મધ્ય પૂર્વમાં ચાલી રહેલા ભીષણ જંગ અને ઈરાન દ્વારા તેલના ભાવ 200 ડોલર સુધી લઈ જવાની ધમકી છતાં આશ્ચર્યજનક રીતે સોનાના ભાવમાં ઘટાડો જોવા મળી રહ્યો છે. સામાન્ય રીતે જ્યારે પણ વૈશ્વિક સ્તરે તણાવ વધે છે, ત્યારે સોનાના ભાવમાં ઉછાળો આવતો હોય છે, પરંતુ આ વખતે બજારમાં ઉલટી ગંગા વહી રહી છે. ચાલો સમજીએ કે આ પાછળનું ટેકનિકલ કારણ શું છે અને શું અત્યારે સોનું ખરીદવું ફાયદાકારક રહેશે.
યુદ્ધ છતાં સોનું કેમ સસ્તું થઈ રહ્યું છે?
સોનાને સુરક્ષિત રોકાણ (Safe Haven) માનવામાં આવે છે, પરંતુ આ વખતે અમેરિકી ડોલરની મજબૂતીએ ખેલ બગાડ્યો છે. ઈરાન-ઈઝરાયેલ સંઘર્ષને કારણે ક્રૂડ ઓઈલ 100 ડોલરને પાર કરી ગયું છે, જેનાથી અમેરિકામાં મોંઘવારી વધવાનો ડર પેદા થયો છે. Goldman Sachs ના રિપોર્ટ મુજબ, વધતી મોંઘવારીને રોકવા માટે અમેરિકી સેન્ટ્રલ બેંક Fed સપ્ટેમ્બર પહેલા વ્યાજદરમાં કોઈ ઘટાડો નહીં કરે. જ્યારે વ્યાજદરો ઊંચા રહે છે ત્યારે ડોલર વધુ મજબૂત બને છે, જે આંતરરાષ્ટ્રીય સ્તરે સોનાના ભાવને નીચે ખેંચે છે.
ભારતીય બજારમાં સોના અને ચાંદીના લેટેસ્ટ ભાવ
ભારતમાં સોનાના ભાવમાં નોંધપાત્ર ઘટાડો જોવા મળ્યો છે. આજે દિલ્હીમાં 24 કેરેટ સોનાનો ભાવ 16,347 રૂપિયા પ્રતિ ગ્રામ પર પહોંચ્યો છે.
MCX ગોલ્ડ ફ્યુચર્સ: આજે સોનું ₹283 ઘટીને 1,61,506 રૂપિયા પ્રતિ 10 ગ્રામ પર આવી ગયું છે.
ચાંદીના ભાવ: ચાંદીમાં પણ ₹1,991 નો તોતિંગ ઘટાડો નોંધાયો છે, જે હવે 2,66,500 રૂપિયા પ્રતિ કિલો પર ટ્રેડ કરી રહી છે.
શું અત્યારે સોનું ખરીદવું જોઈએ?
રોકાણકારો માટે અત્યારે મિશ્ર સંકેતો છે. જો યુદ્ધ લાંબુ ખેંચાય અને સ્ટ્રેટ ઓફ હોર્મુઝ (Strait of Hormuz) બંધ થાય, તો તેલ અને મોંઘવારી બેકાબૂ બનશે, જે ફરીથી સોનાની માંગમાં વધારો કરી શકે છે. ઉપરાંત, ભારતમાં લગ્નની સીઝન નજીક હોવાથી સ્થાનિક બજારમાં માંગ વધવાની પૂરેપૂરી શક્યતા છે. રૂપિયો નબળો પડવાને કારણે વિદેશમાં સોનું સસ્તું હોવા છતાં ભારતમાં તેની કિંમતો બહુ ઘટે તેવી શક્યતા ઓછી છે.
નિષ્ણાતોની સલાહ
બજારના નિષ્ણાતો માને છે કે જો તમે લાંબા ગાળા માટે રોકાણ કરવા માંગતા હોવ, તો કિંમતોમાં જોવા મળતો આ ઘટાડો એક સુવર્ણ તક છે. જોકે, નિષ્ણાતો એકસાથે મોટી રકમ રોકવાને બદલે થોડું-થોડું કરીને ખરીદવાની સલાહ આપે છે. ટૂંકા ગાળાના નફા માટે રોકાણ કરનારાઓએ શુક્રવારે જાહેર થનારા PCE ડેટા અને Fed ના આગામી સંકેતોની રાહ જોવી જોઈએ.
