બિહાર વિધાનસભાની ચૂંટણીમાં મતદાન પહેલા જ ધાર્મિક અને સાંસ્કૃતિક નિવેદનોને લઈને રાજકીય ગરમાવો વધી ગયો છે. વડા પ્રધાન નરેન્દ્ર મોદીએ સહરસામાં યોજાયેલી ચૂંટણી સભામાં આરજેડી પ્રમુખ લાલુ પ્રસાદ યાદવ અને તેમના પરિવાર પર નિશાન સાધ્યું હતું, જેમાં તેમણે હેલોવીન ઉજવણીનો ઉલ્લેખ કરીને તેમને "વિદેશી સંસ્કૃતિના અનુયાયી" ગણાવ્યા હતા.
પીએમ મોદીએ કટાક્ષ કર્યો કે, "કોંગ્રેસ અને આરજેડી પરિવાર રામ મંદિરની મુલાકાત લેવાનો સમય નથી કાઢી શકતા, પરંતુ વિદેશી તહેવારો મનાવવામાં આનંદ અનુભવે છે." તેમણે વધુમાં કહ્યું કે, "આ રાજવી પરિવારોએ દેશની પરંપરાઓને નકારવાની અને હિંદુ તહેવારોને નાટક ગણાવવાની પરંપરા બનાવી દીધી છે."
આ નિવેદન બાદ લાલુ યાદવની પુત્રી રોહિણી આચાર્યએ પીએમ મોદીને સીધી ટક્કર આપી. તેમણે જણાવ્યું કે હેલોવીન ઉજવવામાં કોઈ ખોટ નથી અને દરેક તહેવાર આનંદ અને એકતાનું પ્રતિક છે. રોહિણી આચાર્યએ જણાવ્યું, "અમારો પરિવાર હંમેશા તમામ તહેવારો સમાન ઉત્સાહથી ઉજવે છે. જો બાળકો હેલોવીન ઉજવે છે અને પરિવાર તેમાં જોડાય છે, તો તેમાં ખોટું શું છે? વડા પ્રધાન અને ભાજપના નેતાઓ પણ ઈદ અને ક્રિસમસની શુભેચ્છા આપે છે, તો હેલોવીનને વિવાદનું કારણ કેમ બનાવવામાં આવે?"
તેમણે આગળ કહ્યું કે બિહારની ચર્ચા વિકાસ, રોજગાર અને સ્થળાંતર જેવા મૂળ મુદ્દાઓ પર થવી જોઈએ, તહેવારોને રાજકીય બનાવવાના બદલે.
આ પહેલાં પીએમ મોદીએ પોતાના ભાષણમાં લાલુ યાદવ અને તેજશ્વી યાદવ પર પણ આકરા પ્રહાર કર્યા હતા. તેમણે કહ્યું કે તેજશ્વી યાદવ પોતાના પિતાના વારસાનો ગૌરવ કરે છે, પરંતુ ચૂંટણી પોસ્ટરો પર તેમનું ચિત્ર મૂકતા ડરે છે. મોદીએ કહ્યું, "આ લોકો એ જંગલ રાજના પાપોને છુપાવવાનો પ્રયાસ કરી રહ્યા છે, જેને કારણે બિહાર વર્ષો સુધી પાછળ રહી ગયો હતો."
ચૂંટણી પ્રચારના અંતિમ તબક્કામાં હેલોવીનનો આ મુદ્દો બિહારમાં રાજકીય ચર્ચાનો કેન્દ્ર બની ગયો છે. એક બાજુ ભાજપ તેને "સંસ્કાર વિરુદ્ધ" કહી રહ્યું છે, જ્યારે આરજેડી તેને "વ્યક્તિગત સ્વાતંત્ર્ય અને સાંસ્કૃતિક સ્વીકાર" તરીકે રજૂ કરી રહી છે.
બિહારમાં રાજકીય ગરમાવો હવે ધાર્મિક અને સાંસ્કૃતિક વિવાદની દિશામાં વળી રહ્યો છે, જ્યાં દરેક પક્ષ પોતપોતાના મતદારોને પ્રભાવિત કરવાની પૂરી કોશિશ કરી રહ્યો છે.
