વડોદરા શહેરના માંજલપુર વિસ્તારમાં તુલસીધામ સર્કલ નજીક આવેલા એસ.એસ.નગરના ખુલ્લા મેદાનમાં એક પૂર્વ સૈનિકે હવામાં ગોળી ચલાવ્યાની ઘટના સામે આવી છે. બનાવનો વીડિયો સોશિયલ મીડિયામાં ઝડપથી ફેલાતા લોકોમાં ચિંતા અને ચર્ચાનો માહોલ સર્જાયો હતો. મામલો જાહેર થતા જ માંજલપુર પોલીસે તાત્કાલિક તપાસ શરૂ કરી કાર્યવાહી હાથ ધરી હતી.
પૂર્વ સૈનિક દ્વારા હવામાં ફાયરિંગ
પોલીસ દ્વારા કરવામાં આવેલી પ્રાથમિક તપાસમાં ગોળીબાર કરનાર વ્યક્તિની ઓળખ નિલેશ તુકારામ ઉત્તેકર (ઉંમર 45) તરીકે થઈ છે. તે માંજલપુર વિસ્તારમાં જ રહે છે અને પૂર્વ સૈનિક હોવાનું સામે આવ્યું છે. માહિતી મુજબ, તેણે પોતાના લાયસન્સવાળા હથિયારથી હવામાં એક બ્લેન્ક રાઉન્ડ ફાયર કર્યો હતો. ઘટના સમયે આસપાસ લોકોની હાજરી હોવાને કારણે આ કૃત્યને ગંભીર માનવામાં આવી રહ્યું છે.
પોલીસ એક્શનમાં
ભલે આરોપી પાસે કાયદેસર હથિયાર પરવાનો હોય, છતાં જાહેર સ્થળે ફાયરિંગ કરવું કાયદેસર ગણાતું નથી. પોલીસે જાહેરનામાનો ભંગ અને જાહેર સુરક્ષાને જોખમમાં મૂકવાના મુદ્દે ગુનો નોંધી વધુ તપાસ શરૂ કરી છે. જાણવા મળ્યું છે કે આરોપી ફાયરિંગની પ્રેક્ટિસ કરી રહ્યો હતો અને એ દરમિયાન કોઈએ તેનો વીડિયો બનાવી સોશિયલ મીડિયા પર મૂક્યો હતો. આ ઘટનાએ શહેરમાં કાયદો અને વ્યવસ્થા અંગે ચર્ચા જગાવી છે. પોલીસે સ્પષ્ટ કર્યું છે કે લાયસન્સ હોવા છતાં નિયમોનો ભંગ સહન કરવામાં નહીં આવે. હાલ સમગ્ર મામલે આગળની કાનૂની કાર્યવાહી ચાલી રહી છે.
