બોટાદમાં આજે કલેક્ટર કચેરીને બોમ્બથી ઉડાવી દેવાની ધમકી મળતાં સમગ્ર વહીવટી તંત્ર અને પોલીસ વિભાગમાં દોડધામ મચી ગઈ હતી. બોટાદની ખસ રોડ પર આવેલી કલેક્ટર કચેરીને ઈમેલ દ્વારા બોમ્બ વિસ્ફોટ કરવાની ધમકી આપવામાં આવી હતી, જેના પગલે તાત્કાલિક સુરક્ષા એજન્સીઓ હરકતમાં આવી ગઈ હતી.
ધમકીની જાણ થતાં જ બોટાદ પોલીસના વરિષ્ઠ અધિકારીઓ સહિત LCB, SOG અને ડોગ સ્ક્વોડની ટીમો કલેક્ટર કચેરી ખાતે પહોંચી હતી. સંભવિત જોખમને ધ્યાનમાં રાખીને કચેરીની આસપાસ સુરક્ષા કડક કરવામાં આવી હતી અને કર્મચારીઓમાં પણ ચિંતા જોવા મળી હતી. પોલીસ દ્વારા સમગ્ર કચેરી અને તેની આસપાસના વિસ્તારોને કોર્ડન કરીને સઘન તપાસ હાથ ધરવામાં આવી હતી.
ડોગ સ્ક્વોડ અને બોમ્બ ડિસ્પોઝલ ટીમ દ્વારા કલેક્ટર કચેરીના દરેક ખૂણે તપાસ કરવામાં આવી હતી. ઓફિસ રૂમ, કોરિડોર, પાર્કિંગ વિસ્તાર તેમજ આસપાસના ખુલ્લા મેદાનોમાં પણ ચેકિંગ કરાયું હતું. લગભગ લાંબી સમયગાળાની તપાસ બાદ કોઈ પણ શંકાસ્પદ વસ્તુ કે વિસ્ફોટક સામગ્રી મળી આવી નહોતી. અંતે પોલીસે રાહતનો શ્વાસ લીધો હતો.
પ્રાથમિક તપાસમાં આ ધમકી ફેક હોવાનું જણાઈ આવ્યું છે, તેમ છતાં પોલીસ દ્વારા મામલાને હળવાશથી લેવામાં આવ્યો નથી. ઈમેલ ક્યાંથી અને કોના દ્વારા મોકલાયો તેની ટેકનિકલ તપાસ શરૂ કરવામાં આવી છે. સાઇબર ક્રાઈમ વિભાગની મદદથી ઈમેલના સ્ત્રોત સુધી પહોંચવાના પ્રયાસો કરવામાં આવી રહ્યા છે.
ઉલ્લેખનીય છે કે છેલ્લા કેટલાક સમયથી રાજ્યની વિવિધ કલેક્ટર કચેરીઓને ઈમેલ દ્વારા બોમ્બ ધમકી મળવાની ઘટનાઓ સામે આવી રહી છે, જે બાદમાં ફેક સાબિત થાય છે. બોટાદમાં પણ આવી જ ઘટના સામે આવતાં તંત્ર વધુ સતર્ક બન્યું છે અને ભવિષ્યમાં આવી ધમકીઓને ગંભીરતાથી લઈ કડક કાર્યવાહી કરવામાં આવશે તેમ પોલીસ અધિકારીઓએ જણાવ્યું છે.
