ગુજરાતમાં આગામી વસતિ ગણતરીની પ્રક્રિયા અંતર્ગત 20 એપ્રિલથી હાઉસ લિસ્ટિંગ કામગીરી શરૂ કરવામાં આવશે, જે 19 મે સુધી ચાલશે. આ દરમિયાન દરેક ઘર અંગેની વિગતો તેમજ રહેણાંક, સુવિધાઓ અને અન્ય જરૂરી માહિતીઓ એકત્રિત કરવામાં આવશે. આ પ્રક્રિયા આગામી વસતિ ગણતરી–2027 માટેનો મહત્વપૂર્ણ ભાગ છે. કેન્દ્ર સરકારના ગૃહ મંત્રાલય દ્વારા જાહેર કરાયેલા નોટિફિકેશન મુજબ 1 એપ્રિલ 2026થી 30 સપ્ટેમ્બર 2026 દરમિયાન સમગ્ર દેશમાં હાઉસલિસ્ટિંગની કામગીરી હાથ ધરાશે. આ અંગેની સૂચના ગુજરાત સરકારના જનરલ એડમિનિસ્ટ્રેશન વિભાગ (પ્લાનિંગ) દ્વારા ગુજરાત ગવર્નમેન્ટ ગેઝેટમાં પ્રસિદ્ધ કરવામાં આવી છે.
33 પ્રશ્નો પૂછવામાં આવશે!
આ વસતિ ગણતરી દરમિયાન કુલ 33 પ્રશ્નો પૂછવામાં આવશે. ખાસ વાત એ છે કે હાઉસ ટુ હાઉસ ગણતરી શરૂ થાય તે પહેલાં 15 દિવસ માટે સ્વ-ગણતરી (Self Enumeration)ની પણ વ્યવસ્થા કરવામાં આવશે. આ પ્રક્રિયા દ્વારા નાગરિકોને પોતાની માહિતી જાતે જ નોંધાવવાની તક મળશે, જેથી માહિતી વધુ ચોક્કસ અને સમયસર એકત્રિત કરી શકાય. આગામી સમયમાં આ કામગીરી માટે અધિકારીઓ અને કર્મચારીઓને વિશેષ તાલીમ આપવામાં આવશે. વસ્તી ગણતરીના સફળ અમલ માટે રાજ્ય, જિલ્લા, મહાનગરપાલિકા અને તાલુકા સ્તરે જરૂરી વ્યવસ્થાઓ માટે અલગ-અલગ બજેટ ફાળવવામાં આવ્યું છે. રાજ્ય સ્તરે IT સાધનો, વાહનો માટે POL ખર્ચ અને અન્ય કામગીરી માટે 10 લાખ રૂપિયા, જિલ્લા અને મહાનગરપાલિકા સ્તરે 5 લાખ રૂપિયા અને તાલુકા સ્તરે 1 લાખ રૂપિયા સુધીની જોગવાઈ રાખવામાં આવી છે.
ગણતરીકારોને તાલીમ આપવામાં આવશે
આ સમગ્ર પ્રક્રિયા દરમિયાન મોબાઇલ એપ્લિકેશન અને CMMS પોર્ટલના માધ્યમથી ડેટા એકત્રિત કરી રિયલ-ટાઈમ મોનિટરિંગ કરવામાં આવશે. સમગ્ર દેશમાં અંદાજે 100 રાષ્ટ્રીય ટ્રેનર્સ, 2000 માસ્ટર ટ્રેનર્સ અને 44,000 ફીલ્ડ ટ્રેનર્સ દ્વારા લાખો ગણતરીકારોને તાલીમ આપવામાં આવશે. આ આધુનિક અને ટેકનોલોજી આધારિત વ્યવસ્થાથી વસતિ ગણતરી વધુ પારદર્શક, ઝડપી અને અસરકારક બનશે તેવો વિશ્વાસ વ્યક્ત કરવામાં આવ્યો છે.
