બોટાદ જિલ્લાના હડદડ ગામે એક જ જ્ઞાતિના લોકો વચ્ચે ગંભીર મારામારીની ઘટના સામે આવી છે. ગામમાં યુવકો ક્રિકેટ રમતા હતા. તે દરમિયાન કોઈ વાતને લઈને બોલાચાલી થઈ હતી. આ બાબતે વડીલોએ ઠપકો આપતા મામલો વધુ ઉગ્ર બન્યો હતો અને થોડા સમયમાં જ બંને પક્ષો સામસામે આવી ગયા હતા.
સાત જેટલા લોકોને ઈજાઓ
વિવાદ એટલો વધી ગયો કે બંને પક્ષોએ લાકડાના ધોકા, ક્રિકેટ બેટ અને લાકડીઓ સાથે એકબીજા પર હુમલો કર્યો હતો. આ મારામારીમાં સાત જેટલા લોકોને ઈજાઓ પહોંચી હતી. ઈજાગ્રસ્તોને તાત્કાલિક સારવાર માટે બોટાદની હોસ્પિટલમાં ખસેડવામાં આવ્યા હતા, જ્યારે બે લોકોની હાલત વધુ ગંભીર હોવાથી તેમને વધુ સારવાર માટે ભાવનગર ખસેડવામાં આવ્યા છે.
પોલીસે સમગ્ર મામલે તપાસ હાથ ધરી
ઘટનાની જાણ થતાં જ પોલીસ ઘટનાસ્થળે પહોંચી હતી અને પરિસ્થિતિ પર કાબૂ મેળવી વધુ તપાસ હાથ ધરી છે. આ ઘટનાથી હડદડ ગામમાં તણાવનું માહોલ સર્જાયો છે.
