દિલ્હી-એનસીઆરની જીવનરેખા ગણાતી દિલ્હી મેટ્રો આગામી મહિનાઓમાં વધુ વિસ્તૃત અને આધુનિક બનવા જઈ રહી છે. દિલ્હી મેટ્રો રેલ કોર્પોરેશન (DMRC) દ્વારા અમલમાં મુકાયેલા ફેઝ-4 પ્રોજેક્ટ હેઠળ અનેક નવા કોરિડોર અને મેટ્રો સ્ટેશનો શરૂ કરવાની તૈયારીઓ અંતિમ તબક્કામાં પહોંચી છે. પ્રોજેક્ટના કેટલાક અંડરગ્રાઉન્ડ અને એલિવેટેડ વિભાગોમાં ટ્રાયલ રન અને તકનીકી પરીક્ષણો ચાલી રહ્યા છે, જેના કારણે આગામી છ મહિનામાં લાખો મુસાફરોને સીધો લાભ મળવાની સંભાવના છે.
ફેઝ-4 હેઠળ ખાસ કરીને જનકપુરી પશ્ચિમથી આર.કે. આશ્રમ માર્ગ, તુગલકાબાદથી એરોસિટી અને મજલિસ પાર્કથી મૌજપુર સુધીના કોરિડોરને પ્રાથમિકતા આપવામાં આવી છે. આ નવા રૂટ શરૂ થતાં દિલ્હીના અનેક એવા વિસ્તારોને મેટ્રો કનેક્ટિવિટી મળશે જ્યાં અત્યાર સુધી મુસાફરી માટે માર્ગ પરિવહન પર જ આધાર રાખવો પડતો હતો.
જનકપુરી પશ્ચિમથી આર.કે. આશ્રમ માર્ગ સુધી નવી કનેક્ટિવિટી
ફેઝ-4નો સૌથી મહત્વપૂર્ણ પ્રોજેક્ટ જનકપુરી પશ્ચિમથી આર.કે. આશ્રમ માર્ગ સુધીનો મેજેંટા લાઇન એક્સટેન્શન માનવામાં આવે છે. આશરે 29 કિલોમીટર લાંબો આ કોરિડોર પશ્ચિમ અને ઉત્તર-પશ્ચિમ દિલ્હીના વિસ્તારોને સીધો સેન્ટ્રલ દિલ્હી સાથે જોડશે.
આ રૂટ દ્વારા પીરાગઢી, મંગોલપુરી, વેસ્ટ એન્ક્લેવ, મધુબન ચોક, પ્રશાંત વિહાર અને હૈદરપુર બાદલી મોડ જેવા વિસ્તારોના રહેવાસીઓને મોટી રાહત મળશે. હાલ જ્યાં લોકો ટ્રાફિકમાં ફસાઈને લાંબા સમય સુધી મુસાફરી કરે છે ત્યાં હવે ઝડપી અને સુવિધાજનક મેટ્રો સેવા ઉપલબ્ધ થશે. આ કોરિડોર મજલિસ પાર્ક અને આઝાદપુર જેવા મહત્વપૂર્ણ ઇન્ટરચેન્જ સ્ટેશનો સાથે પણ જોડાશે, જેના કારણે સમગ્ર મેટ્રો નેટવર્કનો ઉપયોગ વધુ સરળ બનશે.
તુગલકાબાદથી એરોસિટી સુધી ગોલ્ડન લાઈન
ફેઝ-4ની બીજી મહત્વપૂર્ણ યોજના તુગલકાબાદથી એરોસિટી સુધીની નવી ગોલ્ડન લાઇન છે. લગભગ 23 કિલોમીટર લાંબી આ લાઇન દક્ષિણ દિલ્હીને સીધી ઈન્દિરા ગાંધી આંતરરાષ્ટ્રીય વિમાનમથકના એરપોર્ટ વિસ્તાર સાથે જોડશે.
આ રૂટ પર તુગલકાબાદ, સાકેત જી બ્લોક, ખાનપુર, છતરપુર, મહરૌલી સહિતના મહત્વપૂર્ણ સ્ટેશનો વિકસાવવામાં આવી રહ્યા છે. હાલમાં દક્ષિણ અને પૂર્વ દિલ્હીના ઘણા મુસાફરોને એરપોર્ટ પહોંચવા માટે લાંબો માર્ગ અપનાવવો પડે છે, પરંતુ ગોલ્ડન લાઇન શરૂ થયા બાદ એરપોર્ટ સુધીનો સમય નોંધપાત્ર રીતે ઘટશે. ખાસ કરીને ફરિદાબાદ અને તુગલકાબાદ વિસ્તારના રહેવાસીઓ માટે આ કોરિડોર ગેમચેન્જર સાબિત થઈ શકે છે. તેમને હવે આખી દિલ્હીનો ચક્કર મારીને ધૌલા કૂઆં તરફ જવાની જરૂર નહીં રહે.
આ પણ વાંચો: ઉત્તર કાશ્મીરના ગુરેઝમાં વાદળ ફાટતાં ભારે તબાહી! : અચાનક પૂરથી પુલ તૂટ્યો, અનેક રસ્તાઓને નુકસાન
મજલિસ પાર્ક-મૌજપુર કોરિડોરથી પૂર્ણ થશે પિંક લાઈન લૂપ
મજલિસ પાર્કથી મૌજપુર સુધીનો લગભગ 7 કિલોમીટરનો કોરિડોર કદમાં નાનો હોવા છતાં વ્યૂહાત્મક રીતે ખૂબ જ મહત્વપૂર્ણ ગણાય છે. આ પ્રોજેક્ટ દ્વારા પિંક લાઇનનો રિંગ રોડ લૂપ સંપૂર્ણ બનશે. આ કોરિડોરથી બુરાડી, ઝરોડા, વજીરાબાદ અને ઉત્તર-પૂર્વ દિલ્હીના અન્ય વિસ્તારોને વધુ સારી મેટ્રો સેવા મળશે. લાંબા સમયથી મેટ્રો કનેક્ટિવિટીની રાહ જોઈ રહેલા આ વિસ્તારોના લાખો રહેવાસીઓને સીધો લાભ મળશે. નવા કોરિડોરથી ઉત્તર દિલ્હી અને પૂર્વ દિલ્હી વચ્ચેની મુસાફરી વધુ સરળ અને ઝડપી બનશે. સાથે સાથે માર્ગ પરિવહન પરનો દબાણ પણ ઘટશે.
ટ્રાફિક જામથી મળશે રાહત
દિલ્હી વિશ્વના સૌથી વધુ ટ્રાફિક ધરાવતા શહેરોમાં સામેલ છે. દરરોજ લાખો લોકો કામ, અભ્યાસ અને અન્ય જરૂરિયાતો માટે શહેરના એક છેડેથી બીજા છેડે મુસાફરી કરે છે. આવી સ્થિતિમાં ફેઝ-4નો વિસ્તાર ટ્રાફિકની સમસ્યા ઘટાડવામાં મહત્વપૂર્ણ ભૂમિકા ભજવી શકે છે.
અધિકારીઓના અંદાજ મુજબ હાલમાં જે મુસાફરી પૂર્ણ કરવામાં દોઢથી બે કલાકનો સમય લાગે છે તે જ અંતર મેટ્રો દ્વારા માત્ર 30થી 40 મિનિટમાં કાપી શકાશે. ખાસ કરીને મંગોલપુરી, બુરાડી, વજીરાબાદ અને આઉટર દિલ્હીના અન્ય વિસ્તારોમાંથી સેન્ટ્રલ અથવા સાઉથ દિલ્હી જતા લોકોને મોટો લાભ મળશે.
આ પણ વાંચો: ભાજપના દિગ્ગજ નેતા ઉમા ભારતીની અચાનક તબિયત બગડી : હરિદ્વારથી દિલ્હી જતા રસ્તામાં રોકવો પડ્યો કાફલો
લાખો મુસાફરોને મળશે સીધો ફાયદો
ફેઝ-4 માત્ર પરિવહન પ્રોજેક્ટ નથી, પરંતુ દિલ્હીના શહેરી વિકાસ માટે પણ મહત્વપૂર્ણ પગલું માનવામાં આવે છે. નવી મેટ્રો લાઇનો શરૂ થતાં રોજિંદા મુસાફરોનો સમય બચશે, ઇંધણનો ખર્ચ ઘટશે અને પ્રદૂષણમાં પણ ઘટાડો થવાની શક્યતા છે.
વેપારીઓ, વિદ્યાર્થીઓ, નોકરીયાત વર્ગ, એરપોર્ટ મુસાફરો અને રોજિંદા અપ-ડાઉન કરતા લોકો માટે આ પ્રોજેક્ટ મોટી રાહત બની શકે છે. નવા સ્ટેશનો શરૂ થયા બાદ દિલ્હી મેટ્રોનું નેટવર્ક વધુ મજબૂત બનશે અને રાજધાનીમાં જાહેર પરિવહન વ્યવસ્થાને નવી ગતિ મળશે.
