RBI MPC Meeting 2026: નવા નાણાકીય વર્ષ (2026-27) ની શરૂઆત સાથે જ કરોડો હોમ લોન અને કાર લોન લેનારાઓની નજર રિઝર્વ બેંક ઓફ ઈન્ડિયા (RBI) ની મોદ્રિક નીતિ સમિતિ (MPC) પર ટકી છે. શું તમારી EMI ઘટશે કે પછી મોંઘવારીનું દબાણ રાહતની આશાઓ પર પાણી ફેરવશે? RBI એ વર્ષ 2026-27 માટે બેઠકોનું સંપૂર્ણ કેલેન્ડર જાહેર કરી દીધું છે.
ભારતીય રિઝર્વ બેંક (RBI) એ નવા બિઝનેસ વર્ષ 2026-27 માટે મોદ્રિક નીતિ સમિતિ (MPC) ની બેઠકોનું શેડ્યૂલ જાહેર કર્યું છે. 1 એપ્રિલથી શરૂ થતા નવા નાણાકીય વર્ષની પ્રથમ બેઠક 6 થી 8 એપ્રિલ વચ્ચે યોજાશે. ગવર્નરની અધ્યક્ષતાવાળી આ 6 સભ્યોની સમિતિ નક્કી કરશે કે દેશમાં વ્યાજ દરોની દિશા શું રહેશે.
વર્ષ 2026-27નું સંપૂર્ણ શેડ્યૂલ:
બીજી બેઠક: 3-5 જૂન 2026
ત્રીજી બેઠક: 3-5 ઓગસ્ટ 2026
ચોથી બેઠક: 5-7 ઓક્ટોબર 2026
પાંચમી બેઠક: 2-4 ડિસેમ્બર 2026
છઠ્ઠી બેઠક: 3-5 ફેબ્રુઆરી 2027
ગયું વર્ષ: રાહતની સફર રહી
નાણાકીય વર્ષ 2025-26 દેવાદારો માટે ઘણું આરામદાયક રહ્યું. મોંઘવારીમાં થયેલા ઘટાડાને કારણે (ડિસેમ્બર 2025માં લગભગ 2.0%) RBI એ રેપો રેટમાં અનેક ઘટાડા કર્યા હતા. ફેબ્રુઆરીથી જૂન 2025 વચ્ચે રેપો રેટ 6.50% થી ઘટીને સીધો 5.50% પર આવી ગયો હતો. ડિસેમ્બર 2025 માં ફરીથી 0.25% નો ઘટાડો થયો અને તે 5.25% પર પહોંચ્યો. ફેબ્રુઆરી 2026 ની છેલ્લી બેઠકમાં દરોને 5.25% પર સ્થિર રાખવામાં આવ્યા હતા.
શું આ વખતે પણ EMI ઘટશે?
હાલમાં રેપો રેટ 5.25% પર છે. નિષ્ણાતોનું માનવું છે કે ગયા વર્ષે રેપો રેટમાં કુલ 1.25% નો મોટો ઘટાડો કરવામાં આવ્યો હોવાથી, એપ્રિલની બેઠકમાં RBI 'થોભો અને જુઓ' (Wait and Watch) ની નીતિ અપનાવી શકે છે. જોકે, જો મોંઘવારી દર 2% ના લક્ષ્યાંકની આસપાસ રહેશે, તો વર્ષના બીજા ભાગમાં EMI વધુ ઘટવાની શક્યતા બની શકે છે.
તમારો વ્યાજ દર કેવી રીતે નક્કી થાય છે?
MPC માં કુલ 6 સભ્યો હોય છે (3 RBI માંથી અને 3 સરકાર દ્વારા નિયુક્ત બહારના નિષ્ણાતો). આ સભ્યો ત્રણ દિવસ સુધી દેશની આર્થિક સ્થિતિ, મોંઘવારી અને GDP વૃદ્ધિ પર ચર્ચા કરે છે. બહુમતીના આધારે નિર્ણય લેવામાં આવે છે, જેની સીધી અસર તમારી હોમ લોન, કાર લોન અને પર્સનલ લોનના વ્યાજ દરો પર પડે છે.
