Adani Group ના ચેરમેન ગૌતમ અદાણીએ આર્ટિફિશિયલ ઈન્ટેલિજન્સ (AI)ના યુગમાં ભારતની તૈયારી અને વૈશ્વિક શક્તિ સંતુલન અંગે પોતાનું મહત્વપૂર્ણ વિઝન રજૂ કર્યું છે. નવી દિલ્હીમાં યોજાયેલા CII Annual Business Summit 2026 ના સ્પેશિયલ પ્લેનરી સેશનને સંબોધતા તેમણે કહ્યું કે આગામી સદીમાં વિશ્વનું નેતૃત્વ તે દેશો કરશે જે ઊર્જા અને કમ્પ્યુટિંગ બંને પર મજબૂત નિયંત્રણ સ્થાપિત કરશે.
ગૌતમ અદાણીએ કહ્યું કે, “જે દેશ પોતાની ઊર્જા પર નિયંત્રણ રાખશે તે પોતાના ઔદ્યોગિક ભવિષ્યને આગળ ધપાવશે. જે દેશ કમ્પ્યુટિંગ અને ટેક્નોલોજી પર કાબૂ રાખશે તે AI અને ઇન્ટેલિજન્સના ભવિષ્યને દિશા આપશે. અને જે દેશ આ બંને પર મજબૂત પકડ બનાવશે તે જ આવનારી સદીનું સ્વરૂપ નક્કી કરશે.” તેમણે આ સ્થિતિને “નવી શક્તિની જ્યોમેટ્રી” તરીકે વર્ણવી હતી.
‘એનર્જી વગર AI શક્ય નથી’
ગૌતમ અદાણીએ ભારપૂર્વક જણાવ્યું કે AI નો વિકાસ માત્ર સોફ્ટવેર કે ડેટા સુધી મર્યાદિત નથી, પરંતુ તેના પાયામાં વિશાળ ઊર્જા અને કમ્પ્યુટિંગ ઈન્ફ્રાસ્ટ્રક્ચર જરૂરી છે. તેમણે કહ્યું કે, “ઊર્જા વગર કમ્પ્યુટિંગ શક્ય નથી અને કમ્પ્યુટિંગ વગર ડેટા સેન્ટર્સ ચલાવી શકાય નહીં. એટલે એનર્જી વગર AI ની કલ્પના પણ શક્ય નથી.”
તેમણે જણાવ્યું કે અદાણી ગ્રુપ હાલમાં એવા “ફિઝિકલ ફાઉન્ડેશન્સ” બનાવી રહ્યું છે જેના પર ભારતનું ડિજિટલ ભવિષ્ય ઉભું રહેશે. AI ઈકોનોમીની પ્રથમ અને સૌથી મહત્વપૂર્ણ પરત ‘પાવર લેયર’ હોવાનું તેમણે જણાવ્યું. વિશ્વસનીય અને સસ્તી વીજળી વગર પ્રોસેસિંગ, ક્લાઉડ નેટવર્કિંગ અને AI આધારિત સિસ્ટમોનું સંચાલન મુશ્કેલ બની શકે છે.
LPG સિલિન્ડર ડિલિવરીમાં મોટો ફેરફાર: કંપનીઓએ જાહેર કર્યું એલર્ટ
ખાવડાનો મેગા પ્રોજેક્ટ બદલશે ભારતનું એનર્જી મેપ
ગૌતમ અદાણીએ ગુજરાતના ખાવડા વિસ્તારમાં વિકસાવવામાં આવી રહેલા વિશ્વના સૌથી મોટા સિંગલ-સાઈટ રિન્યુએબલ એનર્જી પ્રોજેક્ટનો પણ ઉલ્લેખ કર્યો. તેમના જણાવ્યા અનુસાર 30 ગીગાવોટ ક્ષમતાવાળા આ પ્રોજેક્ટનું લગભગ 35 ટકા કામ પૂર્ણ થઈ ચૂક્યું છે.
આ પ્રોજેક્ટ ભારતના ઊર્જા ક્ષેત્રમાં ઐતિહાસિક ફેરફાર લાવી શકે છે. સોલાર અને વિન્ડ એનર્જીના મોટા સ્તરે ઉત્પાદન દ્વારા દેશની ઊર્જા સુરક્ષા મજબૂત થશે અને AI તેમજ ડેટા આધારિત અર્થતંત્રને લાંબા ગાળે સપોર્ટ મળશે.
“ક્ષમતા નિર્માણમાં વિલંબની કિંમત ભારે પડે છે”
ગૌતમ અદાણીએ પોતાના સંબોધનમાં રાષ્ટ્રોની વ્યૂહાત્મક તૈયારી પર પણ ભાર મૂક્યો હતો. તેમણે કહ્યું કે જે દેશ શાંતિના સમયમાં પોતાની ક્ષમતાઓ મજબૂત બનાવતો નથી તેને સંકટના સમયમાં ભારે કિંમત ચૂકવવી પડે છે.
તેમણે ઊર્જા અને ઇન્ટેલિજન્સને માત્ર આર્થિક મુદ્દા નહીં પરંતુ રાષ્ટ્રીય પ્રાથમિકતા ગણાવી હતી. તેમના જણાવ્યા પ્રમાણે આગામી દાયકાઓમાં દેશોની સ્પર્ધા માત્ર સૈન્ય શક્તિ કે ઉત્પાદન ક્ષમતાથી નહીં પરંતુ ઊર્જા, ડેટા અને AI ઈન્ફ્રાસ્ટ્રક્ચર પર આધારિત રહેશે.
UPIને લઈને પણ કર્યું મોટું નિવેદન
AI સિવાય ગૌતમ અદાણીએ ભારતની ડિજિટલ અર્થવ્યવસ્થા અને UPI ની સફળતા પર પણ પોતાના વિચારો રજૂ કર્યા હતા. તેમણે કહ્યું કે UPI માત્ર એક પેમેન્ટ સિસ્ટમ નથી પરંતુ તેણે સામાન્ય ભારતીયોના હાથમાં “વિશ્વાસ” સોંપ્યો છે.
તેમના જણાવ્યા અનુસાર UPI એ રસ્તા પર વેપાર કરતા નાના વેપારીઓને ડિજિટલ રીતે દૃશ્યમાન બનાવ્યા છે અને મોબાઈલ ફોનને માત્ર સંચારનું સાધન નહીં પરંતુ આર્થિક સશક્તિકરણનું સાધન બનાવી દીધું છે.
સોમનાથ અમૃત પર્વે દેશને મળ્યો વિશેષ સ્મારક સિક્કો: જાણો તેની ખાસિયતો
ભારત હવે ‘કમ્પાઉન્ડિંગ એક્સિલરેશન’ના યુગમાં
ભારતની આર્થિક વૃદ્ધિ અંગે ગૌતમ અદાણીએ કહ્યું કે દેશ હવે ધીમે ધીમે આગળ વધવાની જગ્યાએ “કમ્પાઉન્ડિંગ એક્સિલરેશન”ના તબક્કામાં પ્રવેશી ગયો છે. તેમણે યાદ અપાવ્યું કે ભારતને 2 ટ્રિલિયન ડોલરની અર્થવ્યવસ્થા બનવામાં 67 વર્ષ લાગ્યા હતા, જ્યારે આગામી 2 ટ્રિલિયન ડોલર માત્ર 12 વર્ષમાં ઉમેરાયા.
તેમણે કહ્યું કે ભારતની વિકાસયાત્રા અમેરિકા અથવા ચીન જેવી નહીં હોય, કારણ કે ભારત પાસે પહેલેથી જ વિશાળ સ્થાનિક માંગ અને યુવા ડિજિટલ જનસંખ્યા જેવી અનોખી તાકાતો છે.
