50 દિવસમાં યુદ્ધનો અંત લાવો : નહીંતર 100% ટેરિફ લાદીશું, ટ્રમ્પે પુતિનને આપી ધમકી

યુએસ પ્રમુખ ડોનાલ્ડ ટ્રમ્પે પુતિનને ધમકી આપી છે કે જો 50 દિવસમાં યુક્રેનમાં યુદ્ધ સમાપ્ત કરવા માટે કોઈ કરાર નહીં થાય તો તેઓ રશિયા પર 100 ટકા ટેરિફ લાદશે. યુએસ પ્રમુખે યુક્રેનને વધુ શસ્ત્રો મોકલવા માટે નાટો સાથી દેશો સાથે કરારોની પણ જાહેરાત કરી છે. સોમવારે નાટો સેક્રેટરી જનરલ માર્ક રુટ સાથે ઓવલ ઓફિસમાં મળેલી બેઠક દરમિયાન, યુએસ પ્રમુખે કહ્યું કે તેઓ રશિયા-યુક્રેન યુદ્ધ સમાપ્ત કરવા માટેના કરાર તરફ પ્રગતિ ન કરવા બદલ રશિયાથી નાખુશ છે.

યુએસ યુક્રેનને વધુ શસ્ત્રો મોકલશે
ભારત અને પાકિસ્તાન, રવાન્ડા અને ડેમોક્રેટિક રિપબ્લિક ઓફ કોંગો વચ્ચેના સંઘર્ષોનો ઉલ્લેખ કરતા ટ્રમ્પે દાવો કર્યો, "અમે વેપાર દ્વારા યુદ્ધો ઉકેલવામાં ખૂબ સફળ રહ્યા છીએ." સોમવારે વ્હાઇટ હાઉસ ખાતે મળેલી બેઠક દરમિયાન ટ્રમ્પે યુક્રેનને શસ્ત્રો મોકલવાની યોજનાની પણ પુષ્ટિ કરી. જેમાં પેટ્રિઓટ મિસાઇલ સિસ્ટમનો સમાવેશ થાય છે. રાષ્ટ્રપતિએ કહ્યું કે નાટો સાથી દેશો યુએસ પાસેથી અબજો ડોલરના લશ્કરી સાધનો ખરીદશે અને તે યુક્રેનને પહોંચાડવામાં આવશે. ટ્રમ્પે કહ્યું, "મેં જર્મની અને મોટાભાગના મુખ્ય નાટો દેશો સાથે વાત કરી છે અને તેઓ તેના વિશે ખૂબ જ ઉત્સાહિત છે."

યુક્રેનને અત્યાધુનિક શસ્ત્રો આપવામાં આવ્યા છે
નાટોના સેક્રેટરી જનરલ માર્ક રૂટે જણાવ્યું હતું કે આ યુક્રેનને શસ્ત્રોનો "માત્ર પહેલો જથ્થો" હશે અને ભવિષ્યમાં વધુ શસ્ત્રો મોકલવામાં આવશે. રશિયન હવાઈ હુમલાઓ સામે યુક્રેનની સુરક્ષા માટે પેટ્રિઅટ ઇન્ટરસેપ્ટર મિસાઇલો ખૂબ જ મહત્વપૂર્ણ છે. આ યુએસ-નિર્મિત શસ્ત્ર યુક્રેનના શસ્ત્રાગારમાં એકમાત્ર મિસાઇલ છે જે રશિયન બેલિસ્ટિક મિસાઇલોને તોડી પાડવા સક્ષમ છે. રૂટે ભારપૂર્વક જણાવ્યું હતું કે યુક્રેન સાથેના શસ્ત્ર કરારમાં અમેરિકાના પોતાના ભંડારને પણ ધ્યાનમાં લેવામાં આવશે.