FasTag યુગનો અંત, હટી જશે ટોલ બેરિયર : 1 મેથી નવી ટોલ સિસ્ટમ થશે લાગુ? જાણો શું છે નવી સિસ્ટમ?

GPS Toll System: દેશમાં હાઈ-વે ટોલ કલેક્શન સિસ્ટમમાં મોટો ફેરફાર થવા જઈ રહ્યો છે. FASTag ને રિપ્લેસ કરવા જઈ રહી છે નવી સિસ્ટમ. કેન્દ્રીય મંત્રી નીતિન ગડકરીએ ફાસ્ટેગ અને ટોલ સિસ્ટમને લઈને એક મોટી જાહેરાત કરી છે, જે દેશના હાઈ-વે પર ટોલ વસૂલવાની રીતને સંપૂર્ણપણે બદલી શકે છે. નીતિન ગડકરીએ સોમવારે એક કાર્યક્રમ દરમિયાન જણાવ્યું હતું કે કેન્દ્ર સરકાર આગામી 15 દિવસમાં નવી ટોલ નીતિ લાવી રહી છે અને જ્યારે આ નીતિ લાગુ કરવામાં આવશે ત્યારે કોઈને ટોલ અંગે ફરિયાદ કરવાની જરૂર રહેશે નહીં. અત્યારે હું તેના વિશે વધુ કહીશ નહીં.

GPS આધારિત ટોલ સિસ્ટમ શરૂ કરવામાં આવશે
GPS આધારિત ટોલ સિસ્ટમમાં, ઓન-બોર્ડ યુનિટ (OBU) નામનું ડિવાઈસ વાહનોમાં સ્થાપિત કરવામાં આવશે જે હાલમાં ઉપયોગમાં લેવાતી FASTag સિસ્ટમને બદલશે. આ ડિવાઈસ GNSS એટલે કે ગ્લોબલ નેવિગેશન સેટેલાઇટ સિસ્ટમ ટેક્નોલોજી દ્વારા વાહનની હિલચાલને ટ્રેક કરશે. જ્યારે વાહન હાઇવે પર મુસાફરી કરે છે, ત્યારે તે મુસાફરી કરે છે તે અંતર OBU દ્વારા રેકોર્ડ કરવામાં આવશે. ટોલની રકમ તે મુજબ નક્કી કરવામાં આવશે અને તે ડ્રાઇવરના બેંક એકાઉન્ટ અથવા ડિજિટલ વૉલેટમાંથી સીધી જ કાપવામાં આવશે.

એટલે કે તમે હાઇવે પર ગમે તેટલી અંતરની મુસાફરી કરશો, તેટલો ટોલ તમારા ખાતામાંથી આપોઆપ કપાઈ જશે. ખાસ વાત એ છે કે લોકોને ટોલ પ્લાઝા પર રોકવાની જરૂર નહીં પડે. શરૂઆતમાં આ સિસ્ટમ ટ્રક અને બસ જેવા મોટા વાહનો પર લાગુ કરવામાં આવશે, પછી ધીમે ધીમે તે તમામ ખાનગી વાહનો અને કાર પર લાગુ કરવામાં આવશે. આ સિસ્ટમ ભારતના પોતાના સેટેલાઇટ NavIC પર ચાલશે, જેના કારણે ડેટા દેશમાં જ રહેશે અને સુરક્ષિત રહેશે.