અમરેલી જિલ્લાના રાજુલા તાલુકાના કોવાયા ગામે સિંહના ટોળાના હુમલામાં જીવ ગુમાવનારા ઉત્તરાખંડના યુવક પ્રકાશચંદ્રના મોત પહેલાંના અંતિમ CCTV ફૂટેજ સામે આવ્યા છે. આ ફૂટેજમાં યુવક ખંભે સામાનની બેગ લટકાવીને પોતાના વતન જવા માટે નીકળતો જોવા મળે છે. થોડા સમય બાદ જ તે સિંહના હુમલાનો ભોગ બન્યો હતો. આ ઘટનાના નવા ફૂટેજ સામે આવતા સમગ્ર પંથકમાં ફરી એકવાર ચકચાર મચી ગઈ છે. પ્રકાશચંદ્ર એક ખાનગી કંપનીમાં કામ કરતો હતો. ઘટના પહેલાં તે સામાન્ય રીતે રસ્તા પરથી પસાર થતો જોવા મળે છે. કોઈને પણ અંદાજ નહોતો કે થોડા જ સમય બાદ તેની સાથે ભયાનક દુર્ઘટના બનવાની છે.
CCTVમાં કેદ થઈ યુવકની અંતિમ ક્ષણો
સામે આવેલા CCTV ફૂટેજમાં પ્રકાશચંદ્ર ખંભે બેગ લટકાવીને રસ્તા પર ચાલતો જોવા મળે છે. રસ્તામાં તે એક પાનના ગલ્લા પાસે થોડો સમય ઊભો રહ્યો હતો અને ત્યાં હાજર સ્થાનિક લોકો સાથે વાતચીત પણ કરી હતી. પ્રત્યક્ષદર્શીઓના જણાવ્યા મુજબ વાતચીત બાદ તે પોતાના માર્ગે આગળ વધ્યો હતો. જોકે થોડા અંતરે જ સિંહના ટોળાએ તેના પર હુમલો કર્યો હતો. હુમલો એટલો જીવલેણ હતો કે યુવકને બચાવવાની કોઈ તક મળી નહોતી. આ CCTV ફૂટેજ હવે ઘટનાની તપાસમાં પણ મહત્વનો પુરાવો બની શકે છે, કારણ કે તે યુવકની અંતિમ હિલચાલને સ્પષ્ટ રીતે દર્શાવે છે.
શ્વાન માનવ અંગ લઈને જતો હોવાના ફૂટેજથી ફફડાટ
આ ઘટનાને વધુ ભયાનક બનાવતા અન્ય CCTV ફૂટેજ પણ અગાઉ સામે આવ્યા હતા. તેમાં એક શ્વાન મૃતક યુવકના કપાયેલા પગનો ભાગ મોઢામાં દબાવીને લઈ જતો જોવા મળ્યો હતો. આ દ્રશ્યો સામે આવ્યા બાદ સ્થાનિક લોકોમાં ભારે ભય અને ચિંતા ફેલાઈ હતી. ગ્રામજનોનું કહેવું છે કે આવી ઘટના પહેલા ક્યારેય જોવા મળી નહોતી. વનવિભાગ અને પોલીસ બંને માટે આ દ્રશ્યો ચિંતાજનક હતા, કારણ કે તે દર્શાવે છે કે હુમલો કેટલો ગંભીર અને વિકરાળ હતો.
આ પણ વાંચો: અમરેલીમાં સિંહોના શિકાર બાદ યુવકનું ધડથી અલગ માથું મળ્યું : ચોથા દિવસે કૂતરું મોઢામાં દબોચી તેનો પગ લઈ આવ્યું, કંપારી છૂટે તેવા દ્રશ્યોથી હડકંપ
ટ્રક ડ્રાઈવરે શૂટ કર્યો હતો સિંહોની 'મિજબાની'નો વીડિયો
ઘટનાક્રમમાં વધુ એક ચોંકાવનારો વીડિયો પણ સામે આવ્યો છે. આ વીડિયોમાં સિંહનું ટોળું પોતાના શિકાર પર તૂટી પડેલું જોવા મળે છે. માહિતી મુજબ રસ્તા પરથી પસાર થઈ રહેલા એક ટ્રક ડ્રાઈવરે દૂરથી આ દ્રશ્ય જોયું હતું. શરૂઆતમાં તેને લાગ્યું હતું કે સિંહો કોઈ જંગલી પ્રાણીનો શિકાર કરી રહ્યા છે. તેથી તેણે પોતાના મોબાઈલમાં વીડિયો ઉતારી લીધો હતો. બાદમાં જ્યારે ઘટનાની હકીકત સામે આવી ત્યારે જાણવા મળ્યું કે સિંહો કોઈ પ્રાણી નહીં પરંતુ માનવ શરીર પર હુમલો કરી રહ્યા હતા. આ ખુલાસા બાદ સમગ્ર વિસ્તારમાં ઘટનાને લઈને વધુ ગંભીરતા જોવા મળી રહી છે.
આ પણ વાંચો: અમરેલીમાં યુવકના શિકાર બાદ કેમેરામાં કેદ થયો મિજબાની માણતો સિંહ : વીડિયો ઉતારનાર ટ્રક ચાલક હેડલાઈટ ચાલુ રાખી લાઈવ દ્રશ્ય જોતો રહ્યો
વનવિભાગે 4 સિંહોને પાંજરે પૂર્યા
ઘટના બાદ વનવિભાગે તાત્કાલિક વિશેષ ઓપરેશન શરૂ કર્યું હતું. હુમલામાં સંડોવાયેલા સિંહોની ઓળખ કરવા માટે આસપાસના વિસ્તારમાંથી ચાર સિંહોને પાંજરે પૂરવામાં આવ્યા છે. વન અધિકારીઓ હવે પાંજરે પુરાયેલા સિંહોના સ્કેટ્સ (મળ) અને અન્ય નમૂનાઓની વૈજ્ઞાનિક તપાસ કરશે. DNA અને ફોરેન્સિક આધારિત વિશ્લેષણ દ્વારા એ જાણી શકાય કે હુમલામાં કયા સિંહની સંડોવણી હતી. વનવિભાગના અધિકારીઓનું કહેવું છે કે તપાસ પૂર્ણ થયા બાદ જ સ્પષ્ટ થશે કે હુમલો કરનાર સિંહ કયો હતો અને ત્યારબાદ નિયમ મુજબ આગળની કાર્યવાહી હાથ ધરવામાં આવશે.
માનવ-સિંહ સંઘર્ષનો ફરી ઉઠ્યો સવાલ
ગીર અને આસપાસના વિસ્તારોમાં છેલ્લા કેટલાક વર્ષોમાં સિંહોની સંખ્યા વધી રહી છે. તેના કારણે માનવ વસાહતોની નજીક સિંહોની અવરજવર પણ વધતી જોવા મળી રહી છે. કોવાયાની આ ઘટના બાદ ફરી એકવાર માનવ-સિંહ સંઘર્ષનો મુદ્દો ચર્ચામાં આવ્યો છે. સ્થાનિક લોકોનું કહેવું છે કે રાત્રિના સમયે સિંહોની અવરજવર વધતી હોવાથી સુરક્ષા અંગે વધુ અસરકારક પગલાં લેવાની જરૂર છે. વનવિભાગ દ્વારા હાલ સમગ્ર ઘટનાની ગંભીરતાથી તપાસ કરવામાં આવી રહી છે અને ગ્રામજનોને સતર્ક રહેવા માટે સૂચના આપવામાં આવી છે.
