સરળતાથી ચાર્જિંગ સુવિધા ઉપલબ્ધ થઈ શકે. આ ઉપરાંત ગ્રીન એનર્જીનો ઉપયોગ વધે, પ્રદૂષણમાં ઘટાડો થાય અને રાજ્યમાં સ્વચ્છ પરિવહન વ્યવસ્થાને વધુ પ્રોત્સાહન મળે તે દિશામાં પણ આ નીતિ મહત્વપૂર્ણ સાબિત થવાની અપેક્ષા છે.
ભારે વરસાદમાં જીવ ગુમાવનારને શ્રદ્ધાંજલિ
મંત્રીમંડળની બેઠક દરમિયાન રાજ્યમાં ભારે વરસાદની પરિસ્થિતિ દરમિયાન દીવાલ ધરાશાયી થવી, વૃક્ષ પડવું અને વીજળી પડવા જેવી વિવિધ ઘટનાઓમાં અકાળે મૃત્યુ પામેલા 11 નાગરિકોને મુખ્યમંત્રી સહિત સમગ્ર મંત્રીમંડળ દ્વારા ભાવપૂર્ણ શ્રદ્ધાંજલિ અર્પણ કરવામાં આવી હતી. મંત્રીમંડળે દિવંગત આત્માઓને શાંતિ મળે તેવી પ્રાર્થના કરી હતી તેમજ તેમના પરિવારજનો પ્રત્યે સંવેદના વ્યક્ત કરી હતી. સાથે જ વરસાદી પરિસ્થિતિમાં નાગરિકોને સાવચેતી રાખવા અને વહીવટી તંત્ર દ્વારા જારી કરવામાં આવતી સૂચનાઓનું પાલન કરવા પણ અપીલ કરવામાં આવી છે.
સતત મોનિટરિંગ માટે વિભાગોને એલર્ટ રહેવા સૂચના
મંત્રીમંડળની બેઠકમાં મુખ્યમંત્રીશ્રીએ ભારપૂર્વક જણાવ્યું હતું કે વરસાદી પરિસ્થિતિને ધ્યાનમાં રાખીને રાજ્યના તમામ સંબંધિત વિભાગો વચ્ચે સતત સંકલન જળવાઈ રહે તે જરૂરી છે. ખાસ કરીને જિલ્લા વહીવટી તંત્ર, રાજ્ય આપત્તિ વ્યવસ્થાપન તંત્ર, આરોગ્ય વિભાગ, વીજ કંપનીઓ અને માર્ગ-મકાન વિભાગને 24 કલાક એલર્ટ મોડમાં રહી કામગીરી કરવાની સૂચના આપવામાં આવી છે. જ્યાં પણ તાત્કાલિક રાહત અથવા પુનઃસ્થાપનની જરૂરિયાત ઊભી થાય ત્યાં વિલંબ વિના કાર્યવાહી કરવા પર પણ ભાર મૂકવામાં આવ્યો હતો.
વરસાદી સિઝનમાં નાગરિકોને સાવચેતી રાખવાની અપીલ
રાજ્ય સરકારે નાગરિકોને પણ વરસાદી માહોલ દરમિયાન જરૂરી સાવચેતી રાખવા અનુરોધ કર્યો છે. ભારે વરસાદ દરમિયાન નીચાણવાળા વિસ્તારોમાં અવરજવર ટાળવી, નદી-નાળાઓ અને જળાશયોની નજીક ન જવું તેમજ હવામાન વિભાગ અને સ્થાનિક તંત્ર દ્વારા જારી કરવામાં આવતી ચેતવણીઓનું પાલન કરવાની અપીલ કરવામાં આવી છે. સરકારનું કહેવું છે કે વહીવટી તંત્ર સતત પરિસ્થિતિ પર નજર રાખી રહ્યું છે અને જરૂરિયાત મુજબ તાત્કાલિક સહાય પહોંચાડવા માટે તમામ વ્યવસ્થાઓ સજ્જ રાખવામાં આવી છે.
