Vadodara News: વડોદરા જિલ્લાના ડભોઈ શહેરમાં સરદાર બાગમાં છેલ્લા કેટલાક મહિનાથી વાગતી હનુમાન ચાલીસાને બંધ કરાવવાના કથિત આદેશને લઈને વિવાદ ઊભો થયો છે. સોશિયલ મીડિયામાં વાયરલ થયેલા એક ઓડિયો ક્લિપ બાદ શહેરમાં રાજકીય અને સામાજિક માહોલ ગરમાયો છે. આ ઘટનાને લઈને સ્થાનિક હિન્દુ સંગઠનો, ભાજપના કોર્પોરેટરો અને અનેક નાગરિકોએ વિરોધ નોંધાવ્યો છે. સમગ્ર મામલાએ હવે ડભોઈ ઉપરાંત આસપાસના વિસ્તારોમાં પણ ચર્ચા જગાવી છે. મળતી માહિતી મુજબ, ડભોઈ નગરપાલિકામાં તાજેતરમાં સત્તા પરિવર્તન બાદ સરદાર બાગના સંચાલનને લઈને કેટલીક નવી સૂચનાઓ આપવામાં આવી હોવાનો દાવો કરવામાં આવી રહ્યો છે. સોશિયલ મીડિયામાં વાયરલ થયેલા ઓડિયોમાં એવો દાવો કરવામાં આવ્યો છે કે બાગ સમિતિના ચેરમેન નશલીનબાનું મન્સૂરીના પતિએ પાલિકાના કર્મચારીઓને બગીચામાં કોઈપણ પ્રકારના ધાર્મિક ગીતો અથવા હનુમાન ચાલીસા ન વગાડવા સૂચના આપી હતી. જોકે, આ ઓડિયોની સત્તાવાર રીતે સ્વતંત્ર પુષ્ટિ થઈ નથી.
છેલ્લા આઠ મહિનાથી નિયમિત વાગતી હતી હનુમાન ચાલીસા
સ્થાનિક લોકોના જણાવ્યા મુજબ સરદાર બાગમાં છેલ્લા અંદાજે આઠ મહિનાથી સવાર અને સાંજના સમયે નિયમિત હનુમાન ચાલીસાનું પ્રસારણ કરવામાં આવતું હતું. બગીચામાં પ્રભુ શ્રીરામની મૂર્તિ પણ સ્થાપિત હોવાથી અનેક શ્રદ્ધાળુઓ માટે આ સ્થળ ધાર્મિક આસ્થાનું કેન્દ્ર બની ગયું હતું. રોજ મોર્નિંગ અને ઈવનિંગ વોક માટે આવતા લોકો પણ અહીં થોડો સમય રોકાઈ પ્રાર્થના કરતા હોવાનું સ્થાનિકો કહે છે.
વાયરલ ઓડિયોમાં કથિત રીતે એવો દાવો કરવામાં આવ્યો છે કે મોર્નિંગ વોક માટે આવતા કેટલાક લોકોની રજૂઆતને ધ્યાનમાં રાખીને ધાર્મિક ઓડિયો બંધ રાખવાનો નિર્ણય લેવામાં આવ્યો છે. જોકે આ દાવા અંગે પાલિકા તરફથી કોઈ સત્તાવાર લેખિત સ્પષ્ટતા જાહેર કરવામાં આવી નથી..
આ પણ વાંચો: જ્યાં ગટર લાઇન નાખવી હતી અશક્ય, ત્યાં ડાંગે શોધ્યો અનોખો ઉકેલ : 95% ઘરોમાં 'ટ્વિન-પિટ'થી સ્વચ્છતાની ક્રાંતિ
વાયરલ ઓડિયો બાદ વધ્યો વિરોધ
ઓડિયો સોશિયલ મીડિયામાં વાયરલ થતાં જ સ્થાનિક હિન્દુ સંગઠનોમાં ભારે નારાજગી જોવા મળી હતી. અનેક લોકોએ પ્રશ્ન ઉઠાવ્યો કે જ્યાં ભગવાન શ્રીરામની મૂર્તિ સ્થાપિત છે, ત્યાં હનુમાન ચાલીસાનું પ્રસારણ બંધ કરાવવાનો નિર્ણય કેમ લેવામાં આવ્યો? વિરોધીઓનું કહેવું છે કે આ માત્ર ધાર્મિક કાર્યક્રમનો મુદ્દો નથી, પરંતુ લોકોની ધાર્મિક લાગણીઓ સાથે જોડાયેલો વિષય છે. બીજી તરફ કેટલાક લોકોનું માનવું છે કે જો બગીચામાં શાંતિ જાળવવા અથવા જાહેર સ્થળના નિયમોને ધ્યાનમાં રાખીને કોઈ નિર્ણય લેવાયો હોય તો તેની સત્તાવાર માહિતી જાહેર થવી જોઈએ, જેથી ગેરસમજ ઊભી ન થાય.
ભાજપના કોર્પોરેટરો અને સ્થાનિકોએ કર્યો વિરોધ
વિવાદ વધુ વકરતા મોડી રાત્રે સ્થાનિક ભાજપના કોર્પોરેટરો, કાર્યકરો અને મોટી સંખ્યામાં સ્થાનિક રહેવાસીઓ સરદાર બાગ ખાતે એકત્ર થયા હતા. વિરોધના ભાગરૂપે તેમણે બગીચામાં સામૂહિક રીતે હનુમાન ચાલીસાનું પઠન કર્યું અને કથિત નિર્ણય સામે પોતાનો વિરોધ વ્યક્ત કર્યો. આ દરમિયાન મોટી સંખ્યામાં લોકો હાજર રહ્યા હતા. સમગ્ર ઘટનાક્રમ દરમિયાન કાયદો અને વ્યવસ્થાની સ્થિતિ જળવાઈ રહે તે માટે સ્થાનિક પોલીસ પણ સતર્ક રહી હતી. વિરોધ પ્રદર્શન શાંતિપૂર્ણ રીતે પૂર્ણ થયું હોવાની માહિતી સામે આવી છે.
આ પણ વાંચો: ગુજરાતમાં મેઘતાંડવની આગાહી : આગામી 3 કલાક માટે IMDનું એલર્ટ, જાણો કયા જિલ્લાઓમાં પડશે ભારે વરસાદ
રાજકીય માહોલ ગરમાયો
ડભોઈ નગરપાલિકામાં સત્તા પરિવર્તન બાદ આ પ્રથમ મોટો વિવાદ માનવામાં આવી રહ્યો છે. ઘટનાને લઈને રાજકીય વર્તુળોમાં પણ ચર્ચા તેજ બની છે. વિરોધ પક્ષ આ મુદ્દે નગરપાલિકાની કામગીરી સામે પ્રશ્નો ઉઠાવી રહ્યો છે, જ્યારે નિર્ણય પાછળના વાસ્તવિક કારણોને લઈને વિવિધ પ્રકારની ચર્ચાઓ ચાલી રહી છે. રાજકીય વિશ્લેષકોનું માનવું છે કે સ્થાનિક સ્તરે ધાર્મિક અને જાહેર વ્યવસ્થાને લગતા નિર્ણયો પારદર્શક રીતે લેવામાં આવે અને તેની સ્પષ્ટ માહિતી લોકોને આપવામાં આવે તો આવા વિવાદો ટાળી શકાય.
આ પણ વાંચો: અકસ્માતો અટકાવવા AMCનું મોટું પગલું! : વાહનચાલકો અને પદયાત્રીઓ માટે ખાસ ગાઇડલાઇન જાહેર કરી
તંત્રના સત્તાવાર નિવેદરની રાહ
હાલ સમગ્ર મામલે નગરપાલિકા અથવા સંબંધિત તંત્ર તરફથી કોઈ વિગતવાર સત્તાવાર નિવેદન જાહેર થયું નથી. વાયરલ થયેલા ઓડિયો અંગે પણ અધિકૃત પુષ્ટિ કરવામાં આવી નથી. જેના કારણે સમગ્ર ઘટનાક્રમને લઈને અનેક પ્રશ્નો હજુ પણ અનુત્તર છે. આગામી દિવસોમાં નગરપાલિકા અથવા જિલ્લા વહીવટી તંત્ર તરફથી શું સ્પષ્ટતા કરવામાં આવે છે અને આ મુદ્દે કોઈ સત્તાવાર નિર્ણય લેવામાં આવે છે કે નહીં તેના પર સૌની નજર છે. જો કોઈ ગેરસમજના કારણે વિવાદ ઊભો થયો હોય તો તે દૂર કરવા માટે પણ તંત્રની સ્પષ્ટતા મહત્વપૂર્ણ બની રહેશે.
ડભોઈમાં સર્જાયેલા આ વિવાદે ફરી એકવાર જાહેર સ્થળોએ ધાર્મિક કાર્યક્રમો, સ્થાનિક વહીવટ અને જાહેર હિત વચ્ચે સંતુલન જાળવવાના મુદ્દે ચર્ચા જગાવી છે. હાલ પરિસ્થિતિ શાંતિપૂર્ણ હોવાનું જાણવા મળે છે, પરંતુ સમગ્ર મામલે આગળ શું વળાંક આવે છે તેના પર સ્થાનિક લોકો અને રાજકીય વર્તુળોની નજર ટકેલી છે.
