ઠંડા દૂધના સ્વાસ્થ્ય લાભ: ભારતીય સંસ્કૃતિમાં દૂધને 'સંપૂર્ણ આહાર' માનવામાં આવે છે. પ્રોટીન, કેલ્શિયમ, મેગ્નેશિયમ, ઝીંક અને વિટામિન-ડી જેવા પોષક તત્વોથી ભરપૂર દૂધ સ્વાસ્થ્ય માટે વરદાન સમાન છે. મોટાભાગના લોકો રાત્રે ગરમ દૂધ પીવાનું પસંદ કરે છે, પરંતુ શું તમે જાણો છો કે ઠંડુ દૂધ પણ સ્વાસ્થ્ય માટે તેટલું જ, અને અમુક કિસ્સામાં તેનાથી પણ વધુ ફાયદાકારક સાબિત થઈ શકે છે?
ઘણીવાર વડીલો કહેતા હોય છે કે દૂધ ગરમ કરીને જ પીવું જોઈએ, પરંતુ આયુર્વેદ અને આધુનિક વિજ્ઞાન મુજબ ઠંડુ દૂધ પીવાના પોતાના આગવા ફાયદા છે. ખાસ કરીને ઉનાળાની ઋતુમાં અથવા જ્યારે તમને પેટમાં બળતરા થતી હોય ત્યારે ઠંડુ દૂધ એક જાદુઈ દવાની જેમ કામ કરે છે. તે માત્ર શરીરને હાઇડ્રેટ જ નથી રાખતું પણ ત્વચામાં કુદરતી ચમક લાવવામાં પણ મદદ કરે છે. ચાલો જાણીએ કે ઠંડુ દૂધ તમારા શરીર માટે કઈ રીતે રામબાણ ઈલાજ સાબિત થઈ શકે છે.
1. એસિડિટી અને પેટના અલ્સરમાં ત્વરિત રાહત
જો તમે વારંવાર એસિડિટી, છાતીમાં બળતરા અથવા એસિડ રિફ્લક્સની સમસ્યાથી પરેશાન હોવ, તો એક ગ્લાસ ઠંડુ દૂધ શ્રેષ્ઠ ઈલાજ છે. દૂધમાં રહેલું કેલ્શિયમ પેટમાં બનતા વધારાના એસિડને શોષી લે છે અને એસિડ જમા થતું અટકાવે છે. જે લોકોને વારંવાર અલ્સર થતા હોય તેમના માટે ઠંડુ દૂધ પેટના સ્તરમાં ઠંડક આપે છે અને દુખાવો ઘટાડે છે.
2. વજન ઘટાડવાની પ્રક્રિયામાં મદદરૂપ
ઘણા લોકો માને છે કે દૂધ પીવાથી વજન વધે છે, પરંતુ ઠંડુ દૂધ હકીકતમાં વજન ઘટાડવામાં મદદ કરી શકે છે. ઠંડા દૂધમાં રહેલું કેલ્શિયમ શરીરના મેટાબોલિઝમ (ચયાપચય) ને સુધારે છે. જ્યારે તમે ઠંડુ દૂધ પીઓ છો, ત્યારે શરીર તેના તાપમાનને સામાન્ય કરવા માટે વધુ કેલરી બર્ન કરે છે. આ ઉપરાંત, ઠંડુ દૂધ પીવાથી લાંબા સમય સુધી પેટ ભરેલું લાગે છે, જેથી બિનજરૂરી નાસ્તો કરવાની ઈચ્છા થતી નથી.
3. હાઈ બ્લડ પ્રેશરને નિયંત્રિત કરવામાં અસરકારક
ઠંડુ દૂધ હાઈ બ્લડ પ્રેશરના દર્દીઓ માટે પણ અત્યંત ગુણકારી છે. તેમાં રહેલા પોટેશિયમ, મેગ્નેશિયમ અને કેલ્શિયમ બ્લડ પ્રેશરને કુદરતી રીતે ઘટાડવામાં મદદ કરે છે. તે શરીરમાં સ્ટ્રેસ હોર્મોન 'કોર્ટિસોલ'નું સ્તર ઘટાડે છે, જેનાથી રક્તવાહિનીઓ રિલેક્સ થાય છે અને બ્લડ પ્રેશર કાબૂમાં રહે છે.
4. ત્વચા માટે કુદરતી ક્લીન્ઝર અને હાઇડ્રેટર
ઠંડુ દૂધ ઇલેક્ટ્રોલાઇટ્સથી ભરપૂર હોય છે જે શરીરને ડિહાઇડ્રેશન સામે લડવામાં મદદ કરે છે. જો તમે વહેલી સવારે ઠંડુ દૂધ પીઓ છો, તો તે તમારી ત્વચાને અંદરથી હાઇડ્રેટ રાખે છે. દૂધમાં રહેલું લેક્ટિક એસિડ ત્વચાને એક્સફોલિએટ કરવામાં અને તેને ચમકદાર બનાવવામાં મદદરૂપ થાય છે.
5. પાચન સુધારવા માટેની દેશી યુક્તિ
જો પાચન સંબંધી તકલીફ હોય, તો એક ગ્લાસ ઠંડા દૂધમાં એક ચમચી ઇસબગુલ (Psyllium Husk) ઉમેરીને પીવાથી એસિડ રિફ્લક્સમાં ખૂબ જ રાહત મળે છે. તે પાચન માર્ગને સાફ રાખવામાં અને કબજિયાત જેવી સમસ્યાઓને રોકવામાં પણ મદદ કરે છે.
ઠંડુ દૂધ પીતી વખતે આટલું ધ્યાન રાખજો
જો તમને શરદી, ઉધરસ કે સાઇનસની સમસ્યા હોય, તો ઠંડુ દૂધ પીવાનું ટાળવું જોઈએ.
ઠંડુ દૂધ પીવાનો શ્રેષ્ઠ સમય વહેલી સવારનો અથવા બપોરનો છે. રાત્રે સૂતી વખતે ગરમ દૂધ વધુ ફાયદાકારક રહે છે.
