Elon Musk : વિશ્વના સૌથી ધનિક વ્યક્તિ એલોન મસ્કે હવે બિઝનેસ જગતમાં એક નવો ઇતિહાસ રચી દીધો છે. અત્યાર સુધી દુનિયાએ ઘણા અબજોપતિઓ જોયા છે, પરંતુ 'ટ્રિલિયોનેર' એટલે કે ખરબપતિ બનવાની સિદ્ધિ ઇતિહાસમાં પહેલીવાર કોઈએ મેળવી છે અને તે વ્યક્તિ એલોન મસ્ક છે. વર્ષ 2026માં આ જાદુઈ આંકડાને સ્પર્શવામાં તેમની એરોસ્પેસ કંપની SpaceXનો સૌથી મહત્વનો ફાળો રહ્યો છે. SpaceXના શેરબજારમાં ધમાકેદાર લિસ્ટિંગની સાથે જ મસ્કની સંપત્તિમાં એટલો મોટો ઉછાળો આવ્યો કે તેમણે એક જ ઝટકામાં 13 લાખ કરોડ રૂપિયાથી વધુની કમાણી કરી લીધી હતી. આ અતુલ્ય સફળતાના શિખરે પહોંચીને મસ્કે તેમના જીવનના સૌથી મોટા સપના વિશે વાત કરી છે, જે મંગળ ગ્રહ પર માનવ વસાહત ઊભી કરવાનું છે.
SpaceX દ્વારા અબજોપતિમાંથી ખરબપતિ
એલોન મસ્કની સ્પેસ કંપની 'SpaceX' સત્તાવાર રીતે શેરબજારમાં લિસ્ટ થઈ ગઈ છે, અને આ એક જ ઘટનાએ મસ્કને દુનિયાના પહેલા ખરબપતિ બનાવી દીધા છે. શેરબજારમાં લિસ્ટિંગ થતાં પહેલાં જ એલોન મસ્ક આ ઐતિહાસિક સિદ્ધિથી માત્ર થોડા જ ડગલાં દૂર હતા. અહેવાલ મુજબ, SpaceXના શેર બજારમાં મુકાતાની સાથે જ વૈશ્વિક રોકાણકારો તેના પર તૂટી પડ્યા હતા. આના કારણે મસ્કની સંપત્તિમાં માત્ર એક જ દિવસમાં 139 અબજ ડોલર (આશરે 13.22 લાખ કરોડ રૂપિયાથી વધુ) નો અભૂતપૂર્વ વધારો થયો અને તેમની કુલ નેટવર્થ વધીને 1.11 ટ્રિલિયન ડોલર થઈ ગઈ.
બે દિવસમાં રેકોર્ડતોડ કમાણી
એલોન મસ્કે છેલ્લા બે દિવસમાં કરેલી કમાણીના આંકડા એટલા વિશાળ છે કે તે સામાન્ય માણસની કલ્પના બહાર છે. તેમણે માત્ર 48 કલાકની અંદર એટલી મોટી રકમ કમાઈ લીધી છે, જે વિશ્વના ટોચના અબજોપતિઓની યાદીમાં બીજા ક્રમે આવતા ગૂગલના કો-ફાઉન્ડર લેરી પેજની કુલ નેટવર્થ કરતાં પણ ઘણી વધારે છે. ગુરુવારે શેરબજારની તેજીના કારણે મસ્કની સંપત્તિમાં 24 કલાકમાં 274 અબજ ડોલરનો ઉછાળો આવ્યો હતો, જ્યારે શુક્રવારે તેમાં વધુ 139 અબજ ડોલર ઉમેરાયા હતા. આ હિસાબે તેમણે બે દિવસમાં કુલ 413 અબજ ડોલર છાપી લીધા છે, જેની સામે લેરી પેજની આખી જિંદગીની કુલ નેટવર્થ 306 અબજ ડોલર છે.
Bank Open Or Closed Today: આજે શનિવારે SBI, HDFC અને અન્ય બેંકો ખુલ્લી રહેશે કે બંધ? જુઓ RBIની હોલિડે લિસ્ટ
વિવિધ દેશોની જીડીપી સાથે સરખામણી
વર્ષ 2026માં અત્યાર સુધીમાં એલોન મસ્કની સંપત્તિમાં જે ઝડપે વધારો થયો છે તે વૈશ્વિક અર્થતંત્રના નિષ્ણાતોને પણ ચોંકાવી રહ્યો છે. આ ચાલુ વર્ષમાં જ તેમની નેટવર્થમાં 490 અબજ ડોલરનો જંગી વધારો નોંધાયો છે. આજે 1.11 ટ્રિલિયન ડોલરની સંપત્તિ સાથે એલોન મસ્ક એક વ્યક્તિ તરીકે વિશ્વના કેટલાય સમૃદ્ધ દેશો કરતાં પણ વધુ આર્થિક શક્તિ ધરાવે છે. તેમની વ્યક્તિગત દોલત હવે તાઇવાન (આશરે 976.7 અબજ ડોલર), આયર્લેન્ડ (આશરે 779 અબજ ડોલર) અને ઇઝરાયલ (આશરે 719 અબજ ડોલર) જેવા આખી દુનિયામાં આઇટી અને ટેક્નોલોજીના હબ ગણાતા દેશોની કુલ વાર્ષિક જીડીપી (GDP) કરતાં પણ ઘણી વધારે છે.
શેરબજારમાં SpaceXનું ધમાકેદાર ડેબ્યુ
SpaceXના IPO માટે રોકાણકારો લાંબા સમયથી આતુરતાપૂર્વક રાહ જોઈ રહ્યા હતા અને જ્યારે તે બજારમાં આવ્યો ત્યારે તેણે બધા રેકોર્ડ તોડી નાખ્યા. કંપની દ્વારા શેરનો પ્રાઇસ બેન્ડ 135 ડોલર નક્કી કરવામાં આવ્યો હતો, પરંતુ માર્કેટમાં તેની એન્ટ્રી 15 ડોલરના પ્રીમિયમ સાથે સીધી 150 ડોલર પર થઈ હતી. બજાર ખુલતાની સાથે જ શેરમાં ભારે ખરીદી જોવા મળી અને તે થોડી જ વારમાં વધીને 176.52 ડોલરના ઓલ-ટાઇમ હાઇ સ્તરે પહોંચી ગયો હતો. જોકે, દિવસના અંતે થોડી નફાખોરીને કારણે શેર સામાન્ય નીચે આવ્યો પરંતુ તેમ છતાં તે 25.95 ડોલરના મજબૂત ઉછાળા સાથે 160.95 ડોલર પર બંધ થવામાં સફળ રહ્યો હતો.
મંગળ ગ્રહ પર માનવ વસાહતનો ટાર્ગેટ
દુનિયાના સૌથી અમીર માણસ બન્યા પછી એલોન મસ્કે સ્પષ્ટ કર્યું છે કે SpaceXને પબ્લિક લિસ્ટેડ કંપની બનાવવાનો તેમનો હેતુ માત્ર પૈસા કમાવવાનો કે રોકેટ લોન્ચ કરવાનો નથી. આ કંપની પાછળ તેમનો પ્લાન ખૂબ લાંબાગાળાનો છે અને આ નવી મૂડીનો ઉપયોગ તેઓ અંતરિક્ષના મોટા પ્રોજેક્ટ્સ માટે ભંડોળ પૂરું પાડવા માટે કરશે. SpaceX અત્યારે પૃથ્વીની આસપાસ એક વિશાળ સેટેલાઇટ નેટવર્ક સ્થાપવા, સ્પેસ આધારિત ડેટા સેન્ટર ઇન્ફ્રાસ્ટ્રક્ચર તૈયાર કરવા અને આ બધી ટેક્નોલોજીની મદદથી આખરે મંગળ ગ્રહ પર મનુષ્યોની કાયમી વસાહત સ્થાપવાની મહત્વાકાંક્ષી યોજના પર ખૂબ ઝડપથી કામ કરી રહી છે.
મોંઘવારીનો ફરી મોટો ઝટકો!: મે મહિનામાં રિટેલ મોંઘવારી 3.93% પર પહોંચી, જાણો કઈ વસ્તુઓ થઈ વધુ મોંઘી
ચંદ્ર અને મંગળની સફર હવે વાસ્તવિકતા
સોશિયલ મીડિયા પ્લેટફોર્મ X પર શેર કરેલા એક ખાસ વિડિયો સંદેશમાં એલોન મસ્કે સમગ્ર વિશ્વને એક પ્રેરણાદાયી સંદેશ આપ્યો છે. તેમણે જણાવ્યું કે, SpaceXનો અસલી હેતુ અવકાશ પ્રવાસને સામાન્ય લોકો માટે સુલભ બનાવવાનો છે. અમે તે દરેક વ્યક્તિને સ્પેસમાં લઈ જવા માંગીએ છીએ જેઓ ચંદ્ર પર જવા માંગે છે, મંગળ ગ્રહ પર જવા માંગે છે અથવા આપણા સૌરમંડળના અન્ય કોઈ ગ્રહની મુલાકાત લેવા માંગે છે. મસ્કે ઉમેર્યું કે તેમને તેમની SpaceXની અદ્ભુત અને ટેલેન્ટેડ એન્જિનિયરોની ટીમ પર પૂરો ભરોસો છે અને આ ટીમ ટૂંક સમયમાં જ માનવજાતને મલ્ટી-પ્લેનેટરી સ્પીસિસ (બીજા ગ્રહ પર રહેતી પ્રજાતિ) બનાવીને જ રહેશે.
