મહીસાગર જિલ્લામાં બાલાસિનોર તાલુકા પોલીસ સ્ટેશનના મહિલા PI સામે વિદ્યાર્થીને માર મારવાના આક્ષેપો બાદ ભારે ખળભળાટ મચી ગયો છે. આ ઘટનાએ પોલીસ બેડામાં ચિંતા ફેલાવી દીધી છે, જ્યારે રાજકીય માહોલ પણ ગરમાયો છે. મામલો સામે આવતા જ બાયડના ધારાસભ્ય ધવલસિંહ ઝાલા મેદાનમાં ઉતર્યા છે.
આક્ષેપ મુજબ બાલાસિનોર તાલુકા પોલીસ સ્ટેશનમાં ફરજ બજાવતા મહિલા PI દ્વારા એક વિદ્યાર્થી સાથે અમાનવીય વર્તન કરવામાં આવ્યું હતું અને તેને માર મારવામાં આવ્યો હતો. ઘટના જાહેર થતાં જ વિદ્યાર્થી અને તેના પરિવારજનોમાં રોષ ફાટી નીકળ્યો હતો. આ ગંભીર મામલે ધારાસભ્ય ધવલસિંહ ઝાલા સીધા ભોગ બનનાર વિદ્યાર્થીના ઘરે પહોંચ્યા અને પરિવારને સાંત્વના પાઠવી.
ધારાસભ્ય ધવલ ઝાલાની સાથે તાલુકા ભાજપના હોદ્દેદારો પણ હાજર રહ્યા હતા. મુલાકાત દરમિયાન ધારાસભ્યએ સમગ્ર ઘટનાની વિગત મેળવી અને ન્યાયની ખાતરી આપી. ત્યારબાદ તેમણે જિલ્લા પોલીસ વડા (SP) સાથે ટેલિફોનિક વાતચીત કરી મહિલા PI સામે કડક કાર્યવાહી કરવાની સ્પષ્ટ માંગ ઉઠાવી.
વિવાદ વકરતા SP એ સમગ્ર મામલે તટસ્થ અને નિષ્પક્ષ તપાસના આદેશ આપ્યા છે. પોલીસ અધિકારીઓનું કહેવું છે કે તપાસ દરમિયાન તમામ પાસાઓ ધ્યાનમાં લેવામાં આવશે અને જો મહિલા PI દોષિત સાબિત થશે તો નિયમ મુજબ કડક કાર્યવાહી કરવામાં આવશે.
આ ઘટનાને લઈ બાલાસિનોર સહિત સમગ્ર મહીસાગર જિલ્લામાં ચર્ચાઓ તેજ બની છે. પોલીસ દ્વારા વિદ્યાર્થીને માર મારવાના આક્ષેપોએ કાયદા વ્યવસ્થાની કાર્યપદ્ધતિ પર પણ પ્રશ્નો ઊભા કર્યા છે. બીજી તરફ, પોલીસ બેડામાં પણ આ મામલે ફફડાટ જોવા મળી રહ્યો છે.
હાલ સમગ્ર મામલો તપાસ હેઠળ છે અને જિલ્લા પોલીસ વડાના આદેશ બાદ તપાસની પ્રક્રિયા શરૂ કરવામાં આવી છે. હવે જોવાનું રહેશે કે તપાસમાં શું બહાર આવે છે અને ભોગ બનનાર વિદ્યાર્થીને ન્યાય કેટલાં વહેલા મળે છે.
