'જીવતા' લોકોને મારી નાખ્યા! પંચાયત સચિવે ઇશ્યૂ કર્યા 3 ડેથ સર્ટિફિકેટ : પેન્શન અટક્યું ત્યારે ખુલ્યો સરકારી બેદરકારીનો મોટો ખેલ

Fake Death Certificate Case: મધ્ય પ્રદેશના છતરપુરમાં જીવતા લોકોને મૃત જાહેર કરનાર પંચાયત સચિવ પર કડક કાર્યવાહી કરવામાં આવી છે. વિધવા પેન્શન બંધ થતા આ આખા કૌભાંડનો ખુલાસો થયો હતો. જાણો શું છે સરપંચ પર લાગેલા આરોપોનું સત્ય...

શું છે સમગ્ર મામલો?

મધ્ય પ્રદેશના છતરપુર જિલ્લામાં એક પંચાયત સચિવે 3 જીવતા વ્યક્તિઓના નામે મરણના દાખલા (ડેથ સર્ટિફિકેટ) ઇશ્યૂ કરી દીધા હતા. આ ગંભીર બેદરકારી બદલ સચિવને તાત્કાલિક અસરથી સસ્પેન્ડ કરવામાં આવ્યા છે. સ્થાનિક લોકોનો આરોપ છે કે સચિવે કોઈના દબાણમાં આવીને આ કૃત્ય કર્યું છે, જ્યારે અધિકારીઓનું કહેવું છે કે કમ્પ્યુટરના અપૂરતા જ્ઞાનને કારણે આ ભૂલ થઈ હોઈ શકે છે.

આ પણ વાંચો: 27 એપ્રિલે 9 રાજ્યોમાં મચશે ભારે તબાહી! : 75ની ઝડપે ફૂંકાશે વાવાઝોડું, ત્રાટકશે વીજળી

પીડિતોની ફરિયાદ બાદ ખુલાસો

સચિવ અમર સિંહ સામે આ કાર્યવાહી રમાબાઈ રાયકવાર, ગિરજા વિશ્વકર્મા અને કલ્લુ અહિરવાર દ્વારા કરવામાં આવેલી ફરિયાદ બાદ કરવામાં આવી છે. આ ત્રણેય વ્યક્તિઓએ આક્ષેપ કર્યો હતો કે તેમને સરકારી રેકોર્ડમાં મૃત જાહેર કરી દેવામાં આવ્યા છે અને તેમના મરણના દાખલા પણ ખોટી રીતે બનાવી દેવાયા છે.

પેન્શન અટક્યું ત્યારે ખબર પડી - 'અમે તો મરી ગયા છીએ!'

પોતાની ફરિયાદમાં રમાબાઈ અને ગિરજા વિશ્વકર્માએ જણાવ્યું કે, તેમને મૃત જાહેર કરાયા બાદ તેમનું વિધવા પેન્શન અટકાવી દેવામાં આવ્યું હતું. બીજી તરફ, કલ્લુ અહિરવારે દાવો કર્યો હતો કે તે દલિત કલ્યાણ યોજનાઓનો લાભ લઈ શકતો ન હતો કારણ કે કાગળ પર તેને મૃત જાહેર કરી દેવાયો હતો.

આ પણ વાંચો: ભારતમાં હીટવેવનો પ્રકોપ ચરમસીમાએ! : આગામી 3 દિવસ સુધી વરસશે તીવ્ર આગ! ગુજરાત સહિત અનેક રાજ્યોમાં વાવાઝોડા-વરસાદની ચેતવણી

બદલો કે ટેકનિકલ ભૂલ?

સ્થાનિક લોકોએ ગંભીર આરોપ લગાવતા કહ્યું છે કે, આ ત્રણેય વ્યક્તિઓએ ચૂંટણી દરમિયાન ચંદ્રપુરાના સરપંચ વિરુદ્ધ કામ કર્યું હતું. શક્ય છે કે સરપંચે બદલો લેવા માટે સચિવ પર દબાણ કર્યું હોય અને આ ખોટા પ્રમાણપત્રો બનાવડાવ્યા હોય.

CEO દ્વારા સચિવનું સસ્પેન્શન

જિલ્લા પંચાયતના મુખ્ય કાર્યપાલન અધિકારી (CEO) નમઃ શિવાય અરજરિયાએ ચંદ્રપુરા ગ્રામ પંચાયતના સચિવ અમર સિંહને તાત્કાલિક અસરથી સસ્પેન્ડ કરી દીધા છે. જોકે, CEOએ જણાવ્યું કે અત્યારે તપાસ ચાલુ હોવાથી તે કોઈ ચોક્કસ ટિપ્પણી કરી શકે નહીં. તેમણે એમ પણ ઉમેર્યું કે સચિવને કમ્પ્યુટર ચલાવવાની વધુ જાણકારી નહોતી, તેથી કદાચ આ ભૂલ થઈ હોઈ શકે.

આ પણ વાંચો: દ્વારકામાં પોલીસ સ્પેશિયલ સેલનું ફાયરિંગ! : ગોળીબારમાં મજૂરના મોતથી પોલીસ પર સવાલો?

પ્રાથમિક દ્રષ્ટિએ આ કૃત્ય 'મધ્ય પ્રદેશ પંચાયત સેવા (આચરણ) નિયમ, 1996' હેઠળ ગંભીર ગેરરીતિ ગણવામાં આવી છે. સસ્પેન્શન દરમિયાન અમર સિંહને જનપદ પંચાયત ગૌરીહાર ઓફિસમાં એટેચ કરવામાં આવશે અને તેમને નિયમ મુજબ જીવન-નિર્વાહ ભથ્થું આપવામાં આવશે.