Ayodhya Ram Mandir Donation Counting Employees Resign: અયોધ્યાના શ્રી રામ જન્મભૂમિ મંદિરમાં તાજેતરમાં સામે આવેલા દાન ચોરીના વિવાદની અસર હજુ ઓછી થઈ નથી ત્યાં વધુ એક ગંભીર પ્રશાસનિક સંકટ સામે આવ્યું છે. મંદિરમાં દરરોજ ભક્તો દ્વારા આપવામાં આવતા દાનની ગણતરીનું મહત્વનું કામ સંભાળતા 23 કર્મચારીઓએ એકસાથે સામૂહિક રાજીનામા આપી દેતા સમગ્ર વ્યવસ્થા ચર્ચાના કેન્દ્રમાં આવી ગઈ છે. કર્મચારીઓના આ નિર્ણયથી દાનની ગણતરીની પ્રક્રિયા પર સીધી અસર પડી છે અને મંદિર ટ્રસ્ટ ઉપરાંત સ્ટેટ બેંક ઓફ ઇન્ડિયા (SBI) તથા સુરક્ષા એજન્સીઓમાં પણ દોડધામનો માહોલ સર્જાયો છે.
ગુરુવારે રાજીનામા બાદ સ્થિતિ એવી બની કે દાન ગણતરી વિભાગમાં માત્ર 13 કર્મચારીઓ જ ફરજ પર હાજર રહ્યા હતા. કર્મચારીઓની અછતને કારણે દૈનિક દાનની ગણતરીનું કામ ધીમું પડવાની શક્યતા વ્યક્ત કરવામાં આવી રહી છે. બીજી તરફ, તાજેતરમાં સામે આવેલા દાન ચોરીના કેસને ધ્યાનમાં રાખીને નવી ભરતી દરમિયાન કડક પોલીસ વેરિફિકેશન કરવાની પ્રક્રિયા અપનાવવામાં આવશે, જેના કારણે ખાલી પડેલી જગ્યાઓ તાત્કાલિક ભરાઈ શકશે નહીં તેવી શક્યતા પણ વ્યક્ત થઈ રહી છે.
કામના કલાકો વધ્યા, પગારમાં ઘટાડો થતાં કર્મચારીઓમાં નારાજગી
રાજીનામું આપનાર કર્મચારીઓના જણાવ્યા અનુસાર, દાન ચોરીનો મામલો સામે આવ્યા બાદ મંદિરમાં દાન ગણતરીની વ્યવસ્થામાં ફેરફાર કરવામાં આવ્યો હતો. અગાઉ બે અલગ-અલગ શિફ્ટમાં ચાલતી કામગીરીને એક જ શિફ્ટમાં ફેરવી દેવામાં આવી હતી. પરિણામે અગાઉ રોજના આશરે છ કલાકની ફરજ બજાવતા કર્મચારીઓને હવે સવારે 9 વાગ્યાથી સાંજે 6 વાગ્યા સુધી સતત લગભગ નવ કલાક કામ કરવું પડતું હતું. કર્મચારીઓનો આક્ષેપ છે કે. કામના કલાકોમાં વધારો કરવામાં આવ્યો હોવા છતાં તેમના પગારમાં વધારો કરવાને બદલે ઘટાડો કરવામાં આવ્યો. અગાઉ તમામ કર્મચારીઓને દર મહિને રૂ. 14,755નો નિશ્ચિત પગાર મળતો હતો. પરંતુ નવી વ્યવસ્થા હેઠળ કેટલાક કર્મચારીઓનો પગાર રૂ. 8,000 જ્યારે કેટલાકનો રૂ. 11,000 સુધી ઘટાડવામાં આવ્યો હોવાનું તેઓએ જણાવ્યું છે. આ ઉપરાંત મહિનામાં મળતી રજાઓની સંખ્યામાં પણ ઘટાડો કરવામાં આવ્યો હોવાનું કર્મચારીઓનું કહેવું છે.
આ પણ વાંચો: રામ મંદિર વિવાદમાં વધુ એક મોટું એક્શન! : ચંપત રાય સહિત 3 મોટા ચહેરાઓ પાસેથી પાછા ખેંચાયા આ ખાસ અધિકાર
માંગણીઓ ન સ્વીકારાતા સામૂહિક રાજીનામાનો નિર્ણય
માહિતી અનુસાર, બુધવારે સાંજે કામગીરી પૂર્ણ થયા બાદ તમામ કર્મચારીઓએ બેઠક યોજી હતી. આ દરમિયાન તેઓએ પોતાની સમસ્યાઓ અંગે સ્ટેટ બેંક ઓફ ઇન્ડિયાની તુલસી ઉદ્યાન શાખાના અધિકારીઓ તેમજ દાન ગણતરીની કામગીરી સંભાળતી સુરક્ષા એજન્સીના સુપરવાઇઝર જયરામ યાદવ સમક્ષ રજૂઆત કરી હતી. કર્મચારીઓએ અગાઉની જેમ છ કલાકની ડ્યુટી, મૂળ પગાર પુનઃ લાગુ કરવાની અને રજાઓમાં કરાયેલા ઘટાડાને પાછો ખેંચવાની માંગ કરી હતી. જોકે, તેમની માંગણીઓ સ્વીકારવામાં ન આવતા કર્મચારીઓએ વિરોધ સ્વરૂપે હસ્તાક્ષર સાથે સામૂહિક રાજીનામું સોંપી દીધું હતું. ત્યારબાદ ગુરુવારે સવારે મોટાભાગના કર્મચારીઓ કામ પર હાજર ન રહેતા સમગ્ર ઘટનાએ ગંભીર સ્વરૂપ ધારણ કર્યું.
દાન ગણતરીની કામગીરી પર સીધી અસર
રામ મંદિર જેવા દેશના સૌથી વધુ દાન પ્રાપ્ત કરતા ધાર્મિક સ્થળોમાં દાનની ગણતરી અત્યંત સંવેદનશીલ અને જવાબદારીભર્યું કાર્ય માનવામાં આવે છે. મોટી સંખ્યામાં ભક્તો દરરોજ રોકડ, ચેક અને અન્ય સ્વરૂપમાં દાન અર્પણ કરતા હોવાથી તેની પારદર્શક અને સમયસર ગણતરી કરવી જરૂરી બને છે. 23 કર્મચારીઓના એકસાથે રાજીનામાથી દૈનિક કામગીરી પર તાત્કાલિક અસર પડી છે. હાલ ઉપલબ્ધ સ્ટાફ દ્વારા કામગીરી ચાલુ રાખવાનો પ્રયાસ થઈ રહ્યો છે, પરંતુ કર્મચારીઓની અછતને કારણે અગાઉની ગતિએ દાન ગણતરી શક્ય બનશે કે નહીં તે અંગે પ્રશ્નો ઉભા થયા છે.
નવી ભરતી થશે, પરંતુ પોલીસ વેરિફિકેશન બાદ જ નિમણૂક
બેંકના સૂત્રોના જણાવ્યા અનુસાર, ખાલી પડેલી જગ્યાઓ ભરવા માટે નવી ભરતી પ્રક્રિયા શરૂ કરવાની તૈયારી કરવામાં આવી રહી છે. જોકે, તાજેતરમાં થયેલા દાન ચોરીના કેસ બાદ સુરક્ષા અને વિશ્વસનીયતા સૌથી મોટો મુદ્દો બની ગયો છે. આ કારણે હવે દરેક નવા ઉમેદવારનું સંપૂર્ણ પોલીસ વેરિફિકેશન અને જરૂરી તપાસ પૂર્ણ થયા બાદ જ નિમણૂક કરવામાં આવશે. આ પ્રક્રિયામાં સમય લાગવાની શક્યતા હોવાથી દાન ગણતરી વિભાગમાં સ્ટાફની અછત થોડો સમય યથાવત રહી શકે છે. બીજી તરફ, બેંકના એક અધિકારીએ એવો દાવો પણ કર્યો છે કે કામગીરીની જરૂરિયાતને ધ્યાનમાં રાખીને સ્ટાફની સંખ્યામાં ઘટાડો કરવામાં આવ્યો છે અને હવે અગાઉ જેટલા કર્મચારીઓની જરૂરિયાત નથી. જોકે, કર્મચારીઓ આ દાવાને નકારી રહ્યા છે અને પગાર ઘટાડો તથા વધેલા કામના કલાકોને જ રાજીનામાનું મુખ્ય કારણ ગણાવી રહ્યા છે.
આ પણ વાંચો: રામ મંદિર દાન ચોરી કેસમાં નવો ખુલાસો : ચોરીના પૈસા શેરબજારમાં રોકવામાં આવતા હતા
ટ્રસ્ટમાં પણ વધતી હલચલ
આ સમગ્ર ઘટનાક્રમ વચ્ચે શ્રી રામ જન્મભૂમિ તીર્થ ક્ષેત્ર ટ્રસ્ટમાં પણ બેઠકઓનો દોર શરૂ થયો છે. ટ્રસ્ટના કાર્યવાહક મહામંત્રી કૃષ્ણ મોહને ટ્રસ્ટના અધ્યક્ષ મહંત નૃત્ય ગોપાલ દાસ સાથે મણિરામ છાવણી ખાતે મુલાકાત કરી હતી. કાર્યવાહક મહામંત્રી તરીકે પદભાર સંભાળ્યા બાદ તેમની આ પ્રથમ સત્તાવાર મુલાકાત હતી. જોકે, ટ્રસ્ટ તરફથી આ બેઠકને નિયમિત મુલાકાત તરીકે રજૂ કરવામાં આવી છે, તેમ છતાં દાન ચોરીના વિવાદ અને કર્મચારીઓના સામૂહિક રાજીનામા બાદ યોજાયેલી આ બેઠકને લઈને અનેક પ્રકારની ચર્ચાઓ ચાલી રહી છે. ટ્રસ્ટે હજુ સુધી આ સમગ્ર મામલે કોઈ સત્તાવાર વિગતવાર નિવેદન જાહેર કર્યું નથી.
દાન ચોરીના વિવાદ બાદ વિશ્વાસ જાળવવાનો પડકાર
તાજેતરમાં સામે આવેલા દાન ચોરીના કેસ પછી હવે કર્મચારીઓના સામૂહિક રાજીનામાએ રામ મંદિરની વહીવટી વ્યવસ્થા સામે વધુ એક પડકાર ઉભો કર્યો છે. એક તરફ દાન વ્યવસ્થામાં પારદર્શિતા અને સુરક્ષા જાળવવાની જવાબદારી છે તો બીજી તરફ કર્મચારીઓની અસંતોષભરી સ્થિતિને પણ સંભાળવાની જરૂરિયાત ઉભી થઈ છે.n આગામી દિવસોમાં ટ્રસ્ટ, એસબીઆઈ અને સંબંધિત સુરક્ષા એજન્સીઓ આ સમસ્યાનો કેવી રીતે ઉકેલ લાવે છે અને દાન ગણતરીની કામગીરીને ફરી સામાન્ય બનાવે છે તેના પર સૌની નજર રહેશે.
