Amreli Highway split into two parts : અમરેલી જિલ્લામાં સતત વરસી રહેલા ભારે વરસાદે જનજીવન પર ગંભીર અસર કરી છે. સાવરકુંડલા તાલુકાના ચરખડિયા ગામ અને ઓલીયા વિસ્તાર નજીક ધસમસતા પાણીના પ્રવાહે અમરેલી-સાવરકુંડલા માર્ગને ભારે નુકસાન પહોંચાડ્યું છે. માર્ગનો આશરે 20 ફૂટ જેટલો ભાગ પાણીના જોરદાર પ્રવાહમાં ધોવાઈ જતાં વાહનવ્યવહાર સંપૂર્ણપણે બંધ થઈ ગયો છે. ઘટનાને પગલે બંને બાજુ વાહનોની લાંબી કતારો જોવા મળી રહી છે અને મુસાફરોને ભારે હાલાકીનો સામનો કરવો પડી રહ્યો છે. સ્થાનિકોનું કહેવું છે કે ભારે વરસાદને કારણે નજીકના જળપ્રવાહો અને નદીઓમાં પાણીનો સ્તર અચાનક વધી ગયો હતો. તેના કારણે માર્ગ ઉપરથી પસાર થતા પાણીના ધસમસતા પ્રવાહે રસ્તાની નીચેની માટી અને આધાર ધોવી નાખતા માર્ગનો એક ભાગ તૂટી પડ્યો હતો. ઘટનાના પગલે અમરેલીથી રાજુલા અને સાવરકુંડલા તરફ જતો મહત્વનો માર્ગ ખોરવાઈ ગયો છે.
છેલ્લા 16 કલાકથી માર્ગ બંધ, વિકલ્પ માર્ગનો સહારો
પ્રાપ્ત માહિતી મુજબ માર્ગ ગઈકાલથી જ નુકસાનગ્રસ્ત બન્યો હોવા છતાં હજી સુધી સ્થાયી સમારકામ અથવા વાહનવ્યવહાર પુનઃસ્થાપિત કરવા માટેની અસરકારક કાર્યવાહી શરૂ થઈ નથી. પરિણામે છેલ્લા અંદાજે 16 કલાકથી અમરેલી-સાવરકુંડલા માર્ગ બંધ હાલતમાં છે. આ પરિસ્થિતિમાં વાહનચાલકોને ચલાલા માર્ગે ફરી વળીને રાજુલા અને સાવરકુંડલા પહોંચવાની ફરજ પડી રહી છે. લાંબા અંતરના વાહનચાલકો તેમજ રોજિંદા મુસાફરી કરતા લોકો માટે આ સ્થિતિ મુશ્કેલીભરી બની છે. માર્ગ બંધ થતાં ટ્રાન્સપોર્ટ સેવાઓ પર પણ અસર જોવા મળી રહી છે. અમરેલીના બેંક કર્મચારી નરેશ રાઠોડે જણાવ્યું કે મુખ્ય માર્ગ બંધ થઈ જતાં મુસાફરોને કલાકો સુધી રાહ જોવી પડી રહી છે અને વિકલ્પ માર્ગ અપનાવવો પડી રહ્યો છે. સ્થાનિક રહેવાસી પ્રકાશભાઈએ જણાવ્યું કે ભારે વરસાદ દરમિયાન આ વિસ્તારમાં પાણીનો પ્રવાહ અત્યંત તેજ બનતો હોય છે અને યોગ્ય ડ્રેનેજ વ્યવસ્થા ન હોવાને કારણે વારંવાર આવી પરિસ્થિતિ સર્જાય છે.
આ પણ ખાસ વાંચો : વડોદરાની ભાયલીની અર્બન-8 રેસિડન્સીમાં મંદિર વિવાદે લીધું ઉગ્ર સ્વરૂપ : રહીશો પર હુમલાનો આક્ષેપ
ભારે વરસાદથી અનેક વિસ્તારો પ્રભાવિત
ભારે વરસાદને કારણે માત્ર હાઇવે જ નહીં પરંતુ આસપાસના ગામોમાં પણ પાણી ભરાવાની સમસ્યા ઊભી થઈ છે. સાવરકુંડલાથી ચલાલા અને ધારી તરફ જતો માર્ગ પણ વરસાદી પાણીના પ્રવાહથી પ્રભાવિત થયો હોવાનું જાણવા મળી રહ્યું છે. તે ઉપરાંત લાપાળીયા ગામ નજીકથી પસાર થતી કરેણ નદીમાં આવેલા પૂર જેવી સ્થિતિને કારણે નદીના પાણી ગામમાં પ્રવેશી ગયા હતા. જેના કારણે ગામમાં બેટ જેવી સ્થિતિ સર્જાઈ હોવાનું સ્થાનિક સૂત્રોએ જણાવ્યું છે. કેટલાક વિસ્તારોમાં લોકોના ઘરો અને ખેતરોમાં પણ પાણી ઘૂસ્યાની માહિતી સામે આવી રહી છે. વહીવટી તંત્ર દ્વારા અસરગ્રસ્ત વિસ્તારોની સ્થિતિ પર નજર રાખવામાં આવી રહી છે. જોકે સ્થાનિકો દ્વારા નુકસાનગ્રસ્ત માર્ગના તાત્કાલિક સમારકામ તેમજ સલામત અવરજવર માટે ઝડપથી વૈકલ્પિક વ્યવસ્થા ઊભી કરવાની માંગ ઉઠી છે.
તંત્ર સામે ઉઠ્યા પ્રશ્નો
માર્ગ ધોવાઈ જવાની ઘટનાને લઈને સ્થાનિકોમાં રોષ પણ જોવા મળી રહ્યો છે. લોકોનું માનવું છે કે વરસાદી પાણીના નિકાલ માટે પૂરતી વ્યવસ્થા અને મજબૂત ઇન્ફ્રાસ્ટ્રક્ચર હોત તો આ પ્રકારની સ્થિતિ ટાળી શકાત. સતત વરસાદ અને વધતા જળપ્રવાહ વચ્ચે માર્ગોની ગુણવત્તા અને જાળવણી અંગે પણ પ્રશ્નો ઉભા થયા છે. હાલ માટે તંત્ર દ્વારા નુકસાનનું મૂલ્યાંકન કરવામાં આવી રહ્યું છે અને વરસાદની સ્થિતિ સામાન્ય બન્યા બાદ માર્ગ પુનઃસ્થાપિત કરવા માટે કામગીરી હાથ ધરાય તેવી શક્યતા છે. ત્યાં સુધી વાહનચાલકોને સાવચેતી રાખવા અને જાહેર કરાયેલા વૈકલ્પિક માર્ગોનો ઉપયોગ કરવાની સલાહ આપવામાં આવી રહી છે.
